Danyɛlɛ
10 Lo ɔnɔnyi wa 3 w’ɛlɔmbwɛlɔ ka Kurɔ+ k’ose Pɛrɛsiya, wakasholɛ Danyɛlɛ lakelamɛka lo lokombo la Bɛlɛtɛshaza+ dui dimɔtshi; losango lakɔ laki mɛtɛ ndo lɔ lakendanaka la ta dia wolo. Ndo nde akashihodia losango lakɔ ndo wakawosha yimba lo dikambo dia kɛnɛ kakandɛnyi.
2 Lo nshi shɔ, dimi Danyɛlɛ lakalele+ lo edja ka mingu 3 y’etondo. 3 Dimi kɔɔndɛ ndooko ɛngɔ ka dimɛna ndo onatshi kana wanu kɔmbɔtɔ lo onyɔ ami ndo dimi kondjashinola esɔ l’edja ka mingu 3 y’etondo. 4 Lo ngɔndɔ ka ntondo nshi 24, etena kakimi l’omamu w’ɔkɛdi wa woke, Tingirisi,*+ 5 dimi lakedia washo ko lakɛnyi pami kɛmɔtshi ɔlɔtshi ahɔndɔ wa linɛnɛ+ ndo oya wa paonyi k’oma la Ufaza waki lo lokende lande. 6 Demba diande diaki oko krizɔlitɛ,+ elungi kande kakɛnamaka oko dingadimu, washo ande waki esase w’ewa, anya la ekolo ande waki oko nkonga+ kambɛdiama ndo wondjo wa ɛtɛkɛta ande waki oko londjo la leemba la anto. 7 Paka dimi Danyɛlɛ oto kakɛnyi ɛnɛlɔ kakɔ; anto waki kaamɛ la mi kɔmɛna ɛnɛlɔ+ kakɔ. Koko lokomba la wolo lakawande, ko wakalawɔ ndo wakatoyashɛ.
8 Ko dimi lakatshikala dimɛ ndo lam’akamɛnyi ɛnɛlɔ ka woke kɛsɔ, dimi komonga la wolo nto ndo lakashisha ɛnamelo kami ka kɛnɛmɔ, ko dimi lakashisha wolo tshɛ.+ 9 Oma laasɔ, dimi lakawoke atɛkɛta; koko lam’akamawoke atɛkɛta, dimi laketama ekukumadi+ ndo lakalale djɔ ya baku. 10 Ko lonya lɔmɔtshi lakamunanda+ ndo lɔ lakamonyiya loki adwe la anya la nkɛtɛ. 11 Ko nde akambutɛ ate:
“Danyɛlɛ le, wɛ onto la nɛmɔ efula,*+ dja yimba lo ɛtɛkɛta wayangami kotɛ. Ɔnkɔnɛ, emala lo dihole diayɛ, nɛ dia dimi lakatomama le yɛ.”
Lam’akandambutɛ ngasɔ, dimi lakemala lasaka lokomba.
12 Ko nde akambutɛ ate: “Tokake wɔma,+ Danyɛlɛ. Ɛtɛkɛta ayɛ wakokɛma oma ko lushi la ntondo lakayadje otema ayɛ dia nshihodia ndo ndjakitshakitsha la ntondo ka Nzambi kayɛ ndo dimi lamboya l’ɔtɛ wa ɛtɛkɛta ayɛ.+ 13 Koko, owandji+ wa diolelo dia Pɛrɛsiya akemala dia ndɔshami l’edja ka nshi 21. Ko oma laasɔ, Mikayɛlɛ,*+ ɔmɔtshi la l’atei w’ewandji woleki tshɛ* akaye dia ndjonkimanyiya; ko dimi lakatshikala lɛkɔ suke la nkumi ya dikanga ya Pɛrɛsiya. 14 Dimi lamboya dia ndjokokimanyiya dia wɛ nshihodia kɛnɛ kayokomɛ anto ayɛ lo etena k’ekomelo ka nshi,+ nɛ dia ekɔ ɛnɛlɔ kendana la nshi yayaye.”+
15 Etena kakandambutɛ ɛtɛkɛta ɛsɔ, dimi lakakɔlɛ elungi kami la nkɛtɛ ndo lakayala lomi. 16 Ko ɔnɛ lakɛnamaka oko onto akananda ɛlɔmɔ+ ami, ko dimi lakafola onyɔ ami ndo lakatɛ ɔnɛ lakemala la ntondo kami nte: “Nkumɛmi, lekɔ lo didima l’ɔtɛ wa ɛnɛlɔ kakɔ ndo dimi laya bu la wolo.+ 17 Laasɔ, ngande wakoka okambi wa nkumɛmi ntɛkɛta la nkumɛmi?+ Nɛ dia wonya ɔnɛ, dimi bu la wolo ndo lambokoma lomu.”+
18 Ɔnɛ lakɛnamaka oko onto akaminanda nto ndo akankeketsha.+ 19 Ko nde akate ate: “Wɛ onto la nɛmɔ+ efula,* tokake wɔma.+ Wɔladi wayale la yɛ.+ Keketala, ɛɛ, keketala.” Lam’akandatɛkɛtaka la mi, dimi lakakeketshama ndo lakate nte: “Nkumɛmi tɛkɛta, nɛ dia wɛ ambonkeketsha.”
20 Ko nde akate ate: “Onde wɛ mbeyaka lande na koyemi le yɛ? Kakianɛ dimi layanga nkalola dia tɔlɔ la owandji wa Pɛrɛsiya.+ Lam’ayomomɔ, owandji wa Ngirika ayoya. 21 Koko, dimi layokotɛ awui wofundami lo efundelo wa mɛtɛ. Ndooko onto lansukɛ la wolo lo akambo asɔ, onyake paka Mikayɛlɛ+ owandji anyu.+