2 Ɛkɔndɔ

33 Manase+ aki l’ɛnɔnyi 12 lam’akandayala nkumekanga ndo nde akolɛ l’edja k’ɛnɔnyi 55 la Jɛrusalɛma.+

2 Nde akasalaka kɛnɛ kaki kɔlɔ lo washo wa Jehowa lo ndjela ditshelo dia wɔnɔnyi dia wedja wele Jehowa akawatshanya oma la ntondo k’ase Isariyɛlɛ.+ 3 Nde akayohika nto ahole wa la diko wakalanya Hɛzɛkiya wa she,+ nde akemɛ dilambwelo dikambo dia waa Baala ndo akasale dimɛta dia l’esongo,* akakusamɛ alembe tshɛ wa l’olongo ndo akaakambɛ.+ 4 Ndo nto, nde akasale dilambwelo lo luudu la Jehowa+ lele Jehowa akate lo dikambo dialɔ ate: “Lokombo lami layongaka la Jɛrusalɛma pondjo pondjo.”+ 5 Nde akasalɛ alembe tshɛ wa l’olongo dilambwelo lo asɛkɛ 2 wa luudu la Jehowa.+ 6 Nde akatshumbe anande w’apami lo dja+ lo Okidi w’Ɔna Hinɔmɛ;+ nde akasale awui wa maji,+ akasale diendja, akasale awui w’alɔka ndo akasɔnɛ wanɛ watɛkɛtsha dimu ndo waa wetshi.+ Nde akasale kɛnɛ kaki kɔlɔ lo washo wa Jehowa lo yɛdikɔ y’efula dia mbookiya nkɛlɛ.

7 Nde akadje ekishi kakandasale lo luudu la Nzambi+ ka mɛtɛ lele Nzambi akatɛ Davidɛ nde la ɔnande Sɔlɔmɔna lo dikambo dialɔ ate: “Dimi layodja lokombo lami pondjo lo luudu lɔnɛ ndo la Jɛrusalɛma, dihole diakamasɔnɛ l’atei wa waoho tshɛ w’Isariyɛlɛ.+ 8 Ndo dimi haminyaki nto pondjo ekolo w’ase Isariyɛlɛ oma lo wodja wakamasha watshɛwɔ naka vɔ nkitanyiya la yambalo tshɛ kɛnɛ tshɛ kakamawadjangɛ, Ɛlɛmbɛ tshɛ, wadjango ndo tɛdikɔ takamakimɔ lo tshimbo ya Mɔsɛ.” 9 Manase akatetemala minganyiya ase Juda l’ase Jɛrusalɛma lo mbakonya dia vɔ nsala kɔlɔ koleki ka wedja wele Jehowa akaashile oshiki oma la ntondo k’ase Isariyɛlɛ.+

10 Jehowa akatetemala nsawola la Manase ndo la wodja ande, koko vɔ kombidja yimba.+ 11 Ɔnkɔnɛ, Jehowa akaatomɛ ewandji w’asɔlayi wa nkumekanga k’Asuriya, ko wakayonda Manase la tɔkɔhɔ* ndo wakookeleka la mɔlɔla 2 wa nkonga, ko wakɔɔtɔlɛ la Babilɔna. 12 Lam’akinde lo shɔkɔ, nde akasɛngasɛnga Jehowa Nzambi kande dia nde mbooka kɛtshi* ndo akatetemala ndjakitshakitsha efula la ntondo ka Nzambi ka watshɛnde. 13 Nde akatetemala mbɔlɔmba, ko Nde akatshutshuyama la kɛtshi ndo akoke ɔsɛngɔsɛngɔ ande wa mbooka kɛtshi, ko Nde akookaloya la Jɛrusalɛma lo lowandji lande.+ Oma laasɔ, Manase akayeya dia Jehowa kele Nzambi ka mɛtɛ.+

14 L’ɔkɔngɔ wa laasɔ, nde akake ehele ka l’andja lo Osomba wa Davidɛ+ lo owɛstɛ wa Ngihɔna+ lo okidi polo ndo la Soko dia Nse,+ ko nde akatetemala kidinga polo la Ɔfɛlɛ,+ ndo nde akakidiya tanga di’efula. Laadiko dia laasɔ, nde akasɔnɛ ewandji w’asɔlayi lo esomba tshɛ wodingami la mpele wa la Juda. 15 Oma laasɔ, nde akanya tozambizambi ndo dikishi dia ase wedja ekina oma lo luudu la Jehowa+ ndo dilambwelo tshɛ diakandasale lo dikona dia luudu la Jehowa+ ndo la Jɛrusalɛma, ko nde akatokasha diangɔ sɔ l’andja w’osomba. 16 Ndo nto, nde akalɔngɔsɔla elambwelo ka Jehowa,+ ko akatatɛ nambola elambo w’osanga+ ndo elambo wa eokelo ka losaka+ lɔkɔ, ko nde akatɛ ase Juda dia vɔ kambɛ Jehowa Nzambi k’Isariyɛlɛ. 17 Kaanga mbakidiɔ ngasɔ, anto wakatetemalaka nambola elambo lo ahole wa la diko, koko paka le Jehowa Nzambi kawɔ.

18 Lo kɛnɛ kendana l’etenyi kekina k’ɔkɔndɔ wa Manase, dɔmbɛlɔ diakandalɔmbɛ Nzambi kande ndo ɛtɛkɛta w’amɛnyi wa waɛnɛlɔ wakatɛkɛta la nde lo lokombo la Jehowa Nzambi k’Isariyɛlɛ, awui asɔ fundama l’ɔkɔndɔ wa nkumi ya dikanga y’Isariyɛlɛ. 19 Ndo nto, dɔmbɛlɔ+ diande la woho wakawawosha kɛnɛ kakandalɔmbɛ, pɛkato yande tshɛ ndo woho wakinde komonga la kɔlamelo,+ lɛnɛ akandasale ahole wa la diko ndo lɛnɛ akandemɛ dimɛta dia l’esongo*+ ndo dikishi la ntondo ka nde ndjakitshakitsha, awui asɔ fundama l’atei w’ɛtɛkɛta w’amɛnyi wa waɛnɛlɔ. 20 Oma laasɔ, Manase aketama dia momuya kaamɛ la watshɛnde ndo wakookundɛ suke la luudu lande, ko ɔnande Amɔna akayala nkumekanga lo dihole diande.+

21 Amɔna+ aki l’ɛnɔnyi 22 lam’akandayala nkumekanga ndo nde akolɛ l’edja k’ɛnɔnyi 2 la Jɛrusalɛma.+ 22 Nde akatetemala nsala kɛnɛ kaki kɔlɔ lo washo wa Jehowa oko wakasale Manase+ ka she; Amɔna akalambola dikishi tshɛ diakasale Manase+ ka she elambo ndo nde akatetemala dikambɛ. 23 Koko nde kondjakitshakitsha la ntondo ka Jehowa+ oko wakayakitshakitsha Manase ka she;+ Amɔna akayafudiɛ onongo lo yɛdikɔ y’efula. 24 L’ekomelo, ekambi ande wakawɔtwɛ sheke,+ ko wakoodiake lo luudu lande hita. 25 Koko ase wodja wakadiake wanɛ tshɛ wakɔtwɛ nkumekanga Amɔna+ sheke, ko waketɛ ɔnande Jɔsiya+ nkumekanga lo dihole diande.