2 Petero
1 Dimi Simɔna Petero, ɔhɔmbɔ ndo ɔpɔstɔlɔ wa Yeso Kristo lambofundɛ wanɛ wakakondja mbetawɔ kele la nɛmɔ oko kaso* lo tshimbo ya losembwe laki Nzambi ndo laki Oshimbedi aso Yeso Kristo nte:
2 Ɔlɔlɔ waheyama mbɛdika ndo wɔladi wafule le nyu diɛsɛ la ewo+ k’oshika ka Nzambi ndo ka Yeso Nkumɛso, 3 nɛ dia lo wolo waki Nzambi mbakatalongola* kɛnɛ tshɛ katokimanyiya dia nsɛna lo yoho yɔtɔnɛ l’omamemelo le Nzambi diɛsɛ la ewo k’oshika ka Ɔnɛ lakatelɛ+ lo lotombo ndo lo ɔlɔlɔ ande. 4 L’ekimanyielo k’akambo asɔ mbakandatosha* alaka+ wa nɛmɔ ndo wa weke efula dia lo tshimbo yawɔ, nyu monga oko Nzambi+ lo akambo amɔtshi, lam’ele nyakahandɔ oma l’ɛhɔndɛlɔ ka l’andja ɔnɛ koye oma lo nsaki* ya kɔlɔ.
5 L’ɔtɛ wa dikambo sɔ, nyosale la wolo+ tshɛ dia nkotsha ɔlɔlɔ laadiko dia mbetawɔ kanyu, laadiko di’ɔlɔlɔ+ nyokotsha ewo,+ 6 laadiko dia ewo nyokotsha ndjakimɛ, laadiko dia ndjakimɛ+ nyokotsha ekikelo, laadiko dia ekikelo nyokotsha omamemelo le Nzambi,+ 7 laadiko di’omamemelo le Nzambi nyokotsha lolango l’onto l’ɔnango, laadiko dia lolango l’onto l’ɔnango nyokotsha ngandji.+ 8 Nɛ dia naka akambo asɔ monga le nyu ndo mfula, kete vɔ wayonyokimanyiya diaha nyu monga tosuwasuwa ndo anto wahatɔ elowa+ lo kɛnɛ kendana la ewo k’oshika ka Nkumɛso Yeso Kristo.
9 Nɛ dia naka akambo asɔ bu le onto ɔmɔtshi, kete nde ekɔ tshungu yadiha washo ande l’osase+ ndo nde mbohɛka woho wakandɛdiama oma lo pɛkato yande+ y’edjedja. 10 Ɔnkɔnɛ analengo le, nyoleke mbidja etete k’efula dia nkukutɛ diɛsɛ diele la nyu dia mbelamɛ+ ndo sɔnama, nɛ dia naka nyu ntetemala nsala akambo asɔ, kete hanyɔkɔki pondjo.+ 11 Lo mɛtɛ, lo yoho shɔ mbayonyɔtshɔkwama efula* dia mbɔtɔ lo Diolelo+ dia pondjo dia Nkumɛso la Oshimbedi aso Yeso Kristo.+
12 Diakɔ diamomokongɛ dia nyoholaka tena tshɛ akambo asɔ kaanga mbawaeyanyu ndo kaanga mbambonyoshikimala lo akambo wa mɛtɛ wakanyeke. 13 Koko, dimi mbɔsaka dia ekɔ dui dia dimɛna l’edja tshɛ kemi lo tabɛrnaklɛ+ kɛnɛ,* dia nyokeketshaka la waohwelo,+ 14 nyeya oko weyami dia tabɛrnaklɛ kami kekɔ suke la mimɔ, oko wakambutɛ+ Nkumɛso Yeso Kristo hwe. 15 Tena tshɛ dimi layosalaka la wolo ami tshɛ, kele l’ɔkɔngɔ wa dimi ntshɔ, kanyohɔke* akambo asɔ nyuamɛ.
16 Aha lo ndjela ɛkɔndɔ wa kashi wa lokolonganya mbakatanyewoya wolo ndo woongelo wa Nkumɛso Yeso Kristo, koko shoamɛ taki ɛmɛnyi wa woke woke ande.+ 17 Nɛ dia nde akalongola kɛnɛmɔ la lotombo oma le Nzambi She etena kakate kiɔkɔ ya lotombo la woke woke ɛtɛkɛta ɛnɛ:* “Ɔnɛ ele ɔnami, lokami ngandji, ɔnɛ lamometawɔ dimɛ.”+ 18 Eelo, ɛtɛkɛta ɛsɔ sho takawaoke oma l’olongo lam’akiso kaamɛ la nde lo dikona di’ekila.
19 Ɔnkɔnɛ, wɛkamu aso lo ɔtɛkɛta wa prɔfɛsiya wamboleka nkeketala ndo ayonga dimɛna naka nyu mbidja yimba lo ɛtɛkɛta akɔ wele oko tala+ diahɛta lo dihole dia wodjima, (polo ndo lam’ayohotɔ wonya ndo lam’ayotomba nsongayɔɔtɔ,+) l’etema anyu. 20 Nɛ dia ntondotondo nyu mbeyaka dia ndooko prɔfɛsiya ka l’Afundelo kaya oma lo kanyi y’onto ndamɛ. 21 Dikambo prɔfɛsiya kombishama oma lo lolango l’onto,+ koko anto wakate akambo w’oma le Nzambi nɛ dia wakasokoyama* oma le nyuma k’ekila.+