Rɔmɔ
13 Onto* tshɛ ayakitshakitsha l’ɛse ka ewandji+ wa laadiko, nɛ dia ndooko lowandji lahaye oma le Nzambi+ ndo Nzambi+ ketawɔ dia ewandji kitshama lo ahole wewɔ. 2 Ɔnkɔnɛ, onto tshɛ lalɔshana la lowandji ambɔlɔshana la yɛdikɔ y’oma le Nzambi. Wanɛ walɔshana la yɛdikɔ shɔ wayoyaela elombwelo le wɔ vɔamɛ. 3 Nɛ dia emboledi ɛsɔ mbokamaka wɔma, aha l’ɔtɛ w’akambo w’ɛlɔlɔ koko l’ɔtɛ w’akambo wa kɔlɔ.+ Naka wɛ halange mboka ewandji wɔma, kete tetemala nsala kɛnɛ kele ɔlɔlɔ,+ ko vɔ wayokaandola, 4 nɛ dia vɔ wekɔ ekambi waki Nzambi le yɛ dikambo di’ɔlɔlɔ ayɛ. Ko naka wɛ ekɔ lo nsala kɛnɛ kele kɔlɔ, kete onga la wɔma, nɛ dia aha okimɛkimɛ mbakimɛwɔ tokuwa ta ta. Vɔ wekɔ ekambi waki Nzambi, asɔmbɔyishi wɛnya nkɛlɛ kawɔ* le ɔnɛ lasala kɛnɛ kele kɔlɔ.
5 Ɔnkɔnɛ, nyekɔ l’ɔkɔkɔ w’oshika wa ndjakitshakitsha l’ɛse ka ewandji, aha tsho l’ɔtɛ wa nkɛlɛ kɛsɔ, koko ndo l’ɔtɛ wa nkum’otema+ kanyu. 6 Diakɔ diafutanyu elambo, dikambo vɔ wekɔ ekambi wa lo sɛkɛ waki Nzambi watotetemalaka nkamba l’oyango ɔsɔ. 7 Nyosha onto tshɛ kɛnɛ kahombande nongola: Elambo+ le ɔnɛ lahika elambo, ɔkɔngɔ le ɔnɛ lahika ɔkɔngɔ, wɔma+ le ɔnɛ lahika dia mbokama wɔma ndo kɛnɛmɔ+ le ɔnɛ lahomba nɛmiyama.
8 Tanyokolamake dibasa le onto onyake dibasa dia mbokana ngandji,+ nɛ dia onto loka osekande ngandji ambokotsha ɛlɛmbɛ.+ 9 Nɛ dia ɛlɛmbɛ mbutaka ɔnɛ: “Tosalake loseka,+ todiakake,+ tovake,+ tɔkɔmiyake,”+ ndo ɛlɛmbɛ ekina tshɛ wambotshumanyema lo dui nɛ: “Langa wonyayɛ onto oko wayalangayɛ.”+ 10 Ngandji hasalɛ osekande+ akambo wa kɔlɔ. Ɔnkɔnɛ, ngandji ele ekotshamelo k’ɛlɛmbɛ.+
11 Nyosale dikambo sɔ nɛ dia nyu mbeyaka etena keso, dia wonya wa nyu memɔ oma lo djɔ+ wamboshila nkoka, nɛ dia kakianɛ panda kaso kamboleka monga suke oleki etena kakatakome ambetawudi. 12 Wonya ambodja edja, wonya wayanga mpotɔ. Ɔnkɔnɛ, tonya ditshelo dia wodjima+ ndo tɔlɔtɛ dihomɔ dia ta di’osase.+ 13 Nyɛsɔ tɔkɛndɛkɛndɛ dimɛna+ oko anto wele la yanyi, aha lo ndjasha lo fɛtɛ yele l’awui wa tshambandeko,* lo wodjwelo wa wanu, lo dieyanelo dia kɔlɔ, lo lɔkɛwɔ la fumbɔ nsɔnyi,*+ lo ewanu ndo lo kandjema.+ 14 Koko nyɔlɔtɛ Nkumadiɔndjɔ Yeso Kristo+ ndo tanyokongɛke la ntondo dia nkotsha nsaki ya demba.+