1 Kɔrɛtɔ

10 Analengo, dimi nangaka dia nyu mbeya dia watshɛso tshɛ waki l’ɛse ka dinge+ ndo vɔ tshɛ wakatehɔ ndjale.+ 2 Vɔ tshɛ wakabatizama lo Mɔsɛ lo tshimbo ya dinge ndo ya ndjale. 3 Vɔ tshɛ wakale mbo ya ndɛ ya lo nyuma yaamɛ.+ 4 Vɔ tshɛ wakanɔ diangɔ diakɔ diamɛ dia lo nyuma,+ nɛ dia vɔ wakanɔka oma lo dive dia lo nyuma diakatawayelaka ndo dive sɔ kɛdikɛdi* Kristo.+ 5 Koko, Nzambi kɔngɛnangɛna efula ka l’atei awɔ, nɛ dia vɔ wakadiakema l’oswe wa shɛnga.+

6 Ɔnkɔnɛ, akambo asɔ wakayala bɛnyɛlɔ le so diaha sho nkombola akambo wa kɔlɔ, oko wakawaakombola.+ 7 Tatoyalake atɛmɔdi wa dikishi woho wakayala amɔtshi l’atei awɔ, oko wakadiafundama ɔnɛ: “Anto wakadjasɛ dia ndɛ ndo nnɔ. Ko vɔ wakemala dia ngɛnangɛna.”+ 8 Tatosalake awui wa mindo wa dieyanelo* oko wakasale amɔtshi l’atei awɔ awui wa mindo wa dieyanelo,* ko anto nunu akumi ahende la sato (23 000) l’atei awɔ wakadiakema lushi ɔtɔi.+ 9 Tatodjake Jehowa* l’ohemba+ oko wakawodje amɔtshi l’atei awɔ l’ohemba, ko wakadiakema la eloyi.+ 10 Tatongunangunake oko wakangunanguna amɔtshi l’atei awɔ,+ ko wakadiakema oma le ondjakanyi.+ 11 Akambo asɔ wakaakomɛ oko bɛnyɛlɔ ndo vɔ wakafundama dia tɔhɛmɔla+ sho wanɛ wele komelo ya akongɛ w’akambo yamboya.

12 Ɔnkɔnɛ, ɔnɛ lafɔnya ate nde memala, ayalame diaha nde nkɔ.+ 13 Ndooko ohemba wambonyokomɛ wahatakomɛka anto akina.+ Koko, Nzambi ekɔ la kɔlamelo ndo nde hatetawɔ dia nyu pembama oleki kɛnɛ kakokanyu mbikikɛ,+ koko lam’ayonyokomɛ ohemba, nde ayonyatɛ mboka dia nyu monga l’akoka wa mbikikɛ ohemba akɔ.+

14 Ɔnkɔnɛ anangemi ami le, nyolawɔ ɔtɛmwɛlɔ wa dikishi.+ 15 Dimi lambonyotɛ oko onto latɛ anto wele la shɛnɔdi. Nyuamɛ nyoshikikɛ kɛnɛ katami. 16 Dikɔhɔ di’ɛtshɔkɔ diatshɔkɔlaso, shi diɔ nembetshiyaka nkondja ɛtshɔkɔ oma lo dikila dia Kristo?+ Mapa wahembolaso, shi vɔ nembetshiyaka nkondja ɛtshɔkɔ oma lo demba dia Kristo?+ 17 Mapa wekɔ ɔtɔi, ɔnkɔnɛ kaanga mbeso efula, sho tekɔ demba ɔtɔi,+ nɛ dia sho tshɛ tekɔ lo ndɛ mapa akɔ ɔtɔi.

18 Ohonyenda Isariyɛlɛ wa lo demba: Shi wanɛ walɛ elambo kahanaka la elambwelo?+ 19 Ko alangami mbuta? Onde ɔnɛ ɛngɔ kakawalambola ekishi kekɔ la nɛmɔ, kana ɔnɛ ekishi kekɔ la nɛmɔ? 20 Keema! Koko lekɔ lo mbuta dia diangɔ dialambola ase wedja, ɛdiɛngɛ mbadilambolawɔ, koko aha Nzambi;+ ndo dimi haalange nyu mbɔtɔnɛ la ɛdiɛngɛ.+ 21 Hanyokoke monga nyanɔ lo dikɔhɔ dia Jehowa* ko nyanɔ ndo lo dikɔhɔ di’ɛdiɛngɛ. Hanyokoke monga nyalɛ lo “mɛsa wa Jehowa”*+ ko nyalɛ ndo lo mɛsa w’ɛdiɛngɛ. 22 Kana ‘onde Jehowa* mbatshutshuyaso dia monga la kandjema’?+ Sho hatooleki wolo, shi mɛtɛ?

23 Akambo tshɛ mbetawɔmaka, koko aha akambo tshɛ mbele la wahɔ. Akambo tshɛ mbetawɔmaka, koko aha akambo tshɛ mbakeketsha.+ 24 Onto l’onto atetemale nyanga wahɔ w’onto okina,+ koko aha wahɔ ande hita.

25 Nyole ɛngɔ tshɛ kasondjawɔ lo lobingu lasondjawɔ enatshi, aha la mboka ambola l’ɔtɛ wa nkum’otema kanyu, 26 nɛ dia “Jehowa* kakanga nkɛtɛ ndo ɛngɔ tshɛ kele lɔkɔ.”+ 27 Naka onto lele bu ombetawudi ambonyelɛ dia tɔlɛ yangɔ ko nyu nangaka ntshɔ, nyole kɛnɛ tshɛ kayondokitsha la ntondo kanyu aha la ndjaoka ambola wendana la nkum’otema kanyu. 28 Koko, naka onto ɔmɔtshi ambonyotɛ ate: “Ɔnɛ ekɔ ɛngɔ kakakimɔma oko olambo,” tanyokilɛke l’ɔtɛ w’onto lonyote ndo l’ɔtɛ wa nkum’otema.+ 29 Aha dia nkum’otema kayɛ mbatami, koko dia nkum’otema k’onto okina. Nɛ dia lande na kahomba lotshungɔ lami nomboshama oma le nkum’otema k’onto okina?+ 30 Naka dimi ndɛ yema yami la eokelo ka losaka, lande na kahomba anto ntɛkɛta kɔlɔ lo dikambo di’ɛngɔ kɛsɔ kokami losaka?+

31 Ɔnkɔnɛ, oyadi nyekɔ lo ndɛ, kana nyekɔ lo nnɔ, kana nyekɔ lo nsala dikambo dikina tshɛ, nyosale akambo tshɛ dia lotombo la Nzambi.+ 32 Nyewɔ dia monga otamba wa ntakanya le ase Juda, le ase Ngirika ndo le etshumanelo ka Nzambi,+ 33 oko wayangami dia ngɛnyangɛnya anto tshɛ lo akambo tshɛ, aha la nyanga wahɔ ami hita,+ koko wahɔ w’anto efula dia vɔ shimbamɛ.+