Danyɛlɛ

12 “L’etena kɛsɔ, Mikayɛlɛ*+ ayemala,* owandji wa woke+ wemadi lo wahɔ w’anto ayɛ.* Etena ka sui dia woho wahatayalaka ntatɛ lam’akayala wodja polo ndo l’etena kɛsɔ kayoyala. L’etena kɛsɔ, anto ayɛ wayohandɔ,+ onto tshɛ layotanema lokombo lande mfundama lo dibuku.+ 2 Efula ka wanɛ woladi djɔ lo ditshu dia nkɛtɛ wayemɔ, amɔtshi otsha lo lɔsɛnɔ la pondjo ndo akina otsha lo nsɔnyi ndo lo diɔnyɔ dia pondjo.

3 “Wanɛ wele la shɛnɔdi wayɔhɛta ngaingai oko loowa l’olongo ndo wanɛ wakonya efula lo losembwe oko tɔɔtɔ pondjo pondjo.

4 “Koko wɛ Danyɛlɛ, lama ɛtɛkɛta ɛnɛ sheke ndo diha dibuku nɛ polo lo etena k’ekomelo.+ Efula wayeteta lɛnɛ la lɛnɛ* ndo ewo ka mɛtɛ kayoyala efula.”+

5 Oma laasɔ, dimi Danyɛlɛ lakende, mɛnyi ko akina 2 wemadi lɛkɔ, 1 lo wedi ɔnɛ w’ɔkɛdi ndo 1 lo wedi okina w’ɔkɛdi.+ 6 Ko ɔmɔtshi akatɛ pami kakalɔtɛ dihɔndɔ dia linɛnɛ+ laki laadiko di’ashi w’ɔkɛdi akɔ ate: “Polo l’etena kakɔna kayokomɛ akambo wa diambo anɛ?” 7 Ko dimi lakoke pami kakalɔtɛ dihɔndɔ dia linɛnɛ kaki laadiko di’ashi w’ɔkɛdi akɔ etena kakandedia lonya lande l’omi ndo lonya lande la lɔmɔsɔ atshiba lo lokombo la Ɔnɛ lasɛna pondjo pondjo+ ate: “Ayonga lo etena kakashikikɛma, tena diakashikikɛma ndo k’ahende ɔtɔi k’etena.* Kam’ayokomɛ+ watshatshelo wa wolo w’anto w’ekila, akambo anɛ tshɛ wayokoma l’ekomelo kawɔ.”

8 Dimi lakoke, koko dimi kokoka nshihodia;+ ɔnkɔnɛ dimi lakate nte: “Nkumɛmi le, ngande wayokomɛ akambo anɛ?”

9 Ko nde akate ate: “Danyɛlɛ le, tshɔka, nɛ dia ɛtɛkɛta ɛnɛ pombaka namema sheke ndo ndjihama polo l’etena k’ekomelo.+ 10 Anto efula wayoyaɛdia, wayoyaetɛ wɛma ndo wayɛdiama.+ Akanga wa kɔlɔ wayosalaka kɔlɔ ndo ndooko kanga kɔlɔ layoshihodia; koko wanɛ wele la shɛnɔdi wayoshihodia.+

11 “Oma lo etena kanyɛma olambo wa tena tshɛ+ ndo kakitshama+ ɛngɔ ka wɔnɔnyi katonga elanyelo, ayonga nshi kinunu la nkama hiende l’akumi divwa (1 290).

12 “Ɔngɛnɔngɛnɔ le ɔnɛ latetemala nongamɛ* ndo lakoma lo nshi yakɔ kinunu la nkama shato l’akumi asato la tshanu (1 335)!

13 “Koko wɛ, tshɔka otsha lo ekomelo. Wɛ ayomuya, koko wɛ ayemala dikambo dia yema yayɛ* lo ekomelo ka nshi.”+