2 Ɛkɔndɔ

20 L’ɔkɔngɔ diko, ase Mɔaba+ ndo ase Amɔna+ kaamɛ l’aseka Amɔnima* amɔtshi wakaye dia ndjɔlɔsha Jɛhɔshafata. 2 Ko wakayotɛ Jɛhɔshafata vate: “Olui a woke w’anto wamboya dia ndjokɔlɔsha oma l’ɛtshi ka nkɛtɛ kele suke la ndjale,* oma lo Ɛdɔmɛ+ ndo vɔ wekɔ la Hazazɔna-Tamara, mbuta ate la Ɛnɛ-Ngɛdi.”+ 3 Jɛhɔshafata akoke wɔma ko akɔshi yɛdikɔ* ya nyanga Jehowa.+ Ɔnkɔnɛ, nde akewoya di’anto wa lo Juda y’otondo nkila mbo ya ndɛ. 4 Oma laasɔ, ase Juda wakasangana dia mimbola Jehowa+ kanyi. Vɔ wakaye oma l’esomba tshɛ wa la Juda dia ndjombola Jehowa kanyi.

5 Oma laasɔ, Jɛhɔshafata akemala l’atei w’etshumanelo ka Juda ndo Jɛrusalɛma lo luudu la Jehowa la ntondo ka sɛkɛ di’oyoyo, 6 ko nde akate ate:

“Jehowa Nzambi ka watshɛso le, shi wɛ kele Nzambi ka l’olongo?+ Shi wɛ kole waolelo tshɛ wa wedja?+ Wolo la nkudu wekɔ lo lonya layɛ ndo ndooko onto lakoka memala dia nsɛmanɛ la yɛ.+ 7 Nzambi kaso le, shi wɛ akatshanya wanɛ wakadjasɛka lo wodja ɔnɛ oma la ntondo ka wodja ayɛ w’Isariyɛlɛ, ko wɛ mbisha tokanula* ta Abrahama+ w’ɔngɛnyi ayɛ wodja akɔ lo pondjo? 8 Vɔ wakadjasɛ lɔkɔ ndo vɔ wakakokɛ tɛmpɛlɔ k’ekila lɔkɔ dikambo dia lokombo layɛ,+ wata vate: 9 ‘Naka mpokoso kambotokomɛ, oyadi la lokuwa la ta, kilombo, elando kana ndjala, katemale la ntondo ka luudu lɔnɛ ndo la ntondo kayɛ (nɛ dia lokombo layɛ lekɔ lo luudu lɔnɛ,)+ ko sho kɔlɔmba ekimanyielo l’ɔtɛ wa asui aso, ndo wɛ kohokame kele kotoshimbee.’+ 10 Wonya ɔnɛ, ase Amɔna, ase Mɔaba ndo ase lɛkɛ l’akona la Seirɛ+ vɔ anɛ, wanɛ wakiyɛ kombetawɔ di’ase Isariyɛlɛ mbaɔtwɛ la ta lam’akawatombe oma lo wodja w’Edjibito. Vɔ wakaatshike ndo vɔ kombashila oshiki.+ 11 Wonya ɔnɛ, vɔ wotɔsɔmbɔya lo ndja dia ndjototshanya oma lo ɛtshi kayɛ ka nkɛtɛ kakayatosha oko etenyi k’okitɔ.+ 12 Nzambi kaso le, onde wɛ hatowasha dilanya?+ Nɛ dia sho ndooko la wolo la ntondo k’olui a woke w’anto wamboya ndjotɔlɔsha ɔnɛ; ndo hateye kɛnɛ kahombaso nsala,+ washo aso wekɔ paka le yɛ.”+

13 L’etena kɛsɔ, ase Juda tshɛ wakemala la ntondo ka Jehowa kaamɛ la wadiɛwɔ la anawɔ,* mbidja ndo ana w’ashashi.

14 Oma laasɔ, l’atei w’etshumanelo kakɔ, nyuma ka Jehowa kakaye le Jahaziyɛlɛ ɔna Zɛkariya ɔna Bɛnaya ɔna Jeyɛlɛ ɔna Mataniya ose Lɛwi l’atei w’ana w’apami wa Asafu. 15 Nde akate ate: “Nyodje yimba, nyu ase Juda tshɛ ndo nyu ase Jɛrusalɛma kaamɛ la nkumekanga Jɛhɔshafata! Jehowa kanyotɛ ate: ‘Tanyokake wɔma ndo tanyatɛke asolo l’ɔtɛ w’olui a woke w’anto ɔnɛ, nɛ dia ta keema dianyu, koko diaki Nzambi.+ 16 Kanyoholɔ loyi dia taalɔsha. Vɔ wayoyadɛka lo vioka ya Zizɛ, ko nyayowatana la koma y’okidi la ntondo k’oswe wa Jeruɛlɛ. 17 Hatonga ohomba nyu ndɔ ta nɛ. Nyemale lo ahole anyu, nyotshikale ki+ kele nyende panda kayanga nyosha Jehowa.*+ Ase Juda la ase Jɛrusalɛma le, tanyokake wɔma ndo tanyatɛke asolo.+ Kanyotshu loyi kele kanyotaalɔsha, ko Jehowa ayonga kaamɛ la nyu.’”+

18 Mbala kakɔ ɔtɔi, Jɛhɔshafata akakusama elungi polo la nkɛtɛ, ndo ase Juda tshɛ l’ase Jɛrusalɛma wakayakɔsha la ntondo ka Jehowa dia ntɛmɔla Jehowa. 19 Oma laasɔ, ase Lɛwi waki tokanula t’aseka Kɔhata+ ndo aseka Kɔra wakemala dia ntombola Jehowa Nzambi k’Isariyɛlɛ la dui dia wolo efula.+

20 La wedi a pindju, vɔ waketɔ la yosose, ko wakatshu otsha l’oswe wa Tekoa.+ Lam’akawatatshɔka, Jɛhɔshafata akemala ko akate ate: “Ase Juda ndo nyu ase Jɛrusalɛma le, nyompokame! Nyonge la mbetawɔ le Jehowa Nzambi kanyu dia nyu nshikimala.* Nyonge la mbetawɔ le amvutshi ande,+ ko nyayotondoya.”

21 L’ɔkɔngɔ wa nde la wodja mbishana tokanyi, nde akasɔnɛ apami dia membɛ+ Jehowa ndo dia mbotombola, wɔlɔtshi dɛngalɛnga di’ekila etena kakawatatombaka la ntondo k’apami waki la dihomɔ dia ta, wata vate: “Nyosha Jehowa losaka, nɛ dia ngandji kande ka kɔlamelo tshikalaka pondjo.”+

22 Lam’akawatatɛ memba esambo wa lotombo l’ɔngɛnɔngɛnɔ tshɛ, Jehowa akaambe ase Amɔna, ase Mɔaba ndo ase lɛkɛ l’akona la Seirɛ wanɛ wakɔtwɛ Juda la ta djonga, ko vɔ wakadiakana lam’asawɔ.+ 23 Ase Amɔna vɔ l’ase Mɔaba wakakadimwɛ ase lɛkɛ l’akona la Seirɛ+ la ta dia mbadiaka ndo mbashila oshiki. Lam’akawashidiya l’ase Seirɛ, vɔ wakadiakana lam’asawɔ.+

24 Koko lam’akakome ase Juda lo tshoto y’etangelo ya l’oswe+ ndo lam’akawende olui w’anto akɔ, wɛnyi ko edo awɔ kalakala la nkɛtɛ;+ ndooko onto lakahande. 25 Ko Jɛhɔshafata nde l’anto ande wakaye dia ndjɔsa diangɔ dia dimbo oma le wɔ ndo wakatane diangɔ efula ka mamba, ahɔndɔ ndo diangɔ di’amɛna ko wakadiɔshi dikambo diawɔ vɔamɛ polo ndo hawoyokoka mɛmba ndooko ɛngɔ.+ Wakasale nshi 3 y’etondo dia mɛmba diangɔ dia dimbo, nɛ dia diɔ diaki efula. 26 Lushi la 4, vɔ wakasangana lo Okidi* wa Beraka, nɛ dia vɔ wakatombola* Jehowa lɛkɔ. Diakɔ dielɛwɔ dihole sɔ ɔnɛ Okidi wa Beraka*+ polo ndo ɛlɔ.

27 Oma laasɔ, apami tshɛ w’ase Juda ndo w’ase Jɛrusalɛma kaamɛ la Jɛhɔshafata laki ɔtɛ awɔ wakakalola otsha la Jɛrusalɛma watangɛnangɛna, nɛ dia Jehowa akaangɛnyangɛnya l’ɔtɛ w’atunyi awɔ.+ 28 Ɔnkɔnɛ, vɔ wakakome la Jɛrusalɛma wele la dihomahoma di’eshinga, nsɛsɛ+ ndo amama,+ ko wakatshu otsha lo luudu la Jehowa.+ 29 Ko waolelo tshɛ wa lo wedja wakandama la wɔma wa Nzambi lam’akawoke dia Jehowa ambɔlɔsha atunyi w’Isariyɛlɛ.+ 30 Ɔnkɔnɛ, diolelo dia Jɛhɔshafata komonga ndooko la ofukutanu ndo Nzambi kande akatetemala mbosha momuya lo wedi akɔ tshɛ.+

31 Jɛhɔshafata akatetemala mbolɛ la Juda. Nde aki l’ɛnɔnyi 35 lam’akandayala nkumekanga ndo nde akolɛ l’edja k’ɛnɔnyi 25 la Jɛrusalɛma. Nyango lokombo lande Azuba ɔna Shilihi.+ 32 Nde akatetemala nkɛndakɛnda lo mboka ka Asa+ wa she. Nde kokitakɔ ndo nde akasalaka kɛnɛ kaki ɔlɔlɔ lo washo wa Jehowa.+ 33 Koko ahole wa la diko kominyɛma+ ndo anto kɔnɔngɔsɔla etema awɔ dia nyanga Nzambi ka watshɛwɔ.+

34 Lo kɛnɛ kendana l’etenyi kekina k’ɔkɔndɔ wa Jɛhɔshafata oma l’etatelo polo l’ekomelo kawɔ, awui asɔ fundama l’atei w’ɛtɛkɛta wa Jehu+ ɔna Hanani+ wakadjama lo Dibuku dia Nkumi ya dikanga y’Isariyɛlɛ. 35 L’ɔkɔngɔ wa laasɔ, Jɛhɔshafata nkumekanga ka Juda akadje sheke kaamɛ la Ahaziya nkumekanga k’Isariyɛlɛ kakasalaka akambo wa kɔlɔ.+ 36 Nde akokana la nde dia nsala masuwa wakahombaka ntshɔ otsha la Tarashishi,+ ko vɔ wakasale masuwa la Eziɔna-Ngɛbɛrɛ.+ 37 Koko Eliɛzɛrɛ ɔna Dɔdavahu dia la Maresha akate ɛtɛkɛta wa prɔfɛsiya lo dikambo dia Jɛhɔshafata ate: “Lam’ele wɛ ambodja sheke kaamɛ la Ahaziya, Jehowa ayolanya elimu ayɛ.”+ Ɔnkɔnɛ masuwa wakahandjɔ,+ ko vɔ kokoka ntshɔ la Tarashishi nto.