2 Petero
3 Analengo wa ngandji le, ɔnɛ ekɔ mukanda wa 2 wamomonyofundɛ wele, oko mukanda ami wa ntondo, lekɔ lo mpɛtshahɛtsha akoka anyu w’ekanelo ka yimba lo nyohola,+ 2 dia nyu pombaka mbohɔka akambo wakatama ntondo* oma le amvutshi w’ekila ndo didjango dia Nkumadiɔndjɔ ndo Oshimbedi lo tshimbo y’apɔstɔlɔ anyu. 3 Ntondotondo, nyeye dia lo nshi y’ekomelo, asɔkanyi wayoya la lɔsɔkɔ lawɔ, wayosala akambo lo ndjela nsaki+ yawɔ hita 4 ndo wayota vate: “Lende ele woongelo ande+ wakalakema? Nɛ dia ntatɛ lo lushi lakalale watshɛso djɔ lo nyɔi, diangɔ tshɛ diekɔ paka woho wokodiongaka oma k’etongelo+ k’andja.”
5 Nɛ dia la okonda tshɛ vɔ mbohɛka dia ntatɛ deko aha nɛ, olongo wakikɔ ndo nkɛtɛ y’ofumbo yakatombe oma l’ashi ndo yakashikikɛma wolo l’atei w’ashi oma l’ɔtɛkɛta wa Nzambi,+ 6 ndo oma l’ekimanyielo kawɔ mbakalanyema andja wa lo nshi shɔ lam’akalɔ Mvula k’elola+ la nkɛtɛ. 7 Koko, la ɔtɛkɛta akɔ waamɛ mbambolamema olongo ndo nkɛtɛ yele kakianɛ dia tshumbama la dja ndo wambolamema polo lushi la kilombo ndo l’elanyelo k’anto wa kɔlɔ.+
8 Koko analengo wa ngandji le, tanyohɛke dia lushi 1 lekɔ oko ɛnɔnyi kinunu (1 000) lo washo wa Jehowa* ndo ɛnɔnyi kinunu (1 000) wekɔ oko lushi 1.+ 9 Jehowa* hatshimbatshimba dia nkotsha daka+ diande oko wafɔnya anto amɔtshi dia nde ekɔ lo ntshimbatshimba, koko nde ekɔ la solo dia lotutsha otsha le nyu, nɛ dia nde halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.+ 10 Koko lushi+ la Jehowa* layoya oko wovi.+ Lo lushi lakɔ, olongo wayeta+ la londjo la wolo,* koko diangɔ diayololɔ la dja ya wolo diayɔlɛlɔ ndo nkɛtɛ la diangɔ diele lɔkɔ diayotomba sɛkɛ.+
11 Lam’ele diangɔ sɔ tshɛ diayɔlɛlɔ lo yoho shɔ, nyokanyiya weho w’anto wahombanyu monga lo etsha wa lɔkɛwɔ l’ekila ndo lo ditshelo diɛnya omamemelo le Nzambi, 12 etena kakonganyu ndo kalamanyu lo yimba* woongelo wa lushi la Jehowa*+ lele olongo wayolanyema+ lo nyombe ya dja ndo lele diangɔ diayɔlɛlɔ la dja ya wolo! 13 Koko lo ndjela daka+ diande, sho tekɔ lo nkonga olongo w’oyoyo ndo nkɛtɛ k’oyoyo, lɛnɛ ayongaka+ losembwe.
14 Ɔnkɔnɛ analengo wa ngandji le, lam’ele nyekɔ lo nkonga akambo asɔ, nyosale kɛnɛ tshɛ kakokanyu nsala, dia l’ekomelo nyu ndjotanema la ntondo kande aha la vadi ndo aha la ɛkɔmɔ ndo lo wɔladi.+ 15 Ndo nto, nyɔshi solo dia lotutsha dia Nkumɛso oko panda, oko wakanyofundɛ ndo Pɔɔlɔ ɔnangɛso la ngandji lo ndjela lomba lakandalongola,+ 16 atɛkɛta di’akambo asɔ oko wakandatɛkɛta lo mikanda ande tshɛ. Koko akambo amɔtshi wele lɔkɔ wekɔ wolo nshihodia ndo akambo akɔ mbengesola anto waheye* ndo wahashikimala, oko wengesolawɔ Afundelo akina tshɛ dia elanyelo kawɔ vɔamɛ.
17 Ɔnkɔnɛ, nyu analengo wa ngandji, lam’ele nyamboteyi akambo asɔ la ntondo, nyoyalame diaha nyu minganyiyama kaamɛ la wɔ oma lo munga kasala amɔnyɔdi w’ɛlɛmbɛ ko nyu ndjoshisha eshikikalelo kanyu ka nge.+ 18 Koko, nyotetemale nongola ɔlɔlɔ waheyama mbɛdika ndo ewo ka Nkumɛso ndo Oshimbedi aso Yeso Kristo. Lotombo layale le nde kakianɛ ndo pondjo pondjo! Aamɛɛ.