1 Samuɛlɛ
16 L’ekomelo, Jehowa akayotɛka Samuɛlɛ ate: “Polo l’etena kakɔna kayoyotetemala ndela Saolo+ lam’ele dimi lambootona dia nde ntetemala monga nkumekanga k’Isariyɛlɛ?+ Lodia esɔ+ lo loseke layɛ kele tshɔka. Dimi layanga kotoma le Jɛse+ ose Bɛtɛlɛhɛma, nɛ dia lamboyasɔnɛ+ ɔnande ɔmɔtshi la pami dia nde monga nkumekanga.” 2 Koko Samuɛlɛ akate ate: “Ngande wayomokoka ntshɔ? Lam’ayoka Saolo dikambo sɔ, nde ayondjaka.”+ Jehowa akakadimola ate: “Ɔsa ɔsɔngɔ wa ngɔmbɛ kele tshɔka la wɔ ndo tote wate: ‘Lamboya ndjolambola Jehowa olambo.’ 3 Ko wɛ mbelɛ Jɛse lo olambo akɔ ndo dimi layokewoya kɛnɛ kahombayɛ nsala. Ɔnɛ layomokɛnya kahombayɛ+ kitɛminde esɔ.”
4 Samuɛlɛ akasale kɛnɛ kakawotɛ Jehowa. Lam’akandakome la Bɛtɛlɛhɛma,+ dikumanyi dia l’osomba wakasake lokomba lam’akawahomana la nde ko wakate vate: “Onde lo ki kamboyoya?” 5 Ko nde akate ate: “Eelo, lo ki. Dimi lamboya dia ndjolambola Jehowa olambo. Nyoyakidia kele nyoye le mi lo olambo.” Ko nde akakidia Jɛse l’anande w’apami ndo l’ɔkɔngɔ wa laasɔ, nde akaatshumanya lo olambo. 6 Etena kakawɔtɔ ndo lam’akandɛnyi Eliyabɛ,+ nde akate ate: “Ndooko onyake okitami w’esɔ waki Jehowa nde ɔnɛ ambemala lanɛ la ntondo kande.” 7 Koko Jehowa akatɛ Samuɛlɛ ate: “Todjake yimba lo ɛnamelo kande ndo lo diema diande,+ nɛ dia dimi lambootona. Dikambo woho wɛna onto akambo ntshikitana la woho wɛna Nzambi, nɛ dia onto k’onto mɛnaka ɛnamelo ka lo washo, koko Jehowa mɛnaka l’etei k’otema.”+ 8 Oma laasɔ, Jɛse akelɛ Abinadaba+ ndo akawetsha la ntondo ka Samuɛlɛ, koko nde akate ate: “Jehowa hasɔnyi ndo ɔnɛ.” 9 L’ɔkɔngɔ wa laasɔ, Jɛse akawɛnya Shama,+ koko nde akate ate: “Jehowa hasɔnyi ndo ɔnɛ.” 10 Jɛse aketsha anande w’apami 7 la ntondo ka Samuɛlɛ, koko Samuɛlɛ akatɛ Jɛse ate: “Jehowa hasɔnyi ndooko 1 l’atei awɔ.”
11 L’ekomelo, Samuɛlɛ akambola Jɛse ate: “Anayɛ w’apami tshɛ kɛnɛ?” Ko nde akookadimola ate: “Ambotshikala la kose+ lele bu laawɔ; wonya ɔnɛ nde ekɔ lo talame ɛkɔkɔ.”+ Ko Samuɛlɛ akatɛ Jɛse ate: “Toma onto atowɔshi, nɛ dia hatotodjasɛ dia ndɛ paka nde amboya lanɛ.” 12 Ɔnkɔnɛ nde akatome onto dia towɔsa, ko wakatoya la nde. Lokoho lande la demba laki beela, washo ande waki amɛna ndo nde aki la ɛnamelo+ k’olangala efula. Ko Jehowa akate ate: “Emala, kitande esɔ, nɛ dia nde ongo!”+ 13 Ko Samuɛlɛ akɔshi loseke l’esɔ ndo akookite esɔ+ la ntondo k’anango. Nyuma ka Jehowa kakatatɛ mbisha Davidɛ wolo ntatɛ oma ko lushi lɔsɔ.+ L’ɔkɔngɔ diko, Samuɛlɛ akonɛɛ ko akatshu otsha la Rama.+
14 L’etena kɛsɔ, nyuma ka Jehowa kakamɔ oma le Saolo,+ ko nyuma ka kɔlɔ* k’oma le Jehowa kakawokiyaka+ wɔma. 15 Ekambi waki Saolo wakawotɛ vate: “Wɛ mɛnaka dia nyuma ka kɔlɔ k’oma le Nzambi kekɔ lo kokiya wɔma. 16 Nkumɛso le, lam’alangayɛ, djangɛ ekambi ayɛ dia vɔ nyanga pami kɛmɔtshi keya mpoma lɔsɛsɛ+ dimɛna, kele etena tshɛ kayoyaka nyuma ka kɔlɔ k’oma le Nzambi le yɛ, nde kalihomake, ko wɛ ayoyaokaka dimɛna.” 17 Ko Saolo akatɛ ekambi ande ate: “Lam’alanganyu, nyonyange pami kɛmɔtshi kahoma dimɛna, kele nyombelande.”
18 Okambi ɔmɔtshi akate ate: “Dimi lakɛnyi ɔna Jɛse ose Bɛtɛlɛhɛma ɔmɔtshi ahoma la diewo tshɛ ndo nde ekɔ ɔndɔshi wa ta+ wa dihonga ndo wa wolo. Nde tɛkɛtaka dimɛna, ekɔ olangala+ ndo Jehowa ekɔ kaamɛ la nde.”+ 19 Ko Saolo akatome akɛndji otsha le Jɛse dia towotɛ ɔnɛ: “Ontome Davidɛ, ɔnayɛ lalama ɛkɔkɔ.”+ 20 Ko Jɛse akahɛ mapa, ɔlɔndɔ wa dikoho waki la wanu ndo ɔsɔngɔ wa mbudi laadiko dia mponda, ko akatomɛ Saolo kaamɛ la ɔnande Davidɛ. 21 Davidɛ akakome le Saolo ko akatatɛ mbokambɛ.+ Saolo akoolangaka efula ndo nde akayonga ɔmɛmbi ande wa dihomɔ dia ta. 22 Saolo akatome dikɛndji le Jɛse dia towotɛ ɔnɛ: “Lam’alangayɛ, etawɔ dia Davidɛ ntshikala dia kambɛkami, nɛ dia nde ambohomɔ lokolo l’ɔlɔ lo washo ami.” 23 Etena tshɛ kakayaka nyuma ka kɔlɔ k’oma le Nzambi le Saolo, Davidɛ akɔsaka lɔsɛsɛ ndo akoohomɛka, ko Saolo akangɛnangɛnaka ndo akayaokaka dimɛna, ko nyuma ka kɔlɔ kakamɔka oma le nde.+