Luka

8 Yema tshitshɛ l’ɔkɔngɔ, Yeso aketeta l’osomba l’osomba ndo lo ngelo la ngelo, atasambisha ndo atewoya lokumu l’ɔlɔlɔ la Diolelo dia Nzambi.+ Apɔstɔlɔ ande 12 waki kaamɛ la nde, 2 ndo wamato amɔtshi wakakɔnɔ oma lo ɛdiɛngɛ ndo hemɔ waki kaamɛ la nde: Mariya lakawelɛka ɔnɛ w’ose Mangadala, ɔnɛ lele ɛdiɛngɛ 7 wakatombe oma le nde, 3 Joana+ wadi aki Kuza, olami wa lo luudu laki Hɛrɔdɛ, Suzana ndo wamato akina efula wakaakimanyiya la diangɔ+ diawɔ.

4 Lam’akatshumana olui a woke w’anto la wanɛ wakatatshɔka la nde l’osomba l’osomba, nde akawatɛ akambo la wɛɛla+ ate: 5 “Omboki a woho akatshu dia toka woho ande. Lam’akandatokaka, ntɔngɔ mɔtshi yakakɔ lo mboka ndo yakahɔtshahɔtshama, ko tofudu ta l’olongo takale ntɔngɔ yakɔ.+ 6 Ntɔngɔ nkina yakakɔ lo ave ndo l’ɔkɔngɔ wa yɔ ntomba, yɔ yakome nɛ dia ashi komonga.+ 7 Ntɔngɔ nkina yakakɔ l’atɛndɛ ndo atɛndɛ wakole kaamɛ la yɔ wakayisenya.+ 8 Ntɔngɔ nkina nto yakakɔ lo nkɛtɛ y’amɛna ndo l’ɔkɔngɔ wa yɔ ntomba, yɔ yakatɔ elowa+ mbala 100.” L’ɔkɔngɔ wa nde mbuta akambo asɔ, nde akate la dui dia wolo ate: “Ɔnɛ lele l’atoyi wa mboka, ooke.”+

9 Ko ambeki ande wakawombola kitshimudi+ ya wɛɛla ɔsɔ. 10 Nde akawatɛ ate: “Nyu nyakalongola dikoka dia nshihodia toseke t’ekila tendana la Diolelo dia Nzambi, koko le anto akina, akambo tshɛ mbaetɛka lo wɛɛla,+ nɛ dia kaanga mbendawɔ, vɔ wekɔ lo menda wendenda ndo kaanga mbahokamɛwɔ, vɔ hawoshihodia ndooko dikambo.+ 11 Ɔnkɔnɛ, nyohokame kitshimudi ya wɛɛla ɔsɔ: Lɔtɔngɔ kɛdikɛdi ɔtɛkɛta wa Nzambi.+ 12 Ntɔngɔ yakakɔ lo mboka ele anto wahokamɛ ɔtɛkɛta wa Nzambi, ko oma laasɔ Diabolo toyaka ndo tonyaka ɔtɛkɛta akɔ oma l’etema awɔ diaha vɔ mbetawɔ ndo shimbamɛ.+ 13 Ntɔngɔ yakakɔ l’ave ele wanɛ woka ɔtɛkɛta wa Nzambi ndo wawetawɔ l’ɔngɛnɔngɛnɔ, koko vɔ kombika edio. Vɔ tshikalaka paka lo tshanda mɔtshi tsho, ko lam’atoyaka ehemba, vɔ watɔkɔka.+ 14 Ntɔngɔ yakakɔ l’atɛndɛ ele anto wahokamɛ ɔtɛkɛta wa Nzambi, koko ekiyanu, ɛngɔnyi+ ndo ɛngɛnɔngɛnɔ wa lo lɔsɛnɔ+ lɔnɛ tshidiaka ɔtɛkɛta akɔ tshɛ lo tshɛ, ko hatshundja+ ndooko ɛngɔ. 15 Ntɔngɔ yakakɔ lo nkɛtɛ y’amɛna ele anto walongola ɔtɛkɛta wa Nzambi l’etema+ w’amɛna, walama ɔtɛkɛta akɔ ndo watɔ elowa la ekikelo.+

16 “Ndooko onto latɔhɛtshaka tala ko difɛ l’ɛngɔ kɛmɔtshi kana dikitsha l’ɛse ka mbeto, koko nde todikitshaka laadiko dia ekundji ka tala dia wanɛ wɔtɔ lo luudu lakɔ mɛna osase.+ 17 Nɛ dia ndooko ɛngɔ koshɛmi kahatoshɔma ndo ndooko ɛngɔ koshɛmi etale kahateyama ndo kahatotomba sɛkɛ.+ 18 Ɔnkɔnɛ, nyodje yimba lo woho wahokamɛnyu, nɛ dia onto tshɛ lele la ɛngɔ kɛmɔtshi, wayowokotshɛ dikina,+ koko onto tshɛ laha la ɛngɔ, wayowɔhɔtɔla+ ndo kɛnɛ kafɔnyande ate ekɔ la tɔ.”

19 L’etena kɛsɔ, nyango l’anango+ wakaye le nde, koko takawakoke nsukana la nde, nɛ dia anto waki efula.+ 20 Ko wakawotɛ ɔnɛ: “Eenda nyɔ la ananyɔ wemadi l’andja, walanga kɛna.” 21 Nde akaakadimola ate: “Onto tshɛ loka ndo lakitanyiya+ ɔtɛkɛta wa Nzambi mbele mama la analengo.”

22 Lushi lɔmɔtshi nde l’ambeki ande wakɔtɔ lo waato, ko nde akawatɛ ate: “Nyoyete totehɔ la wedi okina w’oduwa.” Ko vɔ wakatehɔ.+ 23 Koko lam’akawatatehɔka, nde akalale. Lɔpɛpɛ la wolo lakapɛpɛ l’oduwa ndo waato wakatatɛ ndolanɛ la ashi, ko vɔ waki lo waale.+ 24 Ɔnkɔnɛ, vɔ wakatshu le nde ndo wakatowemula, wata vate: “Ombetsha, Ombetsha, enda tayanga mvɔ!” Lam’akandemɔ, nde akahangwɛ lɔpɛpɛ ndo asuku w’ashi, ko lɔpɛpɛ lakɔlama ndo ashi wakɔlɛ yɔɔ.+ 25 Oma laasɔ, nde akawambola ate: “Lende ele mbetawɔ kanyu?” Vɔ wakandama la wɔma, wakaambe efula ndo wakatanɛ vate: “Woho akɔna w’onto ɔnɛ mɛtɛ? Nde mbidjangɛka ndo lɔpɛpɛ ndo ashi ko vɔ mbokitanyiyaka.”+

26 Ko vɔ wakakome lo ɛtshi ka nkɛtɛ ka Ngerasɛni+ lo wedi okina wa Ngalileya. 27 Lam’akayatombaka Yeso oma lo waato, pami kɛmɔtshi k’oma l’osomba kaki l’ɛdiɛngɛ akahomana la nde. Akete edja efula kakinde kɔndɔtaka ahɔndɔ ndo nde kombidjasɛka lo luudu, paka la waombo.*+ 28 Lam’akandɛnyi Yeso, nde akade ekoko, akakusama la ntondo kande ndo akate la dui dia wolo ate: “Kasami la yɛ na, wɛ Yeso Ɔna Nzambi Kaheme-Tshɛ? Lambokɔsɛngasɛnga diaha wɛ soyami.”+ 29 (Nɛ dia Yeso akatɛ ɔdiɛngɛ dia vɔ ntomba oma le pami kɛsɔ. Ɔdiɛngɛ ɔsɔ wakawahemaka mbala la mbala*+ ndo mbala efula anto wakookelekaka mɔlɔla ndo wakawodjaka lo lowete ndo wakoolamaka, koko nde akahembolaka mɔlɔla ndo ɔdiɛngɛ wakɔɔtɔlaka l’ahole wa diɛta.) 30 Yeso akawombola ate: “Lokombo layɛ?” Ko nde akawotɛ ate: “Lokombo lami Leemba,” nɛ dia ɛdiɛngɛ efula wakikɔ le nde. 31 Vɔ wakatetemala mbɔsɛngasɛnga diaha nde mbatoma lo difuku diaha l’ekomelo.+ 32 Leemba la woke la nsombo+ lakalɛka lo dikona, ɔnkɔnɛ vɔ wakɔɔsɛngasɛnga dia nde mbetawɔ dia vɔ mbɔtɔ le yɔ, ko nde akawasha lotshungɔ.+ 33 Ko ɛdiɛngɛ wakatombe oma le pami kɛsɔ ndo wakɔtɔ le nsombo, ko nsombo yakɔ yakakungusɔ* otsha l’oduwa ndo yakavu. 34 Lam’akɛnyi alami wa nsombo kɛnɛ kakatombe, vɔ wakalawɔ, ko wakatɔkɔndɔla dikambo diakɔ l’osomba ndo lo tongelongelo.

35 Oma laasɔ, anto wakaye ndjenda kɛnɛ kakatombe. Vɔ wakaye le Yeso ndo wakatane pami kakandatondja ɛdiɛngɛ ɔlɔtshi ahɔndɔ, aya ki ndo odjashi l’ekolo wa Yeso, ko vɔ wakoke wɔma. 36 Wanɛ wakɛnyi dikambo sɔ wakaakɔndɔlɛ woho wakakɔnɔ pami kaki la ɛdiɛngɛ kɛsɔ. 37 Ko olui w’anto w’oma lo ɛtshi ka nkɛtɛ ka Ngerasɛni kaki suke wakalɔmbɛ Yeso dia nde mimɔ oma lakawɔ, nɛ dia vɔ wakandama la wɔma w’efula. Ko nde akɔtɔ lo waato ndo akatshu. 38 Pami kakandatondja ɛdiɛngɛ akɔɔsɛngasɛnga dia nde ntshɔ la nde, koko Yeso kombetawɔ ndo akawotɛ ate:+ 39 “Kalola la ngelo ndo totetemale mbutɛ anto akambo wambokosalɛ Nzambi.” Ko nde akatshu, atasanya l’osomba w’otondo kɛnɛ kakoosalɛ Yeso.

40 Lam’akakalola Yeso la Ngalileya, olui w’anto wakoolongola dimɛna, nɛ dia vɔ tshɛ wakookongaka.+ 41 Koko nyolonge, pami kɛmɔtshi kakawelɛka Jayiro akaye; pami kɛsɔ aki owandji wa shinangɔnga. Nde akakusama l’ekolo wa Yeso ndo akɔɔsɛngasɛnga dia nde ntshɔ lakande,+ 42 nɛ dia tshɔi* y’ɔnande la womoto laki l’ɛnɔnyi 12 aki l’asa eko la nyɔi.

Lam’akatatshɔka Yeso, elui w’anto wakatawodjaka mpika. 43 Aki womoto ɔmɔtshi laki la hemɔ ka ɛkɛlɛlɔ ka dikila+ ɛnɔnyi 12, lele ndooko onto+ lakakoke mbɔkɔnɔla. 44 Nde akasukana oma l’ɔkɔngɔ ndo akananda ohembo wa dihɔndɔ+ dia laadiko diaki Yeso ndo mbala kakɔ ɔtɔi, hemɔ kande ka ɛkɛlɛlɔ ka dikila kakashile. 45 Ko Yeso akambola ate: “Ominandji?” Etena kakangunaka anto tshɛ, Petero akate ate: “Ombetsha, olui w’anto kodinga ndo wekɔ lo tasusana mboka laleyɛ.”+ 46 Koko Yeso akate ate: “Onto ɔmɔtshi oma la minandami, nɛ dia dimi lamboka dia wolo+ wambotomba oma le mi.” 47 Lam’akeye womoto akɔ dia kɛnɛ kosadinde kambeyama, nde akaye ayasake lokomba ndo akayakɔsha la ntondo ka Yeso ko akate la ntondo k’anto tshɛ ɔkɔkɔ wakandawonandji ndo woho wakandakɔnwɛ mbala kakɔ ɔtɔi. 48 Ko Yeso akawotɛ ate: “Ɔna womoto, mbetawɔ kayɛ kambokɔkɔnɔla. Tshɔka la ki.”+

49 Lam’akandatɛkɛtaka, onto ɔmɔtshi l’oma laka owandji wa shinangɔnga akaye ko akayowotɛ ate: “Ɔnayɛ amboshila mvɔ, takɛnya Ombetsha paa.”+ 50 Lam’akoke Yeso dui sɔ, nde akawotɛ ate: “Tokake wɔma, onga tsho la mbetawɔ, ko nde ayoka.”+ 51 Lam’akandakome la ngelo, nde kombetawɔ di’anto akina ntshɔ la nde onyake Petero, Joani, Jakɔba, she ɔna la nyango ɔna. 52 Anto tshɛ wakalelaka ndo wakayahomanyaka, nɛ dia waki la kandji k’efula k’ɔna womoto akɔ. Ɔnkɔnɛ, Yeso akawatɛ ate: “Nyotshike ndela,+ nɛ dia nde havwe, lo djɔ+ kende.” 53 Ko vɔ wakatatɛ mbɔɔla la lɔsɔkɔ tshɛ, nɛ dia vɔ wakeye dia ɔna akashidi mvɔ. 54 Ko nde akakimɛ ɔnakɔ lo lonya ndo akate ate: “Ɔna, etɔ!”+ 55 Ko lomu*+ lande lakakalola le nde ndo nde aketɔ mbala kakɔ ɔtɔi,+ ko Yeso akate dia vɔ mbosha yangɔ ya ndɛ. 56 Ɔnkɔnɛ, ambutshi ande waki l’ɔngɛnɔngɛnɔ wa mamba, koko Yeso akawatɛ diaha vɔ mbutɛ ndooko onto kɛnɛ kakatombe.+