2 Samuɛlɛ
9 Oma laasɔ, Davidɛ akate ate: “Onde onto ɔmɔtshi aakatshikadi lo luudu la Saolo lakokami mɛnya ngandji ka kɔlamelo l’ɔtɛ wa Jɔnatana?”+ 2 L’etena kɛsɔ, okambi ɔmɔtshi wa lo luudu laki Saolo akikɔ, lokombo lande Ziba.+ Wakɔɔtɔlɛ le Davidɛ ko nkumekanga akawombola ate: “Onde wɛ kele Ziba?” Nde akakadimola ate: “Dimi kele okambi ayɛ.” 3 Nkumekanga akatetemala mbuta ate: “Onde onto ɔmɔtshi aakatshikadi lo luudu la Saolo lakokami nyomoleka mɛnya ngandji ka kɔlamelo kaki Nzambi?” Ziba akakadimola nkumekanga ate: “Eelo, ɔna Jɔnatana ɔmɔtshi ekɔ. Nde akɔkɔ* ekolo akɔ 2.”+ 4 Nkumekanga akawombola ate: “Lende eende?” Ziba akakadimola nkumekanga ate: “Nde ekɔ la Lo-Debarɛ laka Makiri+ ɔna Amiyɛlɛ.”
5 Mbala kakɔ ɔtɔi nkumekanga Davidɛ akatome dui, ko wakatowɔsa oma la Lo-Debarɛ laka Makiri ɔna Amiyɛlɛ. 6 Lam’akakome Mefibɔshɛtɛ ɔna Jɔnatana ɔna Saolo le Davidɛ, mbala kakɔ 1 nde akayakɔsha ekukumadi ndo akakusama. Ko Davidɛ akate ate: “Mefibɔshɛtɛ!” Ko nde akakadimola ate: “Okambi ayɛ nde ɔnɛ.” 7 Davidɛ akawotɛ ate: “Tokake wɔma, nɛ dia ndooko onyake dimi layokɛnya ngandji+ ka kɔlamelo l’ɔtɛ wa Jɔnatana ya shɔ, layokokaloya ɛtshi ka nkɛtɛ k’otondo kaki Saolo ka tshɛyɛ ndo wɛ ayɔlɛka* nshi tshɛ lo mɛsa ami.”+
8 Ko nde akakusama ndo akate ate: “Okambi ayɛ eende katoyodja yimba* le odo wa mfɔ+ wele oko dimi?” 9 Oma laasɔ, nkumekanga akatome dui le Ziba, okambi wa Saolo dia towotɛ ɔnɛ: “Dimi lambosha okana wa nkumɛyɛ diangɔ tshɛ diaki Saolo ndo diaki ase luudu lande tshɛ.+ 10 Nyayowokambɛka dikambɔ wɛ l’anayɛ la ekambi ayɛ ndo nyayonaka diangɔ di’oma lɔkɔ dia mbisha anto waki okana wa nkumɛyɛ mbo ya ndɛ. Koko Mefibɔshɛtɛ okana wa nkumɛyɛ ayɔlɛka nshi tshɛ lo mɛsa ami.”+
L’etena kɛsɔ, Ziba aki l’ana w’apami 15 ndo ekambi 20.+ 11 Ko Ziba akatɛ nkumekanga ate: “Okambi ayɛ ayosala kɛnɛ tshɛ kakatɛ nkumɛmi nkumekanga okambi ande dia nsala.” Ɔnkɔnɛ, Mefibɔshɛtɛ akalɛka lo mɛsa wa Davidɛ* oko ɔna nkumekanga. 12 Mefibɔshɛtɛ nde lawɔ aki la ɔna pami ɔmɔtshi la dikɛnda, lokombo lande Mika.+ Wanɛ tshɛ wakadjasɛka lo luudu laki Ziba wakayala ekambi waki Mefibɔshɛtɛ. 13 Mefibɔshɛtɛ akadjasɛka la Jɛrusalɛma, nɛ dia nde akalɛka nshi tshɛ lo mɛsa wa nkumekanga.+ Nde akɔkɔ ekolo akɔ 2.+