Ɛzɛkiyɛlɛ
19 “Emba lembo l’otanda* lo dikambo dia ewandji wa lo Isariyɛlɛ 2 wate:
‘Akɔna aki nyɔ? Ntambwɛ ka wadi l’atei wa ntambwɛ ya waomi.
Tɔ kaketama l’atei w’ɛsɔngɔ wa ntambwɛ* ya wolo ndo tɔ kakodia anatɔ.
3 Tɔ kakodia ɔnatɔ ɔmɔtshi, ko ɔnakɔ akakome ɔsɔngɔ wa ntambwɛ+ wa wolo.
Tɔ kakeke woho wa mbatshatsha nyama kandatɔ,
Tɔ kakale ndo anto.
4 Wedja wakoke lokumu latɔ ndo wakakinde lo difuku diawɔ2,
Ndo wakakitɔlɛ lo wodja wa Edjibito la tɔkɔhɔ.+
5 Nyangɛtɔ akakonge ndo l’edjedja ka wonya tɔ kakɛnyi dia elongamelo ka tɔ nkalola kaya bu.
Ɔnkɔnɛ, tɔ kakɔshi ɔnatɔ okina ndo kakootome oko ɔsɔngɔ wa ntambwɛ wa wolo.
6 Ko tɔ kaketeta l’atei wa ntambwɛ ndo kakayala ɔsɔngɔ wa ntambwɛ wa wolo.
Tɔ kakeke woho wa mbatshatsha nyama kandatɔ ndo tɔ kakale ndo anto.+
7 Tɔ kakatsha wenga l’atei wa totshoto tawɔ todingami la mpele ndo kakahandjola esomba awɔ,
Ko ɛtshi ka nkɛtɛ kakahandjɔ kakalole tɔɔ la londjo la dikita diatɔ.+
8 Wedja w’oma lo adistrikɛ wele suke wakaye, wakayokiamba ɔtɛi awɔ,
Ndo tɔ kakandama lo difuku diawɔ.
9 La tɔkɔhɔ vɔ wakakidje lo losasa ndo wakakitɔlɛ le nkumekanga ka Babilɔna.
Lɛkɔ vɔ wakakidihe diaha dui diatɔ mbokɛma nto lo akona wa Isariyɛlɛ.
10 Nyɔ aki oko ɔkɔdi wa vinyɔ+ wakonɛma suke la ashi lo dikila diayɛ.*
Vɔ wakatɔ elowa ndo wakalole tɔɔ la ntahe l’ɔtɛ wa efula ka ashi.
11 Vɔ wakatondja ntahe ya wolo yakawakokaka nsala alanga w’emboledi.
Vɔ wakole ndo wakaleke esongo ekina otale,
Ndo vɔ wakɛnama l’ɔtɛ wa tanga diawɔ ndo l’ɔtɛ wa efula ka akatshi awɔ.
12 La odudu tshɛ, vɔ wakakundɔma+ ndo wakakashema la nkɛtɛ,
Ko lɔpɛpɛ l’oma lo ɛstɛ lakonya elowa awɔ.
Ntahe yawɔ ya wolo yakahembɔma ndo yakome,+ ko dja yakayitshumbe.+
13 Kakianɛ vɔ wambonɛma lo oswe wa shɛnga,
Lo nkɛtɛ ya womu, yele bu la ashi.+
14 Dja yakalalɔ oma lo ntahe yawɔ ko yakatshumbe nsɔngusɔngu yawɔ ndo elowa awɔ,
Ndooko lotahe la wolo lakatshikala, ndooko danga dia mbolɛ.+
“‘Ɔsɔ ekɔ lembo l’otanda ndo lɔ layonga lembo l’otanda.’”