Isaya
22 Ɛtɛkɛta wendana la Okidi wa Ɛnɛlɔ:*+
Ambotomba le yɛ kamboyodɛ tshɛ polo lo ɛtɛ wa mvudu?
2 Wɛ akalole tɔɔ la lofunguso,
Wɛ osomba wa londjo, shombasomba y’ɔngɛnɔngɛnɔ.
Edo ayɛ kondjakema la lokuwa la ta,
Ndo vɔ komvɔ lo ta.+
3 Ewandji ayɛ tshɛ wa hiadi wakalawɔ kaamɛ.+
Vɔ wakandama lo lokanu aha la ota.
Wanɛ tshɛ wakatanema wakandama lo lokanu,+
Kaanga mbakawalawɔ etale.
4 Diakɔ diakamate nte: “Nyonya washo anyu oma le mi,
Kele ndele wolo.+
5 Nɛ dia ekɔ lushi la lofunge ndo la ɔlɛndjamelo ndo la wɔma,+
Oma le Nkum’Olongo Nkumadiɔndjɔ Jehowa kanga lolembelembe,
Lo Okidi wa Ɛnɛlɔ.
Wekɔ lo nyukola ehele+
Ndo wekɔ lo mbida ekoko lo dikona.
7 Ekidi* ayɛ woleki amɛna
Wayolola tɔɔ la pusupusu ya ta,
Ndo mfalasa* yayemala la soko,
8 Okombɔ* wa Juda wayonyɛma.
“Lushi lɔsɔ nyayenda dihomɔ dia ta dia lo Luudu la Okonda,+ 9 ko nyayɛna wesho efula lo Osomba wa Davidɛ.+ Ndo nyayɔmɔtshanya ashi wa lo oduwa wa l’ɛse.+ 10 Nyayadia mvudu ya Jɛrusalɛma ndo nyayotola mvudu dia nkeketsha ehele. 11 Nyayosala difuku di’ashi lam’asa mpele 2 dikambo di’ashi wa lo oduwa w’edjedja, koko hanyotendɛ le Okengi awɔ wa Woke ndo hanyotɛna Ɔnɛ lakoosale oma ko edjedja.
12 Lushi lɔsɔ Nkum’Olongo Nkumadiɔndjɔ Jehowa kanga lolembelembe,
Ayɔlɔmba dia anto ndela ndo monga lo otanda,+
Dia minya divo l’ɛtɛ ndo dia ndɔta akoto.
13 Koko, ekɔ paka fɛtɛ la ɔngɛnɔngɛnɔ,
Odiakelo wa ngɔmbɛ la odiakelo w’ɛkɔkɔ,
Olelo w’onatshi la ɔnwɛlɔ wa wanu.+
‘Nyɛsɔ tole ndo tɔnɔ, nɛ dia tayovɔ loyi.’”+
14 Ko Jehowa kanga lolembelembe akayashola lo atoyi ami ate: “‘Munga kɛnɛ hatokombama lo wahɔ anyu edja ndo nyambovɔ,’+ mbata Nkum’Olongo Nkumadiɔndjɔ Jehowa kanga lolembelembe.”
15 Nkum’Olongo Nkumadiɔndjɔ Jehowa kanga lolembelembe kata ate: “Tshɔka le olami ɔnɛ, le Shebina+ lele la ɔkɛndɛ wa luudu* kele towote wate: 16 ‘Wahɔ akɔna wele la yɛ lanɛ ndo akɔna akotola yambalo yayɛ lanɛ, kayatshimɛyɛ diombo lanɛ?’ Nde ekɔ lo ndjatshimɛ diombo lo dihole dia laadiko; nde ekɔ lo ndjaatɛ dihole dia diomuyelo* lo dive. 17 ‘Eenda, onto le, Jehowa ayokokasha la ngala tshɛ ndo ayokokimɛ la wolo w’efula. 18 Lo mɛtɛ nde ayokɔmba ndo ayokooka oko ponde l’ɛtshi ka nkɛtɛ ka hwe. Lɛkɔ kayoyovɔ ndo lɛkɔ kayonga pusupusu yayɛ ya lotombo, nsɔnyi le luudu la nkumɛyɛ. 19 Dimi layokonya oma lo dihole diayɛ ndo layokonya oma lo olimu ayɛ.
20 “‘Lushi lɔsɔ dimi layelɛ okambi ami Eliyakima+ ɔna Hilikiya, 21 layowɔlɔtsha okutu ayɛ, layowokeleka+ okaba ayɛ wolo ndo layokimɔ lowandji* layɛ lo anya ande. Ko nde ayonga she ase Jɛrusalɛma ndo luudu la Juda. 22 Dimi layokitsha nsapi ka luudu la Davidɛ+ lo ahɛka ande. Nde ayodihola ko ndooko onto layodiha; ndo nde ayodiha ko ndooko onto layodihola. 23 Dimi layowɔkɔkɔmɛ oko wokɔ lo dihole dia pondjo ndo nde ayonga oko kiti ka lowandji ka lotombo le luudu la she. 24 Ndo le nde kayowohanɛ lotombo* tshɛ la luudu la she, tokanula ndo ana, diangɔ tshɛ dia totshitshɛ, diangɔ diele oko alɔnga ndo mbaka tshɛ ya weke.
25 “Jehowa kanga lolembelembe kata ate: ‘Lushi lɔsɔ wokɔ wakamakɔkɔmɛ lo dihole dia pondjo wayonyɛma+ ndo vɔ wayonyukɔma ko wayɔkɔ ndo oshikɔ wakawasukɛka wayolanyema, nɛ dia Jehowa ndamɛ kambodita.’”