Isaya
31 Mananu le wanɛ waholɔ otsha l’Edjibito dia toyanga ekimanyielo,+
Wanɛ wɛkama le mfalasa,+
Wanɛ wayaɛkɛ le pusupusu ya ta nɛ dia yɔ yekɔ efula,
Ndo le mfalasa* ya ta nɛ dia yɔ yekɔ la wolo.
Koko vɔ hawendɛ le l’Ekila la Isariyɛlɛ,
Ndo vɔ hawoyange Jehowa.
2 Koko nde ekɔ nto la lomba ndo ayela mpokoso,
Ndo nde ayokotsha ɛtɛkɛta ande.
Nde ayonɛɛ dia ndɔsha luudu l’atshi wa kɔlɔ
Ndo dia ndɔsha wanɛ wakimanyiya atshi wa kɔlɔ.+
3 Ase Edjibito wekɔ tsho anto k’anto koko aha Nzambi;
Mfalasa yawɔ yekɔ emunyi koko aha nyuma.+
Lam’ayosembola Jehowa lonya lande,
Onto tshɛ lasha ekimanyielo ayotakana
Ndo onto tshɛ lakimanyiyama ayɔkɔ;
Vɔ tshɛ wayolanyema etena kakɔ ɔtɔi.
4 Nɛ dia Jehowa akambutɛ ate:
“Oko watodikitaka ntambwɛ, ɔsɔngɔ wa ntambwɛ wele la wolo* otsha le nyama kalangatɔ minda,
Etena kakihamwɛ olui w’otondo w’alami w’ɛkɔkɔ kaamɛ,
Ko tɔ hatoke wɔma wa dui diawɔ
Ndo hatotshike l’ɔtɛ wa lohango lawɔ,
Ngasɔ mbayoholɔ Jehowa kanga lolembelembe dia ndjɔlɔsha
La diko dia Dikona dia Siɔna ndo la diko dia kionakona yayɔ.
5 Oko tofudu tatafumbɔ, ngasɔ mbayamɛ Jehowa kanga lolembelembe Jɛrusalɛma.+
Nde ayoyamɛ ndo ayoyishimbɛ.
Nde ayoyomba ndo ayoyitsha.”
6 “Ase Isariyɛlɛ le,+ nyokalole le Ɔnɛ lakanyatɔmbɔkwɛ lo yoho ya kɔlɔ. 7 Nɛ dia lushi lɔsɔ, onto l’onto ayokasha tozambizambi tande t’anyanya ta mfɛsa ndo tozambizambi tande tele bu la nɛmɔ ta paonyi takasale anya anyu pɛkato dia tisala.
8 Ose Asuriya ayodiakema la lokuwa la ta, aha l’onto;
Ndo lokuwa la ta laha laki onto layowatshatsha.+
Nde ayolawɔ l’ɔtɛ wa lokuwa la ta,
Ndo ɛlɔngɔ ande w’apami wayɔsama dia mbakandjaka olimu la wolo.
9 Dive diande diayoshishɔ l’ɔtɛ wa wɔma wa mɛtɛ,
Ndo ewandji ande wayotshama wɔma l’ɔtɛ wa ekundji ka djembetelo,” mbata Jehowa,
Ɔnɛ lele osase* ande wekɔ la Siɔna ndo nkuka kande ka dja kekɔ la Jɛrusalɛma.