1 Petero
3 Woho akɔ waamɛ mbele, nyu wadi nyoyakitshakitsha l’ɛse ka waomɛnyu,+ kele naka amɔtshi hawokitanyiya ɔtɛkɛta wa Nzambi, kawokitanyiya aha kaanga la mbatɛ dui diɛsɛ la lɔkɛwɔ la wadɛwɔ,+ 2 nɛ dia vɔ wayɛna la washo awɔ lɔkɛwɔ+ lanyu l’ɔlɔlɔ* kaamɛ ndo dilɛmiɛlɔ dianyu di’efula. 3 Ɛlɛngɛlɔ kanyu katongake ka l’andja kendana la mbɛla divo ndo ndɔta dɛngalɛnga+ dia paonyi kana ahɔndɔ w’amɛna, 4 koko kayale ɛlɛngɛlɔ kahalanaki ka lonto loshɛmi l’etei k’otema, ɛlɛngɛlɔ ka ki ndo ka yimba+ ya memakana kele la nɛmɔ di’efula lo washo wa Nzambi. 5 Nɛ dia ngasɔ mbakayalɛngaka wamato w’ekila wa lo nshi y’edjedja wakalongamɛka le Nzambi, wakayakitshakitsha l’ɛse ka waomɛwɔ, 6 oko wakakitanyiyaka Sara Abrahama, awelɛ nkumɛmi.+ Ndo nyu nyaya anande naka nyu ntetemala nsala kɛnɛ kele ɔlɔlɔ ndo aha mboka wɔma.+
7 Woho akɔ waamɛ mbele, nyu waomi, nyotetemale mbidjasɛ la wadɛnyu lo ndjela ewo.* Nyowasha kɛnɛmɔ+ kele oko kɛnɛ kashawɔ dɔnga dia diwomba dia wɔdu efula, mbuta ate womoto, nɛ dia ndo vɔ wekɔ ekitɔ kaamɛ la nyu+ wa woshasha waheyama mbɛdika wa lɔsɛnɔ, diaha alɔmbɛlɔ anyu monga ko hawokɛmi.
8 Ɔnkɔnɛ, nyu tshɛ nyonge kaamɛ lo tokanyi,*+ nyokane kandji, nyokane ngandji k’onto l’ɔnango, nyokane kɛtshi+ k’efula ndo nyonge la okitshakitsha.+ 9 Tanyokaloyake kɔlɔ lo kɔlɔ+ kana lɔtɛngɔ lo lɔtɛngɔ.+ Koko nyaatshɔkɔlɛ,+ nɛ dia nyakelamɛ dikambo diakɔ dia nyu ndjokita ɔtshɔkɔ.
10 Nɛ dia “onto tshɛ lalanga lɔsɛnɔ ndo mɛna nshi y’ɛlɔlɔ pombaka nama lolemi lande oma lo kɛnɛ kele kɔlɔ+ ndo ɛlɔmɔ ande oma l’ɛtɛkɛta wa lokeso. 11 Nde akadimɔ oma lo kɛnɛ kele kɔlɔ+ ndo asale kɛnɛ kele ɔlɔlɔ.+ Nde ayange wɔladi ndo awowese.+ 12 Dikambo washo wa Jehowa* wekɔ le anto w’ɛlɔlɔ ndo atoyi ande pokamɛka ɛsɛngɔsɛngɔ+ awɔ. Koko elungi ka Jehowa* tonaka wanɛ wasala akambo+ wa kɔlɔ.”
13 Eelo, onto akɔna ayonyosalɛ kɔlɔ naka nyekɔ lo nsala kɛnɛ kele ɔlɔlɔ+ l’ohetoheto? 14 Koko oyadi kaanga nyu kosowaka l’ɔtɛ wa kɛnɛ kele ɔlɔlɔ, nyekɔ la ɔngɛnɔngɛnɔ.+ Koko tanyokake wɔma wa kɛnɛ kokawɔ wɔma* ndo tanyotshimbake yimba.+ 15 Nyetawɔ lo etema anyu dia Kristo ekɔ Nkumadiɔndjɔ ndo ekɔ ekila. Nyongake nshi tshɛ suke dia nkadimola onto tshɛ lanyombola ɔkɔkɔ wa elongamelo kele la nyu. Koko nyosale dikambo sɔ la lotutsha+ ndo la dilɛmiɛlɔ di’efula.+
16 Nyotetemale monga la nkum’otema k’ɔlɔlɔ,+ kele kɛnɛ tshɛ kayowɔtɛkɛta kɔlɔ lo dikambo dianyu, wanɛ watɛkɛta kɔlɔ lo dikambo dianyu kawoshame nsɔnyi+ l’ɔtɛ wa lɔkɛwɔ lanyu l’ɔlɔlɔ oko wenyu ambeki wa Kristo.+ 17 Nɛ dia ndeka dimɛna nyu nsowa l’ɔtɛ wasalanyu kɛnɛ kele ɔlɔlɔ,+ naka Nzambi kɛsɔ ketawɔnde, lo dihole dia nyu nsowa l’ɔtɛ wasalanyu kɛnɛ kele kɔlɔ.+ 18 Nɛ dia Kristo akavu mbala 1 lo pondjo dikambo dia pɛkato,+ onto ɔlɔlɔ+ akavwɛ anto wa kɔlɔ dia nyɔlɔmbɔla otsha le Nzambi.+ Nde akadiakema lo demba,+ koko akayala la lɔsɛnɔ lo nyuma.+ 19 La lɔsɛnɔ la lo nyuma lɔsɔ mbakandatshu tosambisha nyuma yele lo lokanu+ 20 yaki komonga l’okitanyiya lo nshi ya ntondo, etena kakakongaka Nzambi la solo dia lotutsha tshɛ* lo nshi+ ya Nɔa, etena kakasɛlamaka+ waato wa luudu wele lam’akalɔ Mvula k’elola,+ anto angana ato mbakahande, mbuta ate anima* 8.
21 Batisimu kɔtɔnɛ la dui sɔ tɔ lawɔ kekɔ lo nyoshimbɛ, (aha wonyelo wa mindo ya lo demba, koko dɔmbɛlɔ diasalema otsha le Nzambi dia nkondja nkum’otema k’ɔlɔlɔ),+ diɛsɛ la eolwelo ka Yeso Kristo. 22 Nde ekɔ lo lonya l’omi+ la Nzambi, nɛ dia nde akatshu l’olongo. Andjelo, ewandji ndo akanga wa nkudu wakayala l’ɛse kande.+