Luka

20 Lushi lɔmɔtshi, lam’aketshaka Yeso anto lo tɛmpɛlɔ, ndo lam’akandewoyaka lokumu l’ɔlɔlɔ, ewandji w’ɛlɔmbɛdi la afundji ndo dikumanyi wakaye 2 ko wakawombola vate: “Otote oma lo wolo akɔna wasalayɛ akambo anɛ? Kana akakosha wolo+ wa nsala akambo anɛ?” 3 Nde akaakadimola ate: “Dimi lawɔ lekɔ lo nanga nyombola dimbola dimɔtshi, kele nyokadimole: 4 Onde batisimu ka Joani kakaye oma l’olongo kana oma le anto?” 5 Ko vɔ wakatatɛ nkana yimba lam’asawɔ vate: “Naka sho mbuta ɔnɛ: ‘Oma l’olongo,’ kete nde ayototɛ ate: ‘Ko lande na kakinyu kombeetawɔ?’ 6 Koko hatokoke mbuta ɔnɛ: ‘Oma le anto,’ nɛ dia anto tshɛ wayotoka ave lam’ele vɔ mbetawɔka dia Joani aki omvutshi.”+ 7 Ɔnkɔnɛ, vɔ wakakadimola dia vɔ haweye kiɔkɔ yatɔ. 8 Yeso akawatɛ ate: “Dimi lawɔ haanyotɛ oma lo wolo akɔna wasalami akambo anɛ.”

9 Oma laasɔ, nde akoke anto wɛɛla ɔnɛ ate: “Pami kɛmɔtshi akonɛ vinyɔ+ lo ekambɔ kande ko akakitshikɛ akambi wa dikambɔ ko akɛngɔla ndo akatotshikala edja lɛkɔ.+ 10 Lam’akakoke eleko k’elowa mbɛla, nde akatome ose olimu ande ɔmɔtshi le akambi wa dikambɔ dia tɔsa elowa ɛmɔtshi oma l’ekambɔ kande ka vinyɔ. Koko akambi wa dikambɔ wakɔɔkɔmɔla+ ndo wakookaloya anyanya. 11 Ko nde akatome ose olimu okina. Vɔ wakakɔmɔla ose olimu ɔsɔ nto, wakawosha nsɔnyi* ndo wakookaloya anyanya. 12 Ko nde akayotoma ose olimu wa 3, ndo ɔsɔ nto wakoohomuya ndo wakatowokasha l’andja w’ekambɔ. 13 Ko kanga ekambɔ ka vinyɔ akate ate: ‘Ahombami nsala na? Layotoma ɔnami la ngandji.+ Ondo vɔ wayowɔlɛmiya.’ 14 Lam’akawɛnyi ɔnande, akambi wa dikambɔ wakatanɛ lam’asawɔ vate: ‘Ɔnɛ mbele ɔhɛna. Nyoye toodiake kele katɔshi sango diande.’ 15 Ko vɔ wakawokasha l’andja w’ekambɔ ka vinyɔ ndo wakoodiake.+ Kakɔna kayowasalɛ kanga ekambɔ ka vinyɔ? 16 Nde ayoya ndo ayodiaka akambi wa dikambɔ asɔ ndo ayokimɔ ekambɔ kande le anto akina.”

Lam’akawoke ngasɔ, vɔ wakate vate: “Dui dia ngasɔ diatosalemake pondjo!” 17 Koko nde akawaende tɛɛ ndo akate ate: “Akambo wakafundama ɔnɛ: ‘Dive diakakasha ambiki wa luudu diaya dive dia woke dia tshuku’*+ alembetshiyawɔ? 18 Onto latakana lo dive nɛ ayatatɛ.+ Ndo ɔnɛ layodiɔkwɛ, diɔ diayowominola.”

19 Afundji la ewandji w’ɛlɔmbɛdi wakayangaka dia mbonda ko wonya akɔ, nɛ dia vɔ wakeye ɔnɛ diawɔ mbatɛkɛtande+ lo wɛɛla ɔsɔ, koko vɔ wakoke anto wɔma. 20 Ndo l’ɔkɔngɔ wa vɔ nyangana la nde lokala lo lokala, vɔ wakafute anto amɔtshi falanga ndo wakaatome lo woshɛshɛ dia vɔ toyaɛnya dia wekɔ anto w’ɛlɔlɔ l’oyango wa vɔ towonda lo lolemi+ dia vɔ mbokimɔ le ewandji wa lɛɛta ndo le owandji nguvɛrnɛrɛ. 21 Vɔ wakawombola vate: “Ombetsha, sho mbeyaka dia wɛ tɛkɛtaka ndo mbetshaka dimɛna ndo wɛ bu la shɔnɔdi, wɛ mbetshaka mboka ka Nzambi lo mɛtɛ: 22 Onde ekɔ dimɛna* sho mfuta elambo wa Kayisa w’onto l’onto kana bu?” 23 Nde akeye mayɛlɛ awɔ ko akawatɛ ate: 24 “Nyɔmɛnya dɛnariyo* dimɔtshi. Osato ndo efundelo wele lɔkɔ ɛnɛ, waki na wewɔ?” Vɔ wakate vate: “Waki Kayisa.” 25 Nde akawatɛ ate: “Ɔnkɔnɛ, nyosha Kayisa diangɔ dia Kayisa+ ndo nyosha Nzambi diangɔ dia Nzambi.”+ 26 Ko vɔ kokoka mbonda lo lolemi lo dikambo sɔ la ntondo k’anto, vɔ wakaambe lo mboka okadimwelo ande ndo wakatshikala ki.

27 Koko Asadukɛ, wanɛ wakataka ɔnɛ eolwelo+ hatonga, wakaye ko wakawombola+ vate: 28 “Ombetsha, Mɔsɛ akatofundɛ ate, ‘naka pami kɛmɔtshi ekɔ la ɔnango ko pami kakɔ ambovɔ ndo ambotshika wadɛnde aha la mbota, ɔnango pombaka mbɔsa wadɛnde dia mbolola lohanga la ɔnango.’+ 29 Ɔnkɔnɛ, apami 7 w’otema ɔtɔi waki l’atei aso. Ɔnɛ l’enondo akatshuke wadi, ko akavu aha la mbota. 30 Ɔna la 2 woho akɔ waamɛ. 31 Ɔnɛ la 3 akawotshuke. Ngasɔ mbakadiayala ndo le vɔ akɔ 7 tshɛ, ndooko lakote la nde, ko vɔ tshɛ wakavu. 32 L’ekomelo, womoto akɔ akayovɔ. 33 Laasɔ lo eolwelo, akɔna ayonga omɛnde lam’ele vɔ akɔ 7 wakootshuke?”

34 Yeso akawatɛ ate: “Ana wa lo dikongɛ nɛ di’akambo* wekɔ lo ntshuka ndo wekɔ lo ntshukama, 35 koko wanɛ wɔsama oko anto wakoka mbɔtɔ lo dikongɛ di’akambo diayaye ndo mbolɔ oma lo nyɔi hawototshuka ndo hawototshukama.+ 36 Ndo lo mɛtɛ, vɔ hawotokoka mvɔ nto, nɛ dia vɔ wekɔ oko andjelo ndo vɔ wekɔ ana waki Nzambi lo monga ana wa eolwelo. 37 Koko Mɔsɛ nde lawɔ akate l’ɔkɔndɔ wendana la dikombokombo di’atɛndɛ ɔnɛ anto wakavu wayolɔ etena kakandelɛ Jehowa* ate: ‘Nzambi ka Abrahama, Nzambi ka Isaka ndo Nzambi ka Jakɔbɔ.’+ 38 Nde keema Nzambi ka wanɛ wambovɔ, koko ka wanɛ wasɛna, nɛ dia le nde,*+ vɔ tshɛ wekɔ lo nsɛna.” 39 Ko afundji amɔtshi wakawotɛ vate: “Ombetsha, wɛ ambɔtɛkɛta dimɛna.” 40 Ɔnkɔnɛ, oma ko etena kɛsɔ, vɔ kosombɔ mbooka kaanga dimbola nto.

41 Ko nde lawɔ akawambola ate: “Lande na katawɔ ɔnɛ Kristo ekɔ ɔna Davidɛ?+ 42 Lam’ele Davidɛ ndamɛ akate lo dibuku di’Esambo ɔnɛ: ‘Jehowa* akatɛ Nkumɛmi ate: “Djasɛ lo lonya lami l’omi 43 polo lam’ayomokitsha atunyi ayɛ oko kihona k’ekolo ayɛ.”’+ 44 Ko lam’ele Davidɛ akawelɛ ɔnɛ: ‘Nkumɛmi,’ lo woho akɔna wende ɔnande?”

45 Oma laasɔ, etena kakoohokamɛka anto tshɛ, nde akatɛ ambeki ande ate: 46 “Nyewɔ afundji watolangaka mbeteta l’atei w’anto wɔlɔtshi ekutu ndo watolangaka anto mbasha mɔyɔ lo bingu, vɔ tolangaka mbidjasɛ l’ahole wa ntondo* lo toshinangɔnga ndo l’ahole wa lokumu lo afɛstɔ,+ 47 wanɛ watɔlɛka mvudu* ya wadi waki edo ndo vɔ salaka alɔmbɛlɔ w’etale dia ndjaɛnya* le anto. Vɔ wayolongola dilanya dioleki wolo.”*