Luka
9 Oma laasɔ, Yeso akelɛ apɔstɔlɔ ande 12 ko akawasha wolo la lowandji la mbahemɛ ɛdiɛngɛ+ tshɛ ndo nkɔnɔla hemɔ.+ 2 Ko nde akaatome dia tosambisha Diolelo dia Nzambi ndo tɔkɔnɔla anto, 3 nde akawatɛ ate: “Tanyotshɔke ndooko la ɛngɔ lo lɔkɛndɔ, oyadi danga kana tapa dia mbo ya ndɛ, mapa kaanga falanga* kana ahɔndɔ 2.*+ 4 Koko lo luudu tshɛ layonyɔtɔ, kanyotshikale laawɔ polo ndo lam’ayonyotshɔ.+ 5 Ndo dihole tshɛ diahawatonyolongola, lam’ayonyotomba oma l’osomba akɔ, kanyohome ditshu dia l’ekolo anyu oko djembetelo ya mbahɛmɔla.”+ 6 Lam’akawatatshɔka, vɔ waketeta l’ɛtshi ka nkɛtɛ k’otondo, watasambisha lokumu l’ɔlɔlɔ lo ngelo la ngelo ndo watakɔnɔla anto waki la hemɔ l’ahole tshɛ.+
7 Lam’akoke Hɛrɔdɛ* laki owandji* wa distrikɛ akambo tshɛ wakatombe, nde akahandjɔ wɔɔngɔ efula, nɛ dia anto amɔtshi wakawotɛ ɔnɛ Joani ambolɔ oma lo nyɔi,+ 8 akina wakataka vate Elidja kamboya ndo akina nto vate omvutshi ɔmɔtshi wa lo nshi y’edjedja kambolɔ.+ 9 Hɛrɔdɛ akate ate: “Joani dimi lakoohembola ɔtɛ.+ Ko onto akɔna asala akambo wokami asɔ?” Ɔnkɔnɛ, nde akayangaka dia mbɛɛna.+
10 Lam’akakalola apɔstɔlɔ, vɔ wakakɔndɔlɛ Yeso akambo tshɛ wakawasale.+ Ko nde akawaɔshi, akatshu la wɔ lo dihole dia diɛta l’osomba wakawelɛka Bɛtɛsayida.+ 11 Koko lam’akeye olui w’anto dikambo sɔ, vɔ wakaayele. Nde akaalongola dimɛna ndo akatatɛ mbatɛ akambo wendana la Diolelo dia Nzambi ndo akakɔnɔla wanɛ waki l’ohomba w’ɛkɔnwɛlɔ.+ 12 Lam’aki wonya suke la mbɔtɔ. Apɔstɔlɔ 12 wakaye le nde ndo wakawotɛ vate: “Kɛndja olui w’anto ɔnɛ dia vɔ toyanga mpango ndo yangɔ ya ndɛ lo tongelongelo ndo lo tosamba tele suke, nɛ dia lanɛ tekɔ lo diɛta.”+ 13 Koko nde akawatɛ ate: “Nyowasha yangɔ ya ndɛ.”+ Vɔ wakawotɛ vate: “Sho ndooko l’ɛngɔ lanɛ, paka mapa 5 la nse 2 tsho, onyake paka kana sho kotshwe tosomba mbo ya ndɛ ko ndjolesha anto anɛ tshɛ.” 14 Vɔ waki apami oko nunu tanu (5000). Koko nde akatɛ ambeki ande ate: “Nyowadjashiya l’elui w’anto oko akumi atanu akumi atanu.” 15 Ko vɔ wakasale ngasɔ ndo anto tshɛ wakadjasɛ. 16 Oma laasɔ, nde akɔshi mapa akɔ 5 la nse 2, akaalɛ l’olongo ndo akasale dɔmbɛlɔ. Ko nde akahembola mapa ndo akasha ambeki ande dia vɔ kahɛ anto. 17 Ko vɔ tshɛ wakale, wakalote ndo wakatɔngɔna bɛtshi+ diakatshikala asaka 12.
18 L’ɔkɔngɔ diko, etena kakandalɔmbaka ndamɛ, ambeki ande wakaye le nde ko nde akawambola ate: “Anto atawɔ eemi?”+ 19 Vɔ wakookadimola vate: “Amɔtshi vate Joani Obatizanyi koko akina vate Elidja, ndo akina nto vate, omvutshi ɔmɔtshi wa lo nshi y’edjedja kambolɔ.”+ 20 Ko nde akawambola ate: “Ko nyu atanyu eemi?” Petero akakadimola ate: “Kristo kaki Nzambi.”+ 21 Oma laasɔ, nde akaakɔkɔmiya diaha vɔ mbutɛ ndooko onto+ dikambo sɔ. 22 Nde akate nto ate: “Ɔna onto pombaka soyama efula ndo sɛkama oma le dikumanyi, ewandji w’ɛlɔmbɛdi l’afundji ndo ndjakema,+ ko mbolɔ+ lushi la 3.”
23 Oma laasɔ, nde akatɛ anto tshɛ ate: “Naka onto nangaka ndjelami, nde ayasɛkɛ,+ ɛmbake otamba ande w’asui* lushi la lushi ndo atetemale ndjelami.+ 24 Nɛ dia onto tshɛ lalanga nkokɛ lɔsɛnɔ* lande ayolishisha, koko onto tshɛ lashisha lɔsɛnɔ* lande l’ɔtɛ ami ayolishimbɛ.+ 25 Wahɔ akɔna mɛtɛ wayonga l’onto naka nde nkondja andja w’otondo ko nde nshisha lɔsɛnɔ lande kana nanyema?+ 26 Nɛ dia onto tshɛ lamboka nsɔnyi ndo loka ɛtɛkɛta ami nsɔnyi, Ɔna onto ayooka onto ɔsɔ nsɔnyi nde lawɔ etena kayondoya lo lotombo lande la laki She ndo laki andjelo+ w’ekila. 27 Lo mɛtɛ kanyotɛmi nte, anto amɔtshi wemadi lanɛ hawotɔlɛta nyɔi paka wambotɛnyi Diolelo dia Nzambi.”+
28 Oma lɔkɔ, nshi oko 8 l’ɔkɔngɔ wa nde mbuta ɛtɛkɛta ɛsɔ, nde akɔshi Petero, Joani la Jakɔba ko akadɛ la wɔ lo dikona dia tɔlɔmba.+ 29 Etena kakandalɔmbaka, ɛnamelo k’elungi kande kakatshikitana ndo ahɔndɔ ande wakayala wɛma fifɔ. 30 Ndo nto, nyolonge, anto 2 wakasawolaka la nde, aki Mɔsɛ la Elidja. 31 Vɔ wakɛnama lo lotombo ndo wakasawolaka la nde dia womwelo ande wakandahombe tokotsha la Jɛrusalɛma.+ 32 Petero la anto waki la nde wakalalaka djɔ, koko lam’akawakashimɔ, vɔ wakɛnyi lotombo+ la Yeso ndo apami 2 wemadi kaamɛ la nde. 33 Lam’akalange apami asɔ mangana la nde, Petero akatɛ Yeso ate: “Ombetsha, ekɔ dui dia dimɛna dia sho ntshikala lanɛ. Ɔnkɔnɛ toke mvudu 3 y’apɛma, 1 lakiyɛ, 1 laki Mɔsɛ ndo 1 laki Elidja.” Nde koshihodiaka kɛnɛ kakandataka. 34 Koko etena kakandataka awui asɔ, dinge diakaye ndo diakatatɛ mbakomba. Lam’akawɔtɔ lo dinge, vɔ wakoke wɔma efula. 35 Ko dui+ diakaye oma lo dinge diata ɔnɛ: “Ɔnɛ ele Ɔnami lakamasɔnɛ.+ Nyowokee.”+ 36 Lam’akokɛma dui sɔ, Yeso akatshikala ndamɛ. Ko vɔ wakalame dikambo sɔ, ndo lo nshi shɔ vɔ kombutɛ ndooko onto akambo wakawɛnyi.+
37 La wedi a pindju, etena kakawayaholɔka oma lo dikona, olui a woke w’anto wakaye le nde.+ 38 Nyolonge, pami kɛmɔtshi akate la dui dia wolo oma l’atei w’olui w’anto ate: “Ombetsha, lambokɔsɛngasɛnga dia wɛ ndjenda ɔnami, nɛ dia nde kele tshɔi yami y’ɔna.+ 39 Etena kawahema ɔdiɛngɛ, mbala kakɔ ɔtɔi nde mbidaka ekoko ndo vɔ mbohahanyaka oko onto lafumboya fudu, mbotondjaka ndɔdu l’onyɔ ndo vɔ ndjootshikaka paka wamboosoya efula. 40 Lakalɔmbi ambeki ayɛ dia vɔ mbotondja, koko vɔ hawokoki nsala dui sɔ.” 41 Yeso akakadimola ate: “Nyu lɔlɔnga+ la kɔlɔ ndo lele bu la mbetawɔ, polo ndo l’etena kakɔna kayomotetemala monga la nyu ndo mbikikɛ lɔkɛwɔ lanyu? Ombela ɔnayɛ lanɛ.”+ 42 Koko, lam’akayayaka ɔna ɔsɔ, ɔdiɛngɛ wakɔɔkɔsha lo nkɛtɛ ndo wakoohahanya la wolo oko onto lafumboya fudu. Ko Yeso akahangwɛ ɔdiɛngɛ, akakɔnɔla ɔnakɔ ndo akawosha she. 43 Ko vɔ tshɛ wakaambe l’ɔtɛ wa wolo waki Nzambi wahadjama anya.
Etena kakaambaka anto tshɛ l’ɔtɛ w’akambo tshɛ wakandasalaka, nde akatɛ ambeki ande ate: 44 “Nyohokame awui anɛ dimɛna ndo kanyowaohɔke, nɛ dia Ɔna onto ayanga tokimɔma lo anya w’anto.”+ 45 Koko vɔ koshihodia kɛnɛ kakandawatɛ. Akambo akɔ wakashɛma le wɔ diaha vɔ mbashihodia, koko vɔ wakoke wɔma dia mbombola lo dikambo sɔ.
46 Ko vɔ wakatatɛ mana dia mbeya ɔnɛ loleki woke+ l’atei awɔ. 47 Oko wakandeye tokanyi taki l’etema awɔ, Yeso akɔshi ɔna dikɛnda, akawemadia suke la nde, 48 ko akawatɛ ate: “Onto tshɛ lalongola ɔna dikɛnda ɔnɛ lo lokombo lami, ambonongola ndo dimi; ndo onto tshɛ lanongola, ambolongola ndo Ɔnɛ lakantome.+ Nɛ dia ɔnɛ layaetɛ tshitshɛ l’atei anyu tshɛ mboleki woke.”+
49 Joani akawotɛ ate: “Ombetsha, takɛnyi onto ɔmɔtshi atondja ɛdiɛngɛ lo nkamba la lokombo layɛ, ko takahembe mboshimba, nɛ dia nde hakoyele kaamɛ la so.”+ 50 Ko Yeso akawotɛ ate: “Tanyohembake mboshimba, nɛ dia onto tshɛ lahanyɔlɔsha ekɔ kaamɛ la nyu.”
51 Lam’ele nshi ya nde minyɛma+ yaki suke,* nde akayashikikɛ dia ntshɔ la Jɛrusalɛma. 52 Ko nde akatome anto la ntondo kande. Vɔ wakatshu lo ngelo kɛmɔtshi k’ase Samariya dia tosala ɛlɔngɔswɛlɔ dikambo diande. 53 Koko vɔ kombolongola,+ nɛ dia vɔ wakeye dia nde akayashikikɛ* dia ntshɔ otsha la Jɛrusalɛma. 54 Lam’akɛnyi Jakɔba la Joani+ y’ambeki ande dikambo sɔ, vɔ wakate vate: “Nkumadiɔndjɔ, onde wɛ nangaka sho mbelɛ dja oma l’olongo dia yɔ mbashila oshiki?”+ 55 Ko nde akakadimɔ ndo akaahangwɛ. 56 Ko vɔ wakatshu lo ngelo kekina.
57 Lam’akawatatshɔka lo mboka, onto ɔmɔtshi akawotɛ ate: “Dimi layokoyela dihole tshɛ diayoyotshɔ.” 58 Koko Yeso akawotɛ ate: “Ɛkɛngɛ wekɔ la weoko ndo tofudu ta l’olongo tekɔ la tokefu, koko Ɔna onto keema la dihole dia mbishɛ ɔtɛ+ ande.” 59 Oma laasɔ, nde akatɛ onto okina ate: “Ondjele.” Ko onto akɔ akate ate: “Nkumadiɔndjɔ, etawɔ dia dimi ntshɔ takunde papa.”+ 60 Koko Yeso akawotɛ ate: “Tshika edo+ wakundɛ edo awɔ, koko wɛ, tshɔka tosambisha Diolelo dia Nzambi.”+ 61 Ndo okina nto akate ate: “Nkumadiɔndjɔ, layokoyela, koko toketawɔ dimi talakanyi l’ase luudu lami.” 62 Yeso akawotɛ ate: “Ndooko onto lambodja lonya lande lo longo lakotola ngɔmbɛ ndo lakawoya washo lo diangɔ diele l’ɔkɔngɔ+ lakoka mbɔtɔ lo Diolelo dia Nzambi.”+