1 Ɛkɔndɔ

29 Nkumekanga Davidɛ akatɛ etshumanelo k’otondo ate: “Sɔlɔmɔna ɔnami, ɔnɛ lambɔsɔnama oma le Nzambi+ eke dikɛnda ndo atahokɔ akambo,*+ ko olimu wekɔ woke, nɛ dia aha tɛmpɛlɔ k’onto ketɔ, koko kaki Jehowa Nzambi.+ 2 Dimi lakadje welo efula dia nɔngɔsɔla diangɔ dikambo dia luudu la Nzambi kami, lakakimɔ paonyi dikambo di’olimu wa la paonyi, mfɛsa dikambo di’olimu wa la mfɛsa, nkonga dikambo di’olimu wa la nkonga, mbolo dikambo di’olimu wa la mbolo,+ abaya+ dikambo di’olimu wa l’abaya, mbɔkɔ ya ɔniksɛ, ndo mbɔkɔ yahomba mbidja lo nkɛtɛ ya lɔsɔha, tɔwɔkɔwɔkɔ dia nɛnga odihe, weho tshɛ wa mbɔkɔ y’oshinga wolo, ndo mbɔkɔ ya alabatrɛ lo yɛdikɔ y’efula. 3 Ndo nto, lam’ele dimi ngɛnangɛnaka luudu la Nzambi kami,+ lekɔ la paonyi ndo la mfɛsa+ lo eombelo kami yayangami nkimɔ dikambo dia luudu la Nzambi kami laadiko dia kɛnɛ tshɛ kakamalɔngɔsɔla dikambo dia luudu l’ekila, 4 mbidja ndo talata* nunu sato (3 000) ya paonyi k’oma la Ɔfira+ ndo talata nunu esambele (7 000) ya mfɛsa kambɛdiama dia nkomba mpele dia mvudu yakɔ, 5 paonyi dikambo di’olimu wa la paonyi ndo mfɛsa dikambo di’olimu wa la mfɛsa, ndo dikambo di’olimu tshɛ wahomba kambema oma le etshudi. Ko waa na wayakimɔ la lolango dia ntomba la ntondo ɛlɔ kaamɛ la woshasha awɔ lo anya dikambo dia Jehowa?”+

6 Ko ewandji wa mvudu ya washɛwɔ, ewandji wa waoho wa l’Isariyɛlɛ, ewandji w’anto nunu nunu ndo w’anto nkama nkama,+ ndo ewandji w’olimu wa nkumekanga+ wakatombe la lolango lawɔ. 7 Vɔ wakakimɔ diangɔ diayela nɛ dikambo di’olimu wa luudu la Nzambi ka mɛtɛ: Talata nunu tanu (5 000) ya paonyi, darika* nunu dikumi (10 000), talata nunu dikumi (10 000) ya mfɛsa, talata nunu dikumi l’enanɛi (18 000) ya nkonga, ndo talata nunu lokama (100 000) ya mbolo. 8 Onto tshɛ laki la mbɔkɔ y’oshinga wolo akayidje lo eombelo ka lo luudu la Jehowa, ndo Jɛhiyɛlɛ+ oseka Ngɛrɛshɔna+ kakalamaka. 9 Anto wakangɛnangɛna dia nkimɔ weshasha wa la lolango ɛsɔ, nɛ dia vɔ wakasha Jehowa weshasha wa la lolango ɛsɔ la otema ɔtɔi+ ndo nkumekanga Davidɛ nde lawɔ akangɛnangɛna efula.

10 Ko Davidɛ akatombola Jehowa la ntondo k’etshumanelo k’otondo. Davidɛ akate ate: “Jehowa Nzambi k’Isariyɛlɛ wa shɛso le, otombɔmake pondjo pondjo. 11 Jehowa le, wɛ kakanga woke,+ wolo,+ olangala, lotombo ndo lɔnɛnɛ,*+ nɛ dia ɛngɔ tshɛ kele l’olongo ndo la nkɛtɛ kayɛ mbetɔ.+ Jehowa le,+ wɛ kakanga diolelo. Wɛ katoyadiyaka laadiko dia tshɛ. 12 Ɔngɔnyi ndo lotombo ndja oma le yɛ+ ndo wɛ mbolɛ laadiko di’ɛngɔ tshɛ,+ ndo wolo+ la nkudu+ wekɔ lo lonya layɛ, ndo lonya layɛ mbele la akoka wa mbetɛ woke+ ndo mbisha ɛngɔ tshɛ wolo.+ 13 Ɔnkɔnɛ, Nzambi kaso le, tambokooka losaka ndo tekɔ lo ntombola lokombo layɛ la diambo.

14 “Ko, dimi eemi ndo wodja ami eewɔ katotonga la akoka wa nkimɔ woshasha wa la lolango wa nganɛ? Nɛ dia diangɔ tshɛ ndja oma le yɛ ndo tambokosha kɛnɛ koye oma lo anya ayɛ. 15 Dikambo sho tekɔ angɛndangɛnda ndo ambetshi a mboka la ntondo kayɛ, oko watshɛso tshɛ.+ Nɛ dia nshi yaso la nkɛtɛ yekɔ oko dɛdi,+ mbuta ate aha la elongamelo. 16 Jehowa Nzambi kaso le, diangɔ di’efula nɛ tshɛ diambotɔlɔngɔsɔla dia kokɛ luudu dikambo dia lokombo layɛ l’ekila diakaye oma lo anya ayɛ ndo diɔ tshɛ diayɛ mbediɔ. 17 Nzambi kami le, dimi mbeyaka dimɛna dia wɛ sɛdingolaka otema+ ndo dia wɛ tɔngɛnangɛnaka onto lele la olowanyi.*+ La otema wosembwe* kamomokimɔ diangɔ nɛ tshɛ la lolango ndo lekɔ la ɔngɛnɔngɛnɔ efula dia mɛna woho wambokosha wodja ayɛ wemadi lanɛ weshasha wa la lolango. 18 Jehowa Nzambi ka watshɛso Abrahama, Isaka ndo Isariyɛlɛ le, olame nsaki ya lo tokanyi ndo ya l’etema wa wodja ayɛ ɔnɛ pondjo pondjo ndo ɔlɔmbɔlɛ etema awɔ oya le yɛ.+ 19 Osha ɔnami Sɔlɔmɔna otema wa ndjasha tshɛ lo tshɛ*+ dia nde nkitanyiya ɛlɛmbɛ ayɛ,+ waohwelo ayɛ ndo wadjango ayɛ dia nde nsala akambo asɔ tshɛ ndo mbika tɛmpɛlɔ kakamalɔngɔsɔla+ diangɔ dikambo diatɔ.”

20 Oma laasɔ, Davidɛ akatɛ etshumanelo k’otondo ate: “Nyotombole Jehowa Nzambi kanyu.” Ko etshumanelo k’otondo wakatombola Jehowa Nzambi ka watshɛwɔ, wakakɔlamɛ ndo wakakusamɛ Jehowa nde la nkumekanga. 21 Vɔ wakatetemala nambola Jehowa elambo ndo tshumbɛ Jehowa elambo wa lotshumba+ lushi lakayele, ɛsɔngɔ wa ngɔmbɛ ya waomi kinunu (1 000), ɛkɔkɔ wa waomi kinunu (1 000), ɛsɔngɔ w’ɛkɔkɔ wa waomi kinunu (1 000) kaamɛ la elambo awɔ wa lotɛ.+ Vɔ wakalambola elambo efula ka mamba dikambo dia Isariyɛlɛ w’otondo.+ 22 Vɔ wakatetemala ndɛ la nnɔ la ntondo ka Jehowa lushi lɔsɔ, wele la ɔngɛnɔngɛnɔ w’efula,+ ndo vɔ waketɛ Sɔlɔmɔna ɔna Davidɛ nkumekanga mbala ka 2 ndo wakookite esɔ la ntondo ka Jehowa oko ɔnɔmbɔdi,+ kaamɛ ndo Zadɔka oko ɔlɔmbɛdi.+ 23 Ko Sɔlɔmɔna akadjasɛ lo kiti ka lowandji ka Jehowa+ oko nkumekanga lo dihole dia Davidɛ she, ndo nde akatondoyaka ndo ase Isariyɛlɛ tshɛ wakookitanyiyaka. 24 Ewandji tshɛ,+ andɔshi wa ta wa wolo,+ ndo ana w’apami wa nkumekanga Davidɛ+ tshɛ wakayakitshakitsha l’ɛse ka nkumekanga Sɔlɔmɔna. 25 Jehowa aketɛ Sɔlɔmɔna woke lo yɛdikɔ y’efula la ntondo k’ase Isariyɛlɛ tshɛ, ndo akawosha lɔnɛnɛ la lowandji woho wele ndooko nkumekanga kaki oko nde lo Isariyɛlɛ la ntondo kande.+

26 Ɔnkɔnɛ, Davidɛ ɔna Jɛse akolɛ Isariyɛlɛ w’otondo, 27 ndo nde akolɛ Isariyɛlɛ l’edja k’ɛnɔnyi 40. Nde akolɛ l’edja k’ɛnɔnyi 7+ la Hɛbɛrɔna ndo l’edja k’ɛnɔnyi 33+ la Jɛrusalɛma. 28 Nde akavu aya osombe wa lokosombe,+ ambondoya andja,* ele ɔngɔnyi ndo ele la lotombo. Ko ɔnande Sɔlɔmɔna akayala nkumekanga lo dihole diande.+ 29 Lo kɛnɛ kendana l’ɔkɔndɔ wa nkumekanga Davidɛ, oma l’etatelo polo l’ekomelo kawɔ, awui asɔ fundama kaamɛ la ɛtɛkɛta wa Samuɛlɛ ɔmɛnyi w’akambo woshɛmi, wa omvutshi Natana+ ndo wa Ngada+ ɔmɛnyi wa waɛnɛlɔ, 30 kaamɛ ndo lowandji lande tshɛ, wolo ande ndo akambo wakasalema lo nshi yande, lo Isariyɛlɛ ndo lo waolelo tshɛ wakoodinge.