Isaya
2 Ɛnɛlɔ kakɛnyi Isaya ɔna Amɔza lo dikambo dia Juda la Jɛrusalɛma+ tɔ kɛnɛ:
2 Lo etena k’ekomelo ka nshi*,
Dikona dia luudu la Jehowa
Diayoshikimala nge laadiko dia tɔsɔdi t’akona,+
Ndo diayodiyama laadiko dia tokonakona,
Ko wedja tshɛ wayɔkɛlaka otsha lɛkɔ.+
3 Ndo anto efula wayotshɔ, ko wayota vate:
“Nyoye tode otsha lo dikona dia Jehowa,
Otsha lo luudu la Nzambi ka Jakɔbɔ.+
Nde ayototetsha mboka yande,
Ndo sho tayɔkɛndakɛnda lo ɛsɛsɛ ande.”+
4 Nde ayolombosha l’atei wa wedja
Ndo ayodja akambo l’ɔnɔngɔ* dikambo dia anto efula.
Vɔ wayotshula tokuwa tawɔ ta ta nkongo
Ndo akɔnga awɔ tɔshɔlɔ takɔlɔngawɔ adiyo.+
Wodja ɔmɔtshi hawotɛmbɛ wodja okina lokuwa la ta,
Ndo vɔ hawoteka ta nto.+
5 Luudu la Jakɔbɔ le, yaka,
Tɔkɛndɛkɛndɛ l’osase wa Jehowa.+
6 Dikambo wɛ ambohɛ anto ayɛ, luudu la Jakɔbɔ,+
Nɛ dia vɔ wambolola tɔɔ la diangɔ di’oma lo ɛstɛ;
Vɔ wekɔ lo nsala awui wa maji+ oko ase Filistiya,
Ndo wekɔ la ana w’angɛndangɛnda efula.
7 Wodja awɔ wambolola tɔɔ la mfɛsa ndo la paonyi,
Ndo diangɔ diawɔ dia nɛmɔ bu la ekomelo.
Wodja awɔ wambolola tɔɔ la mfalasa,
Ndo pusupusu yawɔ bu la ekomelo.+
8 Wodja awɔ wambolola tɔɔ la tozambizambi t’anyanya.+
Vɔ wekɔ lo nkusamɛ olimu w’anya awɔ hita,
Kɛnɛ kakasale mpita yawɔ hita.
9 Ɔnkɔnɛ onto kusamaka, nde ndjaholoyaka
Ndo wɛ hakoke mɛtɛ mbadimanyiya.
10 Ɔtɔ lo dive ndo yashɛ lo ditshu
L’ɔtɛ wa woongelo wa Jehowa wokiya wɔma
Ndo lɔnɛnɛ lande la diambo.+
11 Onto lele la washo wa lotamanya ayokitshakitshama
Ndo akanga w’otako wayoholoyama.*
Jehowa oto mbayodiyama lushi lɔsɔ.
12 Nɛ dia lɔ lekɔ lushi laki Jehowa kanga lolembelembe.+
Lɔ lekɔ lo ndjaye le onto tshɛ lele la lotamanya ndo layadiya,
Le onto tshɛ, oyadi ladiyama kana laholoyama,+
13 Le elondo tshɛ wa la Lɛbanɔna w’etale ndo wadiyama
Ndo le esongo tshɛ wa ɔakɛ wa la Bashana,
14 Le akona tshɛ w’etale
Ndo le tokonakona tshɛ ta tanga,
15 Le tshoto tshɛ ya tanga ndo ehele tshɛ ka wolo,
16 Le masuwa tshɛ wa Tarashishi+
Ndo le waato tshɛ w’amɛna.
17 Lotamanya l’onto layokitshakitshama,
Ndo akanga w’otako wayoholoyama.*
Jehowa oto kayodiyama lushi lɔsɔ.
18 Tozambizambi t’anyanya tayoshishɔ tshɛ lo tshɛ.+
19 Ndo anto wayɔtɔ lo weoko w’ave
Ndo lo afuku wa lo nkɛtɛ,+
L’ɔtɛ wa woongelo wa Jehowa wokiya wɔma
Ndo lɔnɛnɛ lande la diambo,+
Lam’ayondemala dia didinya nkɛtɛ la wɔma.
20 Lushi lɔsɔ anto wayɔsa tozambizambi tawɔ t’anyanya ta mfɛsa ndo ta paonyi
Takawayasalɛ dia tikusamɛka
Ko tiokɛ le dji la nema,+
21 Dia mbɔtɔ lo wesho wa lo ave
Ndo lo ɛlɔngɛ w’ave,
L’ɔtɛ wa woongelo wa Jehowa wokiya wɔma.
Ndo lɔnɛnɛ lande la diambo,
Lam’ayondemala dia didinya nkɛtɛ la wɔma.
22 Lo wahɔ anyu hita, nyotshike ndjaɛkɛ le onto,
Lele tsho loowe la lo wesho w’ɛhɛmbɛ ande.*
Lande na kahombande mbidjama yimba?