Rɔmɔ
7 Analengo le, onde nyu hanyeye (nɛ dia wanɛ weya ɛlɛmbɛ mbatɛmi) dia Ɛlɛmbɛ mbahemɛka onto edja tshɛ kende la lɔsɛnɔ? 2 Ɛnyɛlɔ, womoto lotshukami kelekama lo ɛlɛmbɛ w’omɛnde etena keke omɛnde la lɔsɛnɔ. Koko naka omɛnde ambovɔ, kete nde ambotshungɔ oma lo ɛlɛmbɛ w’omɛnde.+ 3 Ɔnkɔnɛ, etena keke omɛnde la lɔsɛnɔ, naka nde ntshukama le pami kekina,+ kete nde aya kanga loseka. Ko naka omɛnde ambovɔ, kete nde ambotshungɔ oma lo ɛlɛmbɛ w’omɛnde ndo naka nde ntshukana la pami kekina,+ nde keema kanga loseka.
4 Ɔnkɔnɛ analengo, nyu lawɔ nyakayala anto wambovɔ lo Ɛlɛmbɛ lo tshimbo ya demba dia Kristo dia nyu monga anto w’onto okina,+ ɔnɛ lakolɔ oma lo nyɔi,+ dia sho twɛ Nzambi+ elowa. 5 Nɛ dia lam’akatasɛnaka lo ndjela demba, nsaki ya pɛkato yakatshutshuyamaka oma lo Ɛlɛmbɛ yakakambaka olimu lo alemba* aso dia ntɔ elowa dikambo dia nyɔi.+ 6 Koko kakianɛ, sho tambotshungɔ oma lo Ɛlɛmbɛ,+ nɛ dia sho tambovɔ lo kɛnɛ kakatakelekama wolo dia sho monga ɛhɔmbɔ lo yoho y’oyoyo oma le nyuma,+ koko aha lo yoho y’edjedja oma lo Ɛlɛmbɛ.+
7 Ko ayotota na? Onde Ɛlɛmbɛ wekɔ pɛkato? Ndooko! Lo mɛtɛ, totomeya pɛkato otondongaka Ɛlɛmbɛ+ keema. Ɛnyɛlɔ, totomeya ɔkɔmiya otondongaka Ɛlɛmbɛ hawote ɔnɛ: “Tɔkɔmiyake.”+ 8 Koko lam’ele pɛkato kakatane diaaso lo tshimbo y’ɛlɛmbɛ, tɔ kambotondja weho tshɛ w’ɔkɔmiya le mi, nɛ dia otondongaka ɛlɛmbɛ keema, tshike pɛkato kambovɔka.+ 9 Lo mɛtɛ, dimi lakasɛnaka ntondo aha la ɛlɛmbɛ. Koko lam’akayoyaka ɛlɛmbɛ, pɛkato kakayala la lɔsɛnɔ nto, koko dimi lakavu.+ 10 Ndo ɛlɛmbɛ wakahombe nkonya lo lɔsɛnɔ,+ dimi lakɛnyi dia vɔ wakakonya lo nyɔi. 11 Nɛ dia pɛkato kakatane diaaso oma lo ɛlɛmbɛ kakankese ndo kakandjake lo tshimbo yawɔ. 12 Ɔnkɔnɛ, Ɛlɛmbɛ vɔamɛ wekɔ ekila ndo wadjango wekɔ ekila, esembɔki ndo ɔlɔlɔ.+
13 Ko onde kɛnɛ kele ɔlɔlɔ kakankonya lo nyɔi? Ndooko! Koko pɛkato kakankonya lo nyɔi, dia mɛnama oko pɛkato kakambela nyɔi lo tshimbo ya kɛnɛ kele ɔlɔlɔ,+ dia lo tshimbo y’ɛlɛmbɛ, ɛname dia pɛkato kekɔ kɔlɔ efula.+ 14 Dikambo sho mbeyaka dia Ɛlɛmbɛ wekɔ lo nyuma, koko dimi lekɔ onto la lo demba lakasondjama lo pɛkato.+ 15 Nɛ dia dimi haashihodia kɛnɛ kasalami. Dikambo dimi halosale kɛnɛ kakombolami, koko dimi salaka kɛnɛ kahetshami. 16 Ko naka dimi nsala kɛnɛ kahamakombola, kete dimi lambosuya dia Ɛlɛmbɛ wekɔ ɔlɔlɔ. 17 Koko aha dimi katetemala nsala akambo akɔ, pɛkato kele le mi+ kawasala. 18 Nɛ dia dimi mbeyaka dia l’etei kami, mbuta ate lo demba diami, ndooko ɛngɔ k’ɔlɔlɔ kele lɔkɔ dikambo lekɔ la nsaki ka nsala kɛnɛ kele ɔlɔlɔ, koko dimi bu la dikoka dia kisala.+ 19 Nɛ dia dimi haasale ɔlɔlɔ wakombolami nsala, koko kɔlɔ kahamakombola nsala kasalami. 20 Ko naka dimi nsala kɛnɛ kahamakombola nsala, kete aha dimi katetemala kisala, koko pɛkato kodjashi le mi.
21 Ɔnkɔnɛ, dimi lambotana ɔlɛmbɛ ɔnɛ le mi: Lam’akombolami nsala kɛnɛ kele ɔlɔlɔ, kɛnɛ kele kɔlɔ kekɔ le mi.+ 22 Dimi mɛtɛ ngɛnangɛnaka ɛlɛmbɛ wa Nzambi lo ndjela woho w’onto wemi l’etei,+ 23 koko dimi mɛnaka ɔlɛmbɛ okina wele l’etei ka demba diami walɔshana la ɔlɛmbɛ wele lo yimba yami+ ndo wambetɛ mfumbe ka ɔlɛmbɛ wa pɛkato+ wele l’etei ka demba* diami. 24 Ose paa ko onto emi! Onto akɔna ayontshungola oma lo demba nɛ diayonkonya lo nyɔi? 25 Nzambi losaka lo tshimbo ya Yeso Kristo Nkumɛso! Ɔnkɔnɛ lo yimba yami, dimi lekɔ mfumbe ka ɛlɛmbɛ wa Nzambi, koko lo demba diami, mfumbe ka ɔlɛmbɛ wa pɛkato.+