Hɔsɛya
10 “Isariyɛlɛ ekɔ ɔkɔdi wa vinyɔ wasandjɔnɛ* watɔsha elowa+ awɔ.
Lo yɛdikɔ yafulanɛ elowa ande, mbafudiande dilambwelo+ diande;
Lo yɛdikɔ yangɔnya wodja ande diangɔ di’amɛna, mbaleka dimɛta+ diande dia l’ave monga elangala.
2 Vɔ wekɔ akanga wa dungi pende;*
Wonya ɔnɛ vɔ wayanga ntanema la onongo.
Onto ɔmɔtshi ekɔ layohandjola dilambwelo diawɔ ndo layolanya dimɛta diawɔ dia l’ave.
3 Vɔ wayanga mbuta vate: ‘Sho bu la nkumekanga,+ nɛ dia sho komboka Jehowa wɔma.
Ndo kakɔna kakoka nkumekanga tosalɛ?’
4 Vɔ tondjaka ɛtɛkɛta w’anyanya, tshibaka lo kashi+ ndo mbidjaka toseke;
Ɔnkɔnɛ, kilombo kasalema kekɔ oko adiyo wa lɔlɛngɔ lo emunda wa l’ekambɔ.+
5 Wanɛ wadjasɛ la Samariya wayoka ekishi ka ngɔmbɛ ka Bɛtɛ-Avɛna+ wɔma.
Anto atɔ wayosala otanda lo dikambo diatɔ,
Oko wayosala amvutshi wa jambizambi y’angɛndangɛnda wangɛnangɛna l’ɔtɛ atɔ ndo l’ɔtɛ wa lotombo la tɔ,
Nɛ dia tɔ kayomɔ oma le wɔ otsha lo lɔhɔmbɔ.
6 Tɔ kayɔtɔlama l’Asuriya oko woshasha le nkumekanga+ ka woke.
Efrayimɛ ayoshama nsɔnyi,
Ndo Isariyɛlɛ ayoshama nsɔnyi l’ɔtɛ wakandayele+ dako diatɔ.
7 Samariya la nkumekanga katɔ wayoshishɔ ndooko onyake,*+
Oko tshenyi ya shongo yatakɛlɛ laadiko di’ashi.
8 Ahole wa la diko wa la Bɛtɛ-Avɛna,+ pɛkato k’Isariyɛlɛ,+ wayolanyema.+
Atɛndɛ ndo ahangola nkɔi wayotomba lo dilambwelo+ diawɔ.
Anto wayotɛ akona vate: ‘Nyotofe!’
Ndo tokonakona vate: ‘Nyotokongotwe!’+
9 Isariyɛlɛ le, wɛ akasale pɛkato+ oma ko nshi ya Ngibɛa.
Lɛkɔ mbakawalanyema.
Ta kokoma* le ana w’anto wa kɔlɔ la Ngibɛa.
10 Ndo nto, dimi layowasha dilanya etena kalangami.
Ndo wedja wayosangana dia mbalɔsha,
Lam’ayokelekama munga yawɔ 2 le wɔ.*
11 Efrayimɛ aki ɔsɔngɔ wa ngɔmbɛ ka wadi waketshama wakalangaka nsusola,
Ɔnkɔnɛ, dimi lakakokɛ nkingo kande k’olangala.
Kakianɛ, dimi layosala di’onto ɔmɔtshi nkɛndjakɛndja* Efrayimɛ.+
Juda ayofusa; Jakɔbɔ ayowɔlɔngɔsɔlɛ nkɛtɛ.
12 Nyoyaonee woho lo losembwe kele kanyone ngandji ka kɔlamelo.
Nyoyafusee nkɛtɛ+ ya dimɛna
Lam’eke etena ka nyanga Jehowa,+
Polo lam’ayondoya ndjonyetsha lo losembwe.+
13 Koko nyu nyakafuse kɔlɔ,
Nyu nyakane kɔlɔ,+
Ndo nyambɔlɛ elowa wa lokeso;
Nɛ dia wɛ amboyaɛkɛ lo mboka kayɛ hita,
Lo efula k’andɔshi ayɛ wa ta.
14 Lofunguso layotomba dikambo di’anto ayɛ,
Ndo esomba ayɛ wodingami la mpele wayolanyema,+
Oko elanyelo k’oma le Shalamana ka lo luudu la Arɛbɛlɛ,
Lushi la ta, etena kakaatshatshema ambutshi wa wamato lale anawɔ.
15 Bɛtɛlɛ le,+ kɛsɔ mbayowokosalɛ l’ɔtɛ wa kɔlɔ kayɛ k’efula.