2 Nkumi ya dikanga

13 L’ɔnɔnyi wa 23 w’ɛlɔmbwɛlɔ ka Jɛhɔashi+ ɔna Ahaziya+ nkumekanga ka Juda, Jɛhɔahaza ɔna Jehu+ akayala nkumekanga k’Isariyɛlɛ oma la Samariya ndo nde akolɛ l’edja k’ɛnɔnyi 17. 2 Nde akatetemala nsala kɛnɛ kaki kɔlɔ lo washo wa Jehowa ndo akatshininala lo pɛkato kakakonya Jɛrɔbɔama ɔna Nebatɛ Isariyɛlɛ dia nsala.+ Nde kokitshika. 3 Ko nkɛlɛ ka Jehowa+ kadɔdɔ kakaye le ase Isariyɛlɛ+ ko nde akaakimɔ lo anya wa Hazaɛlɛ+ nkumekanga ka Suriya ndo lo anya wa Bɛnɛ-Hadada+ ɔna Hazaɛlɛ lo nshi yawɔ tshɛ.

4 L’etena kɛsɔ, Jɛhɔahaza akasɛngasɛnga* Jehowa dia nde mbooka kɛtshi ko Jehowa akoke ɔsɛngɔsɛngɔ ande, nɛ dia nde akɛnyi woho wakahɛnyahɛnyaka nkumekanga ka Suriya ase Isariyɛlɛ.+ 5 Ɔnkɔnɛ, Jehowa akasha Isariyɛlɛ oshimbedi+ dia mbatshungola oma lo anya w’ase Suriya, ko ase Isariyɛlɛ wakadjasɛ lo ngelo yawɔ oko wakiwɔ ntondo.* 6 (Koko vɔ kotshika pɛkato k’ase luudu la Jɛrɔbɔama kakandakonya Isariyɛlɛ dia nsala.+ Vɔ wakatetemala lo pɛkato* kakɔ ndo kimɛta ka l’osongo*+ kakatetemala memala la Samariya.) 7 Jɛhɔahaza akatshikala paka nde l’asɔlayi waki la ambahemi wa mfalasa 50, pusupusu 10 ndo asɔlayi wakɛndakɛnda l’ekolo nunu dikumi (10 000), nɛ dia nkumekanga ka Suriya akaadiake,+ akaahɔtshahɔtsha oko ditshu wonya w’esuswelo.+

8 Lo kɛnɛ kendana l’etenyi kekina k’ɔkɔndɔ wa Jɛhɔahaza, kɛnɛ tshɛ kakandasale ndo wolo ande, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 9 Oma laasɔ, Jɛhɔahaza aketama dia momuya kaamɛ la watshɛnde ndo wakookundɛ la Samariya,+ ko ɔnande Jɛhɔashi akayala nkumekanga lo dihole diande.

10 L’ɔnɔnyi wa 37 w’ɛlɔmbwɛlɔ ka Jɛhɔashi nkumekanga ka Juda, Jɛhɔashi+ ɔna Jɛhɔahaza akayala nkumekanga k’Isariyɛlɛ oma la Samariya ndo nde akolɛ l’edja k’ɛnɔnyi 16. 11 Nde akatetemala nsala kɛnɛ kaki kɔlɔ lo washo wa Jehowa ndo nde kotshika pɛkato tshɛ yakakonya Jɛrɔbɔama ɔna Nebatɛ Isariyɛlɛ dia nsala.+ Nde akatetemala* lo pɛkato shɔ.

12 Lo kɛnɛ kendana l’etenyi kekina k’ɔkɔndɔ wa Jɛhɔashi, kɛnɛ tshɛ kakandasale ndo wolo ande la woho wakandalɔsha Amaziya nkumekanga ka Juda,+ shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 13 Oma laasɔ, Jɛhɔashi aketama dia momuya kaamɛ la watshɛnde, ko Jɛrɔbɔama*+ akadjasɛ lo kiti kande ka lowandji. Jɛhɔashi akakundɛma la Samariya lale nkumi ya dikanga y’Isariyɛlɛ.+

14 Lam’akandama Elisha+ la hemɔ kakandayovɔka, Jɛhɔashi nkumekanga k’Isariyɛlɛ akaye le nde ndo akayoolela ate: “Papa lɛ, papa lɛ! Pusupusu k’Isariyɛlɛ ndo ambahemi ande wa mfalasa!”+ 15 Ko Elisha akawotɛ ate: “Ɔsa ota la mpito.” Ko nde akɔshi ota la mpito. 16 Oma laasɔ, nde akatɛ nkumekanga k’Isariyɛlɛ ate: “Dja lonya layɛ lo ota.” Ko nde akadje lonya lande lɔkɔ. L’ɔkɔngɔ wa laasɔ, Elisha akahɛ anya ande laadiko di’anya wa nkumekanga. 17 L’ɔkɔngɔ diko nde akate ate: “Dihola didishi otsha lo ɛstɛ.” Ko nde akadidihola. Elisha akate ate: “Tshieta!” Ko nde akatshieta. Oma laasɔ, nde akate ate: “Lohito la Jehowa l’otshumba,* lohito la mbidja ase Suriya otshumba!* Wɛ ayodiaka* ase Suriya lo Afɛkɛ+ polo wɛ mbashila oshiki.”

18 Nde akatetemala mbuta ate: “Ɔsa mpito,” ko nde akayiɔshi. Oma laasɔ, nde akatɛ nkumekanga k’Isariyɛlɛ ate: “Kɔmɔlayɔ la nkɛtɛ.” Ko nde akayikɔmɔla la nkɛtɛ mbala 3, ko akatshike. 19 Ko okambi wa Nzambi ka mɛtɛ akawomalɛ ndo akate ate: “Wɛ otɔkɔmɔla la nkɛtɛ mbala 5 kana 6! Laasɔ wɛ otodiaka ase Suriya polo ndo wɛ mbashila oshiki; koko wonya ɔnɛ, wɛ ayɔlɛndja ase Suriya paka mbala+ 3 tsho.”

20 L’ɔkɔngɔ wa laasɔ Elisha akavu, ko wakookundɛ. Elui wa dengalenga+ di’ase Mɔaba wakayaka lo wodja l’etatelo k’ɔnɔnyi.* 21 Etena kakakundɛka anto amɔtshi pami kɛmɔtshi, vɔ wakɛnyi olui wa dengalenga, ko wakokɛ pami kakɔ esadi esadi lo diombo diakakundɛma Elisha, ko wakalawɔ. Lam’akatosakana odo wa pami kakɔ la weka wa Elisha, nde akolɔ+ ko akemala.

22 L’etena kɛsɔ, Hazaɛlɛ+ nkumekanga ka Suriya akahɛnyahɛnyaka Isariyɛlɛ+ lo nshi tshɛ ya Jɛhɔahaza. 23 Koko Jehowa akawaoke kandji ndo kɛtshi,+ ko nde akayakiyanya dikambo diawɔ l’ɔtɛ wa sheke yakandadje la Abrahama,+ Isaka+ ndo Jakɔbɔ.+ Nde konanga mbalanya ndo nde kombakasha oma lalende polo ndo ɛlɔ. 24 Lam’akavu Hazaɛlɛ nkumekanga ka Suriya, ɔnande Bɛnɛ-Hadada akayala nkumekanga lo dihole diande. 25 Ko Jɛhɔashi ɔna Jɛhɔahaza akayɔsa oma le Bɛnɛ-Hadada ɔna Hazaɛlɛ esomba wakandɔshi lo ta oma le Jɛhɔahaza ya she. Jɛhɔashi akɔɔkɔmɔla*+ mbala 3 y’etondo, ko nde akɔshi nto esomba wa lo Isariyɛlɛ.