2 Ɛkɔndɔ

27 Jɔtama+ aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 16 la Jɛrusalɛma. Nyango lokombo lande Jerusha, ɔna Zadɔka.+ 2 Nde akatetemala nsala kɛnɛ kaki ɔlɔlɔ lo washo wa Jehowa oko wakasalaka+ Uziya wa she; dikambo ɔtɔi ko nde kɔmbɔtɔ lo tɛmpɛlɔ ka Jehowa.+ Koko anto wakatetemalaka nsala akambo lo yoho ya kɔlɔ. 3 Nde akake soko dia la diko dia lo luudu la Jehowa,+ ndo nde akake dihikahika efula lo ehele ka Ɔfɛlɛ.+ 4 Nde akake ndo esomba+ lo lɛkɛ l’akona la Juda,+ ndo nde akake ahole wodingami la mpele+ ndo totshoto+ lo ekonda. 5 Nde akalɔsha nkumekanga k’ase Amɔna+ ndo akaalɛndja, ko ɔnɔnyi ɔsɔ ase Amɔna wakawosha talata* 100 ya mfɛsa, tɛdikɔ ta kɔra* nunu dikumi (10 000) t’eponga ndo nunu dikumi (10 000) t’asami. Ase Amɔna wakoofute diangɔ sɔ ndo l’ɔnɔnyi wa 2 la wa 3.+ 6 Ko Jɔtama akatetemala monga la wolo, nɛ dia nde akashikikadia* mboka yande la ntondo ka Jehowa Nzambi kande.

7 Lo kɛnɛ kendana l’etenyi kekina k’ɔkɔndɔ wa Jɔtama, ata tshɛ wakandalɔsha ndo mboka yande, awui asɔ fundama lo Dibuku dia Nkumi ya dikanga y’Isariyɛlɛ ndo ya Juda.+ 8 Nde aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 16 la Jɛrusalɛma.+ 9 Oma laasɔ, Jɔtama aketama dia momuya kaamɛ la watshɛnde ndo wakookundɛ l’Osomba wa Davidɛ.+ Ko ɔnande Ahaza akayala nkumekanga lo dihole diande.+