Isaya
21 Ɛtɛkɛta wendana la oswe wa ndjale:*+
Mpokoso kekɔ lo ndjaye oko lɔpɛpɛ la wolo latɛmbaka diangɔ lo sidɛ,
Oma lo oswe wa shɛnga, oma lo wodja wokiya wɔma.+
2 Wambombutɛ ɛnɛlɔ ka ngala kɛnɛ:
Kanga lokeso ekɔ lo nkesa,
Ndo ondanyishi ekɔ lo ndanya.
Elama le, dɛ! Mediya+ le, dinga!
Dimi layokumiya akumu tshɛ wakandakonya anto dia nkuma.+
3 Diakɔ diemi la lɔkɔnyɔ l’efula.*+
Dimi lofumboya fudu,
Oko womoto lele la lɔɔnɔ.
Dimi lambɔkɔmɔ efula hakoke mboka;
Dimi lambotshimba yimba efula hakoke mɛna.
4 Asolo ami wambatɛ; dimi lambodidima la wɔma.
Tosho ta shimba takamalongamɛka tambonsatsha lokomba.
5 Nyale mɛsa ndo nyɔlɔngɔsɔlɛ nkɔsa!
Nyole ndo nyɔnɔ!+
Nyu ewandji, nyemale nyokite engawo esɔ!
6 Nɛ dia Jehowa akambutɛ ate:
“Tshɔka tokitsha djamu kele nde atake kɛnɛ kɛnande.”
7 Ko nde akɛnyi pusupusu ka ta kaamɛ la mfalasa 2,
Pusupusu ka ta kakotɔma oma le mponda,
Pusupusu ka ta kakotɔma oma le kamɛlɔ.
Nde akasɛdingola dimɛna dimɛna, la yambalo y’efula.
8 Ko nde akawelɛ oko ntambwɛ ate:
“Jehowa le, dimi memalaka wonya tshɛ la yanyi lo tshoto y’etangelo,
Ndo dimi memalaka lo dihole diami di’olimu l’otsho tshɛ.+
9 Ohenda kɛnɛ kayaye:
Apami wahemi lo pusupusu ka ta kaamɛ la olui wa mfalasa!”+
Oma laasɔ, nde akate ate:
“Tɔ kambɔkɔ! Babilɔna kambɔkɔ!+
Nde ambohandjola dikishi tshɛ dia tozambizambi tatɔ la nkɛtɛ!”+
10 Anto ami wambosusɔma le,
Diangɔ* di’oma lo dihole diami di’esuswelo le,+
Dimi lambonyotɛ kɛnɛ kakamoke oma le Jehowa kanga lolembelembe, Nzambi ka Isariyɛlɛ.
11 Ɛtɛkɛta wendana la Duuma:*
Onto ɔmɔtshi ekɔ lo mbelɛmi oma la Seirɛ+ ate:
“Djamu le, otsho ngande?
Djamu le, otsho ngande?”
12 Djamu akate ate:
“Pindju kekɔ lo ndjaye kaamɛ ndo otsho.
Naka nyalanga mimbola, nyombole.
Nyoye nto!”
13 Ɛtɛkɛta wendana la laandja l’oswe:
Lo okonda, lo laandja l’oswe mbayonyetsha otsho,
Nyu ambetshetshi wa la Dedana.+
14 Nyela ashi dia ndjohomana la ɔnɛ lele la mposa k’ashi,
Nyu ase wodja wa Tema,+
Ndo nyela mapa dikambo dia ɔnɛ layalawɔ.
15 Nɛ dia vɔ wambolawɔ tokuwa ta ta, lokuwa la ta la lɔsɔmɔla,
Ndo ota wonɛmi ndo ngala ka ta.
16 Nɛ dia Jehowa akambutɛ ate: “Lo ɔnɔnyi ɔtɔi, oko ɛnɔnyi w’ose olimu,* lotombo tshɛ la Kɛdara+ layokomɛ. 17 Ambuki w’eta watshikala l’atei wa andɔshi wa ta wa Kɛdara wayonga yema tshitshɛ, nɛ dia Jehowa Nzambi ka Isariyɛlɛ kambota.”