Luka

18 Oma laasɔ, Yeso akakambe la wɛɛla dia mbaɛnya ohomba wa nɔmbaka nshi tshɛ, aha la mpekɔ,+ 2 ata ate: “L’osomba ɔmɔtshi mbaki shushi mɔtshi yaki kombokaka Nzambi wɔma ndo kɔnɛmiyaka ndooko onto. 3 Wadi aki odo ɔmɔtshi aki l’osomba akɔ ndo nde akatshɔka mbala la mbala le shushi yakɔ, ata ate: ‘Enda ɔlɔlɔ dia losembwe monga lo kilombo kami.’ 4 L’etena k’otale, nde konanga mbokimanyiya, koko l’ɔkɔngɔ diko nde akayotaka ate: ‘Kaanga mbahamoke Nzambi wɔma ndo mbahamalɛmiya ndooko onto, 5 lam’ele wadi aki odo ɔnɛ ekɔ lo ntetemala mɛnyami paa, dimi layɔsɛna dia nsambola la losembwe diaha nde ntetemala ndja, nɛ dia ɔkɛlɔkɛlɔ+ ande ambɔnɛndja.’” 6 Ko Nkumadiɔndjɔ akate ate: “Nyamboka kɛnɛ kakate shushi shɔ, kaanga mbende onto a kɔlɔ! 7 Ko onde mɛtɛ Nzambi hoosala dia dikambo dia ɛsɔnami ande woolelɛ otsho+ la yanyi sambɔma la losembwe tshɛ kaanga mbende la solo dia lotutsha otsha le wɔ?+ 8 Lambonyotɛ nte, nde ayosala dia dikambo diawɔ sambɔma la losembwe esadi eto. Ko lam’ayokoma Ɔna onto, onde mɛtɛ nde ayotana mbetawɔ* kɛsɔ la nkɛtɛ?”

9 Nde akakambe nto la ɛnyɛlɔ kɛnɛ lo dikambo di’anto amɔtshi wakayaɛkɛka lo losembwe lawɔ hita ndo wakɔsaka anto akina oko diangɔ di’anyanya ate: 10 “Apami 2 wakatshu lo tɛmpɛlɔ dia tɔlɔmba. Ɔmɔtshi aki Ofarisɛ ndo okina aki ofutshanyi w’elambo. 11 Ofarisɛ akemala ndo akatatɛ nɔmba lo dikambo diande ndamɛ ate: ‘Nzambi le, lambokosha losaka lo woho wemi bu oko anto akina tshɛ wele apɔtwanyi, anto wa kɔlɔ, akanga wa loseka kana oko ofutshanyi w’elambo ɔnɛ. 12 Dimi kilaka mbo ya ndɛ mbala 2 lo lomingu ndo dimi kimɔka etenyi ka dikumi ka diangɔ tshɛ diakondjami.’+ 13 Koko ofutshanyi w’elambo akemala lo tshalola. Nde konanga kaanga mbalɛ l’olongo ndo akayakɔmɔlaka lo ntolo, ata ate: ‘Nzambi le, onga ɔlɔlɔ le mi,* dimi otshi wa pɛkato.’+ 14 Dimi lambonyotɛ nte, lam’akakalola pami kɛsɔ lakande, nde aki onto ɔlɔlɔ oleki Ofarisɛ+ ɔsɔ. Nɛ dia onto tshɛ layadiya wayowokitshakitsha ndo onto tshɛ layakitshakitsha wayowodiya.”+

15 Oma laasɔ, anto wakawela ana w’akɛnda dia nde mbananda, koko lam’akɛnyi ambeki ande dikambo sɔ, vɔ wakaahangwɛ.+ 16 Koko Yeso akelɛ ana akɔ oya le nde, ata ate: “Nyotshike ana w’akɛnda waye le mi ndo takonyashimba, nɛ dia Diolelo dia Nzambi diekɔ di’anto oko vɔ.+ 17 Lo mɛtɛ kanyotɛmi nte, onto tshɛ lahalongola Diolelo dia Nzambi oko ɔna dikɛnda, lo weho akɔ tshɛ nde hatɔtɔ lɔkɔ.”+

18 Ko owandji ɔmɔtshi akawombola ate: “Ombetsha w’ɔlɔlɔ, ahombami nsala dia nkita lɔsɛnɔ la pondjo?”+ 19 Yeso akawotɛ ate: “Lande na kambelɛyɛ ɔlɔlɔ? Ndooko onto lele ɔlɔlɔ, paka onto 1, Nzambi.+ 20 Wɛ mbeyaka dia ɛlɛmbɛ mbutaka ɔnɛ: ‘Tosalake loseka,+ todiakake,+ tovake,+ toyalake ɔmɛnyi wa kashi,+ lɛmiya shɔ la nyɔ.’”+ 21 Ko owandji akɔ akate ate: “Dimi kitanyiyaka ɛlɛmbɛ ɛsɔ tshɛ oma ko dikɛnda diami.” 22 Lam’akoke Yeso ngasɔ, nde akawotɛ ate: “Dikambo ɔtɔi kambokotshikalɛ: Tosondja diangɔ tshɛ diele la yɛ, sha ase wola, ko wɛ ayonga la ɔngɔnyi l’olongo, kele yaka, ondjele.”+ 23 Lam’akandoke ngasɔ, nde aki la lonyangu l’efula, nɛ dia nde aki la ɔngɔnyi efula.+

24 Yeso akawende tɛɛ, ko akate ate: “Ayonga wolo dia akanga w’ɛngɔnyi mbɔtɔ lo Diolelo dia Nzambi!+ 25 Wɔtwɛlɔ wa kanga ɔngɔnyi lo Diolelo dia Nzambi+ ekɔ oko mponda mbɔtɔ lo wosho wa ntɛdi.” 26 Wanɛ wakoke akambo asɔ wakate vate: “Laasɔ, onto akɔna ayokoka shimbamɛ na?”+ 27 Nde akate ate: “Akambo wele anto hawokoke nsala, Nzambi+ kokaka mbasala.” 28 Ko Petero akate ate: “Eenda, sho takatshike diangɔ diaso ndo takakoyele.”+ 29 Yeso akawatɛ ate: “Lo mɛtɛ kanyotɛmi nte: Ndooko onto lakatshike luudu, wadi, anango, ambutshi kana ana l’ɔtɛ wa Diolelo dia Nzambi+ 30 lahatokondja mbala efula l’etena kɛnɛ ndo lo dikongɛ di’akambo* diayaye lɔsɛnɔ la pondjo.”+

31 Ko nde akatshu la apɔstɔlɔ ande 12 l’omamu ndo akawatɛ ate: “Nyolonge, sho anɛ atadɛ otsha la Jɛrusalɛma, akambo tshɛ wakafunde amvutshi lo dikambo di’Ɔna onto wayokotshama.*+ 32 Ɛnyɛlɔ, nde ayokimɔma l’anya w’ase wedja,+ wayowɔsɔka,+ wayowosalɛ akambo wa kɔlɔ ndo wayowotɛ nsɔyi.+ 33 Ndo l’ɔkɔngɔ wa vɔ mbɔkɔmɔla, vɔ wayowodiaka,+ koko nde ayolɔ+ lushi la 3.” 34 Koko vɔ koshihodia kɛnɛ kakandawatɛ kɛsɔ. Akambo asɔ wakashɛma le wɔ ndo vɔ koshihodia akambo wakandate.

35 Lam’aki Yeso suke la nkoma la Jeriko, kanga tshungu ɔmɔtshi akadjasɛ l’omamu wa mboka ndo akalɔmbanaka diangɔ.+ 36 Lam’akandoke dia olui w’anto wekɔ lo tete, nde akambola dia mbeya kɛnɛ kambotomba. 37 Wakawotɛ vate: “Yeso y’ose Nazarɛtɛ katete!” 38 Ko nde akate la dui dia wolo ate: “Yeso, Ɔna Davidɛ, omboke kɛtshi!” 39 Anto wakatatshɔka la ntondo wakatatɛ mbohangwɛ dia nde mbɔlama, koko nde akaleke mbuta la dui dia wolo ate: “Ɔna Davidɛ, omboke kɛtshi!” 40 Ko Yeso akemala ndo akate dia vɔ mbela pami kakɔ lalende. Lam’akandakome la suke, Yeso akawombola ate: 41 “Alangayɛ dimi kosalɛ?” Nde akate ate: “Nkumadiɔndjɔ, washo ami wasɛnɛ.” 42 Ko Yeso akawotɛ ate: “Sɛna, mbetawɔ kayɛ kambokɔkɔnɔla.”+ 43 Ko mbala kakɔ ɔtɔi, nde akasɛnɛ ndo akatatɛ ndjela Yeso,+ atatombola Nzambi. Ndo nto, lam’akawɛnyi dikambo sɔ, anto tshɛ wakatombola Nzambi.+