Ɛzɛkiyɛlɛ
29 Lo ɔnɔnyi wa 10 lo ngɔndɔ ka 10 nshi 12, ɔtɛkɛta wa Jehowa wakaye le mi ɔnɛ: 2 “Ɔna onto, kadimola elungi kayɛ otsha le Farawɔ nkumekanga ka Edjibito ndo ta prɔfɛsiya lo dikambo diande ndo lo dikambo dia Edjibito+ w’otondo. 3 Ta ɛtɛkɛta ɛnɛ: ‘Nkum’Olongo Nkumadiɔndjɔ Jehowa kata ate:
“Dimi layanga kɔlɔsha wɛ Farawɔ nkumekanga ka Edjibito,+
Wɛ shimamba ka woke ketami l’atei wa ɛkɛdi wa Nilɛ*+ kande,
Lakate wate: ‘Ɔkɛdi ami wa Nilɛ wekɔ wakimi.
Dimi lakoosale dikambo diami dimɛ.’+
4 Koko dimi layokodja tɔdi lo manga yayɛ ndo layosala dia nse ya lo Nilɛ kayɛ kakatɛ lo mposo yayɛ.
Dimi layokotondja oma lo Nilɛ kayɛ kaamɛ la nse tshɛ ya lo Nilɛ yokakate lo mposo yayɛ.
5 Dimi layokokalɛ lo oswe wa shɛnga, wɛ la nse tshɛ ya lo Nilɛ kayɛ.
Wɛ ayɔkɔ lo oswe wa bwe ndo wɛ hatɔtɔngɔnama kana sanganyema kaamɛ.+
Dimi layokokimɔ oko mbo ya ndɛ le nyama ya ngala ya la nkɛtɛ ndo le tofudu ta l’olongo.+
6 Ko ase Edjibito tshɛ wayohomba mbeya dia dimi kele Jehowa,
Nɛ dia vɔ komonga nto osukɔ le luudu la Isariyɛlɛ oleki tshenyi ya diyo.*+
7 Etena kakawakimɛ lonya layɛ, wɛ akaatshatshema,
Ndo akaakonya dia vɔ mbatshatsha ahɛka awɔ.
8 “‘Diakɔ diata Nkum’Olongo Nkumadiɔndjɔ Jehowa ate: “Dimi layanga mbela lokuwa la ta le yɛ+ ndo dimi layodiaka oma le yɛ oyadi onto kana nyama. 9 Wodja wa Edjibito wayotshikala tɔngɔ to ndo dihole diambolanyema;+ ko vɔ wayohomba mbeya dia dimi kele Jehowa, nɛ dia wɛ* akate wate: ‘Ɔkɛdi wa Nilɛ wekɔ wami; dimi mbakosale.’+ 10 Ɔnkɔnɛ, dimi layanga kɔlɔsha ndo layanga ndɔsha Nilɛ kayɛ ndo dimi layohandjola wodja wa Edjibito ndo layowoonya to, layowetɛ tɔngɔ to,+ oma la Mingidɔlɛ+ polo la Siyɛnɛ+ polo ndo l’olelo wa Etiyɔpiya. 11 Ndooko onto kana elongalonga kayeta lɔkɔ la ekolo+ ndo anto hawotodjasɛ lɔkɔ l’edja ka ɛnɔnyi 40. 12 Dimi layetɛ wodja wa Edjibito tɔngɔ to oleki wedja ekina ndo esomba awɔ tɔngɔ to oleki esomba ekina l’edja ka ɛnɔnyi 40;+ ndo dimi layohandjola ase Edjibito l’atei wa wedja ndo layowadianganya l’atei wa wedja.”+
13 “‘Nɛ dia Nkum’Olongo Nkumadiɔndjɔ Jehowa kata ate: “L’ɔkɔngɔ wa ɛnɔnyi 40, dimi layokaloya ase Edjibito oma le anto wa lɛnɛ akawahandjɔ;+ 14 dimi layokaloya mfumbe ya ase Edjibito lo wodja wa Patɛrɔsɛ,+ lo wodja awɔ wa lootɔ ndo lɛkɔ vɔ wayonga diolelo dia tshitshɛ. 15 Edjibito ayonga l’ɛse ka waolelo akina ndo vɔ hawotolɛ wedja+ ekina nto, ndo dimi layowetɛ tshitshɛ lo woho wele vɔ hawotonga la akoka wa mbahemɛ wedja ekina.+ 16 Vɔ hawotonga nto kiɔkɔ ya wɛkamu le luudu la Isariyɛlɛ,+ koko vɔ wayowaoholaka tsho munga yawɔ lo woho wakawakadimɔ dia nyanga ekimanyielo le ase Edjibito. Ko vɔ wayohomba mbeya dia dimi kele Nkum’Olongo Nkumadiɔndjɔ Jehowa.”’”
17 Lo ɔnɔnyi wa 27, ngɔndɔ ka ntondo lushi 1, ɔtɛkɛta wa Jehowa wakaye le mi nto ɔnɛ: 18 “Ɔna onto, Nɛbukadinɛza*+ nkumekanga ka Babilɔna akasale dia asɔlayi ande nkamba olimu wa wolo dia ndɔsha Tura.+ Ɛtɛ tshɛ wakayala awandji ndo ahɛka tshɛ waki posohoso tsho. Koko nde la asɔlayi ande konongola ndooko difuto l’ɔtɛ wa olimu wa wolo wakandakambe la Tura.
19 “Diakɔ diata Nkum’Olongo Nkumadiɔndjɔ Jehowa ate: ‘Dimi layanga nkimɔ wodja wa Edjibito le Nɛbukadinɛza* nkumekanga ka Babilɔna+ ndo nde ayɔsa ɔngɔnyi awɔ ndo ayɔsa diangɔ dia dimbo efula ndo ayɔsa diangɔ oma lɔkɔ; ko vɔ wayonga difuto dia asɔlayi ande.’
20 “‘Oko difuto dia olimu ande wa wolo otsha le wɔ,* dimi layowosha wodja wa Edjibito nɛ dia vɔ wakasale akambo l’ɔtɛ ami,’+ mbata Nkum’Olongo Nkumadiɔndjɔ Jehowa.
21 “Lushi lɔsɔ, dimi layotondja loseke dikambo dia luudu la Isariyɛlɛ*+ ndo dimi layokosha diaaso dia ntɛkɛta l’atei awɔ; ko vɔ wayohomba mbeya dia dimi kele Jehowa.”