Isaya

39 L’etena kɛsɔ, Berɔdaka-Balada ɔna Balada, nkumekanga ka Babilɔna akatomɛ Hɛzɛkiya+ mikanda la woshasha, nɛ dia nde akoke dia Hɛzɛkiya laki la hemɔ akakɔnɔ.+ 2 Hɛzɛkiya akaalongola l’ɔngɛnɔngɛnɔ* ndo akawaɛnya luudu lande la waombelo,+ mbuta ate mfɛsa, paonyi, esɔ ka balasama ndo esɔ kekina k’oshinga wolo, dihomɔ diande dia ta tshɛ ndo diangɔ tshɛ diaki lo waombelo ande. Ndooko ɛngɔ kaki Hɛzɛkiya kombaɛnya lo luudu* lande ndo lo diolelo diande di’otondo.

3 L’ɔkɔngɔ wa laasɔ, omvutshi Isaya akaye le nkumekanga Hɛzɛkiya ko akawombola ate: “Apami anɛ akawatshi ndo vɔ oma lende?” Ko Hɛzɛkiya akate ate: “Vɔ wakaye oma lo wodja w’etale, oma la Babilɔna.”+ 4 Oma laasɔ nde akambola ate: “Akawɛnyi lo luudu* layɛ?” Hɛzɛkiya akakadimola ate: “Vɔ wakɛnyi ɛngɔ tshɛ kele lo luudu* lami. Ndooko ɛngɔ ka lo waombelo ami kahamawaɛnyisha.”

5 Ko Isaya akatɛ Hɛzɛkiya ate: “Hokamɛ ɔtɛkɛta wa Jehowa kanga lolembelembe: 6 ‘Eenda, nshi yayoya yele kɛnɛ tshɛ kele lo luudu* layɛ ndo kɛnɛ tshɛ kakombe watshɛyɛ polo ndo ɛlɔ kayɔtɔlama la Babilɔna. Ndooko ɛngɔ kayotshikala,’+ mbata Jehowa.+ 7 ‘Ndo anayɛ amɔtshi wayoyota wayɔsama ndo wayonga ɛnɛnɛ wa lo luudu l’owandji laki nkumekanga ka Babilɔna.’”+

8 L’ɔkɔngɔ wa laasɔ, Hɛzɛkiya akatɛ Isaya ate: “Ɔtɛkɛta wa Jehowa wotshiyɛ wekɔ dimɛna.” Oma laasɔ, nde akakotsha ate: “Nɛ dia wɔladi ndo lotui tshitshi* layonga etena kekemi la lɔsɛnɔ.”*+