Ɛnyɛlɔ

16 Dimi lakoke dui dia wolo oma lo tɛmpɛlɔ k’ekila+ diatɛ andjelo 7 ɔnɛ: “Nyotshu nyototshole alɔnga 7 wa nkɛlɛ ka Nzambi la nkɛtɛ.”+

2 Ondjelo wa ntondo akatshu ndo akatotshola kɛnɛ kaki lo dɔnga diande la nkɛtɛ.+ Ko mpota ka woke ndo ka kɔlɔ+ efula kakasoya anto waki la djembetelo ya nyama ka ngala+ ndo wanɛ wakatɛmɔlaka efanelo katɔ.+

3 Ondjelo wa 2 akatshola kɛnɛ kaki lo dɔnga diande lo ndjale.+ Ko ndjale kakayala dikila+ oko dikila di’onto lambovɔ, ko etongami* tshɛ kasɛna ka lo ndjale kakavu.+

4 Ondjelo wa 3 akatshola kɛnɛ kaki lo dɔnga diande lo ɛkɛdi ndo lo tɔkɔkɔ* t’ashi.+ Ko vɔ wakayala dikila.+ 5 Dimi lakoke ondjelo wele owandji w’ashi ata ate: “Wɛ lekɔ ndo lakikɔ,+ Wɛ Kanga kɔlamelo,+ Wɛ ekɔ Kanga losembwe nɛ dia wɛ ambela dombo nɛ,+ 6 dikambo vɔ wakatshola dikila dia ekilami ndo di’amvutshi,+ ko wɛ ambowasha dikila dia vɔ nnɔ.+ Vɔ kokaka mɛtɛ dinɔ.”+ 7 Ko dimi lakoke elambwelo kata ɔnɛ: “Eelo, Jehowa* Nzambi Kanga-Wolo-Tshɛ,+ dombo* diayɛ diekɔ mɛtɛ ndo losembwe.”+

8 Ondjelo wa 4 akatshola kɛnɛ kaki lo dɔnga diande lo wonya.+ Ko wonya wakalongola lotshungɔ la ntshumba anto la dja. 9 Ko anto wakalongola la laladi la wolo, koko vɔ wakatɛngɛ lokombo la Nzambi, ɔnɛ lele la lowandji laadiko di’asui akɔ ndo vɔ kondjatshumoya ndo kombotombola.

10 Ondjelo wa 5 akatshola kɛnɛ kaki lo dɔnga diande lo kiti ka lowandji ka nyama ka ngala. Ko diolelo diatɔ diakayala wodjima+ ndo anto wakatatɛ numata nemi yawɔ l’ɔtɛ wa kandji, 11 koko vɔ wakatɛngɛ Nzambi ka l’olongo l’ɔtɛ wa kandji ndo l’ɔtɛ wa mpota yaki la wɔ ndo vɔ kondjatshumoya oma l’etsha awɔ.

12 Ondjelo wa 6 akatshola kɛnɛ kaki lo dɔnga diande lo ɔkɛdi wa woke w’Efarata.+ Ko ashi awɔ wakome+ dia nɔngɔsɔlɛ nkumi ya dikanga+ y’oma l’ehotwelo ka wonya* mboka.

13 Ndo dimi lakɛnyi ditelo 3 dia mindo* diakɔsamaka oko oma le Nzambi diaki oko ɛkɔlɛ diatomba oma l’onyɔ wa dragɔ+ ndo oma l’onyɔ wa nyama ka ngala ndo oma l’onyɔ w’omvutshi wa kashi. 14 Diɔ diekɔ mɛtɛ ditelo di’oma le ɛdiɛngɛ ndo diɔ salaka tolembetelo,+ ndo diɔ tshɔka le nkumi ya dikanga ya lo nkɛtɛ k’otondo dia mbasanganya dia vɔ ndjɔlɔ ta+ dia lushi la woke la Nzambi Kanga-Wolo-Tshɛ.+

15 “Nyolonge, dimi lekɔ lo ndjaye oko wovi.+ Diɛsɛ le ɔnɛ lasungukala+ ndo lalama ahɔndɔ ande, diaha nde nkɛndakɛnda otakataka, ko anto ndjɛna nsɔnyi kande.”+

16 Ko wakaasanganya lo dihole dielamɛ lo Hɛbɛru ɔnɛ Aramangɛdɔna.*+

17 Ondjelo wa 7 akatshola kɛnɛ kaki lo dɔnga diande lo lɔpɛpɛ. Ko dui dia wolo diakatombe oma lo tɛmpɛlɔ k’ekila+ oma lo kiti ka lowandji diata ɔnɛ: “Diambotshama!” 18 Ko angadimu wa ndjadi, ɛtɛkɛta ndo akungola wakokɛma, ndo didimu dia nkɛtɛ dia wolo diakasalema woho wahatasalemaka ntatɛ lam’akatongama onto la nkɛtɛ.+ Ɔsɔ aki didimu dia nkɛtɛ dia mamba ndo dia wolo efula. 19 Osomba wa woke+ wakakahanyema lo tenyi 3 ndo esomba w’ase wedja wakanyukɔ. Nzambi akohɔ Babilɔna ka Woke+ dia mbosha dikɔhɔ dia wanu w’odudu wa nkɛlɛ kande.+ 20 Ndo nto, asɛnga tshɛ wakalawɔ ndo akona kotanema nto.+ 21 Ko mbɔkɔ ya weke yele lɔwɔkɔ la lɔwɔkɔ laki la wotsho wa lotalata 1* yakakwɛka anto+ oma l’olongo oko mvula, ko anto wakatɛngɛ Nzambi l’ɔtɛ wa sui dia mvula ka mbɔkɔ,+ nɛ dia sui sɔ diaki wolo wa mamba.