Ɛnyɛlɔ
3 “Fundɛ ondjelo w’etshumanelo ka la Saradi wate: Ɔnɛ lele la nyuma 7 yaki Nzambi+ ndo tɔɔtɔ 7+ kata ate: ‘Dimi mbeyaka etsha ayɛ dia wɛ mɛnamaka* oko onto lele la lɔsɛnɔ, ko tete le wɛ ambovɔka.+ 2 Sɛnaka+ ndo keketshaka diangɔ diambotshikala diaki suke la mvɔ, nɛ dia lambɛna dia wɛ atashidiya elimu wahombayɛ nkamba* la ntondo ka Nzambi kami. 3 Ɔnkɔnɛ, tetemala nkanyiya* woho wakayalongola ndo woho wakayoke ndo tetemala kilama ndo yatshumoya.+ Lo mɛtɛ naka wɛ hemwe, dimi layoya oko wovi+ ndo wɛ hateya kaanga yema wonya wayomoya le yɛ.+
4 “‘Koko, ekɔ anto* amɔtshi angana l’atei anyu la Saradi waki kombidja ahɔndɔ awɔ+ mindo ndo vɔ wayɔkɛndakɛnda la mi l’ahɔndɔ awɔ wa wɛma,+ nɛ dia vɔ sunganaka. 5 Ɔnɛ ladja otshumba+ ayɔlɔta ahɔndɔ wa wɛma+ ndo dimi hadimolaki* pondjo lokombo lande oma lo dibuku dia lɔsɛnɔ,+ koko layosuya la ntondo ka Papa ndo la ntondo k’andjelo+ ande dia dimi mbeyaka lokombo lande. 6 Ɔnɛ lele l’atoyi wa mboka, ooke kɛnɛ katɛ nyuma tshumanelo.’
7 “Fundɛ ondjelo w’etshumanelo ka la Filadɛlfiya wate: Ɔnɛ lele ekila,+ lele mɛtɛ,+ lele la nsapi ka Davidɛ,+ ɔnɛ ladihola ko ndooko onto lakoka ndjiha ndo ɔnɛ ladiha ko ndooko onto lakoka ndjihola kata ate: 8 ‘Dimi mbeyaka etsha ayɛ, hokamɛ, dimi lambodihola lokuke+ la ntondo kayɛ lele ndooko onto lakoka ndjiha. Ndo dimi mbeyaka dia wɛ ekɔ la yema ya wolo tshitshɛ, ndo wɛ akalame ɔtɛkɛta ami ndo wɛ komanguna lokombo lami. 9 Hokamɛ, dimi layetɛ wanɛ w’oma lo shinangɔnga yaki Satana wata dia wekɔ ase Juda ko tete le vɔ bu ase Juda,+ koko wekɔ lo mbuta kashi, hokamɛ, dimi layowaela dia vɔ ndjokusama* l’ekolo ayɛ ndo layosala dia vɔ mbeya dia dimi lakakooke ngandji. 10 Lam’ele wɛ akalame kɛnɛ kakayoke lo dikambo dia ekikelo*+ kami, dimi lawɔ layokolama lo wonya w’ohemba+ wayokomɛ nkɛtɛ k’otondo dia ndjohemba wanɛ wodjashi la nkɛtɛ. 11 Dimi lekɔ lo ndjaye esadi.+ Tetemala nkukutɛ kɛnɛ kele la yɛ diaha onto kɔhɔtɔla dɛmbɔ diayɛ dia nkoso.+
12 “‘Ɔnɛ ladja otshumba, dimi layowetɛ ekundji lo tɛmpɛlɔ ka Nzambi kami ndo nde hatombaki oma lɔkɔ pondjo ndo dimi layofunda laadiko diande lokombo la Nzambi+ kami ndo lokombo l’osomba wa Nzambi kami, Jɛrusalɛma y’Oyoyo+ yayaholɔ oma l’olongo, oma le Nzambi kami ndo lokombo lami l’oyoyo.+ 13 Ɔnɛ lele l’atoyi wa mboka, ooke kɛnɛ katɛ nyuma tshumanelo.’
14 “Fundɛ ondjelo w’etshumanelo ka la Laodikiya+ wate: Aamɛɛ,+ ɔmɛnyi+ wa kɔlamelo+ ndo wa mɛtɛ, etatelo k’etongelo ka Nzambi+ kata ate: 15 ‘Dimi mbeyaka etsha ayɛ dia wɛ bu tshitshi bu dja. Dimi kombolaka dia wɛ monga tshitshi kana dja. 16 Ko lam’ele wɛ ekɔ djungudungu, bu dja+ bu tshitshi,+ dimi layokɔhɔngɔla oma l’onyɔ ami. 17 Lam’ele wɛ mbutaka wate: “Dimi lekɔ ɔngɔnyi+ ndo lambokondja ɛngɔnyi ndo haahombe ndooko ɛngɔ,” koko wɛ heye dia wɛ ekɔ ose paa ndo ose kɛtshi ndo ose wola ndo tshungu ndo otakataka. 18 Dimi lambokokeketsha dia wɛ nsomba oma le mi paonyi kambɛdiama la dja dia wɛ monga ɔngɔnyi ndo dia wɛ nsomba ahɔndɔ wa wɛma dia wɛ mbalɔta ndo diaha anto mɛna otakataka+ ayɛ ko wɛ ndjoka nsɔnyi ndo dia wɛ nsomba ndo okanga wa mbidja lo washo+ ayɛ dia wɛ mɛna.+
19 “‘Anto tshɛ wokami ngandji, dimi mbahangwɛka ndo mbahokolaka.+ Ɔnkɔnɛ, onga l’ohetoheto ndo yatshumoya.+ 20 Hokamɛ, dimi lambemala la soko ndo lekɔ lo nkɔkɔla. Naka onto ɔmɔtshi mboka dui diami ko ndiholami, dimi layɔtɔ lo luudu lande ndo layɔlɛ mma dia dikɔlɔ kaamɛ la nde ndo nde kaamɛ la mi. 21 Ɔnɛ ladja otshumba,+ dimi layowosha diɛsɛ dia mbidjasɛ la mi lo kiti kami ka lowandji+ woho wakamadje otshumba ndo wakamadjasɛ+ la Papa lo kiti kande ka lowandji. 22 Ɔnɛ lele l’atoyi wa mboka, ooke kɛnɛ katɛ nyuma tshumanelo.’”