Luka
4 Oma laasɔ, Yeso akakalola oma la Jɔrdana olodiami la nyuma k’ekila ko nyuma kakɔɔlɔmbɔla otsha l’oswe+ 2 ndo nde akatotshikala lɛkɔ nshi 40, ko Diabolo+ akatoohemba lɛkɔ. Ndo nde kɔndɛka ndooko ɛngɔ lo nshi shɔ ndo l’ekomelo ka nshi yakɔ, nde akoke ndjala. 3 Ko Diabolo akawotɛ ate: “Naka ɔna Nzambi keyɛ, otɛ ave anɛ dia vɔ mpilɔ mbo ya ndɛ.” 4 Koko Yeso akookadimola ate: “Akafundama ɔnɛ: ‘Onto hayala la lɔsɛnɔ oma lo mbo ya ndɛ tsho.’”+
5 Oma laasɔ, Diabolo akatshu la nde lo dikona dimɔtshi, ko akawɛnya waolelo tshɛ wa lo nkɛtɛ k’otondo lo tshanda mɔtshi,+ 6 ndo akawotɛ ate: “Layokosha lowandji lɔnɛ tshɛ ndo lotombo lalɔ, nɛ dia wakambishalɔ+ ndo dimi lishaka onto tshɛ lalangami. 7 Ɔnkɔnɛ, naka wɛ nsala tshelo 1 ya tɛmɔlami, kete vɔ tshɛ wayonga wakiyɛ.” 8 Yeso akookadimola ate: “Akafundama ate: ‘Jehowa* Nzambi kayɛ kahombayɛ ntɛmɔla ndo paka ndamɛ oto kahombayɛ kambɛ olimu+ w’ekila.’”
9 Oma laasɔ Diabolo akatshu la nde la Jɛrusalɛma ndo akatookitsha la diko dia ehele* ka tɛmpɛlɔ ko akawotɛ ate: “Naka ɔna Nzambi keyɛ, yakɔsha la nkɛtɛ,+ 10 nɛ dia akafundama ɔnɛ: ‘Nde ayodjangɛ andjelo ande lo dikambo diayɛ dia vɔ kokokɛ,’ 11 ndo ‘vɔ wayokɛmba l’anya awɔ diaha lokolo layɛ kɔmama lo dive.’”+ 12 Yeso akookadimola ate: “Akafundama ɔnɛ: ‘Todjake Jehowa* Nzambi kayɛ l’ohemba.’”+ 13 Lam’akashidiya Diabolo mbohemba, nde akootshike polo lam’ayondokondja diaaso dikina dia dimɛna.+
14 Oma laasɔ, Yeso akakalola la Ngalileya+ lo wolo wa nyuma. Ndo nkumu y’ɛlɔlɔ yendana la nde yakahandjɔ lo ngelo tshɛ yakasukana la wɔ. 15 Ndo nto, nde akatatɛ mbetsha lo toshinangɔnga tawɔ ndo anto tshɛ wakɔɔlɛmiyaka.
16 Ko nde akatshu la Nazarɛtɛ,+ lɛnɛ akandole ndo oko waki mbekelo kande lushi la Sabato, nde akɔtɔ lo shinangɔnga+ ndo akemala dia mbadia. 17 Ko wakawosha wɔɔmbɔ w’omvutshi Isaya ndo nde akadihola wɔɔmbɔ akɔ ko akakome lo dihole diakafundama ɔnɛ: 18 “Nyuma ka Jehowa* kekɔ le mi, nɛ dia nde akankite esɔ dia mbewoya ase wola lokumu l’ɔlɔlɔ. Nde akantome dia mbewoya ase lokanu etshungwelo ndo akanga wa totshungu ɔsɛnɛlɔ, dia ntshungola+ wanɛ wasoyama, 19 dia nsambisha dikambo dia ɔnɔnyi+ waketawɔma le Jehowa.”* 20 Ko nde akɔmbɛ wɔɔmbɔ, akawokaloya le okambi ndo akadjasɛ. Anto tshɛ waki lo shinangɔnga wakawendaka tɛɛ. 21 Ko nde akawatɛ ate: “Ɛtɛkɛta wa l’afundelo womanyu la mpokamɛ wambokotshama+ ɛlɔ.”
22 Ko vɔ tshɛ wakatatɛ ntɛkɛta dimɛna lo dikambo diande ndo wakaambe lo mboka ɛtɛkɛta w’amɛna wakatombaka oma l’onyɔ+ ande ndo vɔ wakataka vate: “Shi ɔnɛ ɔna Yɔsɛfu?”+ 23 Ko nde akawatɛ ate: “Aha la taamu, nyayombutɛ ɛtɛkɛta ɛnɛ: ‘Onganga le, yakɔnɔla wɛmɛ. Akambo wakatoke wakasalema la Kapɛrnauma,+ salawɔ ndo lanɛ lo ngelo kanyu.’” 24 Ko nde akate ate: “Lo mɛtɛ kanyotɛmi nte: Ndooko omvutshi wetawɔma lo ngelo kawɔ.+ 25 Ɛnyɛlɔ, lambonyotɛ lo mɛtɛ nte: Lo nshi ya Elidja, wadi waki edo waki efula lo Isariyɛlɛ etena kakadihama olongo ɛnɔnyi 3 la ngɔndɔ 6 ndo ndjala ka kasha kakayala lo wodja+ w’otondo, 26 koko Elidja kotomama kaanga le womoto ɔtɔi l’atei awɔ, onyake le wadi aki odo ɔmɔtshi la la Zarɛfatɛ, lo wodja wa Sidɔna.+ 27 Ndo nto, akanga wa sudi efula waki lo Isariyɛlɛ lo nshi y’omvutshi Elisha, koko ndooko ɔtɔi la l’atei awɔ lakɛdiama,* paka Namana, ose Suriya.”+ 28 Anto tshɛ wakoke akambo asɔ lo shinangɔnga wakadunganɛ la nkɛlɛ,+ 29 vɔ wakemala, wakootondja l’andja w’osomba ndo wakɔɔtɔlɛ lo shɔdi ya dikona diakahikama osomba awɔ dia vɔ towosokola etshuletshule oma lɛkɔ. 30 Koko nde akete l’atei awɔ ko akatshu.+
31 Ko nde akaholɔ otsha la Kapɛrnauma, osomba wa la Ngalileya. Nde akawaetshaka lushi la Sabato,+ 32 ko vɔ wakaambe lo menda yoho yande ya mbetsha,+ nɛ dia nde akatɛkɛtaka la lowandji. 33 Pami kɛmɔtshi kaki lo shinangɔnga aki la ɔdiɛngɛ, ɔdiɛngɛ wa mindo ndo nde akahangɔhangɔ la dui+ dia wolo ate: 34 “Kasaso la yɛ na, Yeso y’ose Nazarɛtɛ?+ Onde wɛ amboya dia ndjotolanya? Dimi mbeyaka mɛtɛ eeyɛ, wɛ l’Ekila laki Nzambi.”+ 35 Koko Yeso akoohangwɛ ate: “Ɔlama ndo tomba oma le nde.” L’ɔkɔngɔ w’ɔdiɛngɛ nkɔsha pami kakɔ la nkɛtɛ l’atei w’anto, ɔdiɛngɛ akɔ wakatombe oma le nde aha la mbosalɛ kɔlɔ. 36 Ko, anto tshɛ wakaambe ndo wakatatɛ mbutanɛ lam’asawɔ ɔnɛ: “Naa woho w’ɛtɛkɛta ɛsɔ na? Nde mbidjangɛka ɛdiɛngɛ la lowandji ndo la wolo, ko vɔ tombaka oma le anto!” 37 Ko lokumu lande lakatetemala mpandjɔ lo atshuku tshɛ wa wodja wakasukana la wɔ.
38 Lam’akandatombe oma lo shinangɔnga, nde akɔtɔ lo luudu laki Simɔna. Lam’ele nyango wadi aki Simɔna akadiɛnɛka la demba dja dia wolo, vɔ wakɔɔsɛngasɛnga dia nde mbokimanyiya.+ 39 Yeso akemala suke la nde, akahangwɛ demba dja diakɔ, ko demba dja diakashile. Mbala kakɔ ɔtɔi, nde aketɔ ndo akatatɛ mbakambɛ olimu.
40 Lam’aki wonya suke la mbidja, anto tshɛ waki la ɛkɔnyi waki la hemɔ yotshikitanyi wakawelawɔ. Nde akaakɔnɔla+ lo mbahɛ onto l’onto anya. 41 Ndo nto, ɛdiɛngɛ wakatombe oma le anto efula ndo wakahangɔhangɔ, wata ɔnɛ: “Wɛ ekɔ Ɔna Nzambi.”+ Koko nde akaahangwɛ ndo kombasha lotshungɔ la vɔ ntɛkɛta,+ nɛ dia vɔ wakaweyaka dia nde kele Kristo.+
42 Lam’akahotɔ wonya, nde akatombe ndo akatshu lo dihole dia diɛta.+ Koko elui w’anto wakooyange,* wakatshu polo lɛnɛ akinde ndo vɔ wakalangaka mboshimba diaha nde mimɔ oma lalewɔ. 43 Koko nde akawatɛ ate: “Dimi pombaka mbewoya lokumu l’ɔlɔlɔ la Diolelo dia Nzambi ndo l’esomba ekina, nɛ dia l’ɔtɛ wa dikambo sɔ mbakamatomama.”+ 44 Ko nde akatshu tosambisha lo toshinangɔnga ta la Judeya.