Etsha

20 Lam’akashile londjo, Pɔɔlɔ akelɛ ambeki ndo l’ɔkɔngɔ wa nde mbakeketsha, nde akalakana la wɔ ndo akatshu otsha la Makɛdɔniya. 2 L’ɔkɔngɔ wa nde ntshɔ l’ahole amɔtshi wa l’ɛtshi ka nkɛtɛ kɛsɔ ndo nkamba l’ɛtɛkɛta efula w’ekeketshelo, nde akatokoma la Ngirika. 3 Nde aketsha ngɔndɔ 3 lɛkɔ, koko lam’ele ase Juda+ wakawɔtwɛ sheke etena kakandalangaka ntshɔ otsha la Suriya lo waato, nde akɔshi yɛdikɔ ya nkalola la Makɛdɔniya. 4 Anto anɛ mbakatawotshindɛka: Sopatɛrɛ ɔna Pirusɛ ose Bɛrɔya, Aristarako+ la Sekundo ase Tɛsalɔnika, Ngayo ose Dɛrɛbɛ, Timɔte+ la Tishiko+ ndo Tɔrɔfimo+ w’oma lo prɔvɛnsɛ ka Aziya. 5 Apami asɔ wakatetemala la lɔkɛndɔ lawɔ ndo wakatotokonga la Tɔrɔa, 6 koko takamɔ oma la Filipɛ takete dia ndjale l’ɔkɔngɔ wa nshi ya Mapa waha la Wodoya+ ndo takakome le wɔ la Tɔrɔa l’ɔkɔngɔ wa nshi 5, ko takatshikala lɛkɔ nshi 7.

7 Lushi la ntondo la lo lomingu, etena kakatasangana kaamɛ dia ndɛ yangɔ, Pɔɔlɔ akatatɛ mbasha sawo, nɛ dia nde akahombe ntshɔ la wedi a pindju, ko nde akatetemala mbisha sawo diande polo la midi k’otsho. 8 Atala waki efula lo luudu la etajɛ lɛnɛ akatasangana. 9 Ɔlɔngɔ a pami ɔmɔtshi, lokombo lande Eyutukɔ lakadjasɛ lo didishi akalale djɔ ya baku etena kakatetemalaka Pɔɔlɔ mbisha sawo ndo lam’akandalalaka, nde akakɔ oma lo etajɛ wa 3 ndo wakayootana ambovɔ. 10 Ko Pɔɔlɔ akaholɔ, aketama laadiko diande, akookumbatɛ+ ko akate ate: “Nyotshike mbida ekoko, nɛ dia nde ekɔ la lɔsɛnɔ.”*+ 11 Ko Pɔɔlɔ akadɛ nto, akɔshi diangɔ dia ndɛ* ndo akale. Nde akatetemala nsawola la wɔ etena k’otale polo la pindju, ko nde akayonɛɛ. 12 Vɔ wakayɔsa ɔlɔngɔ a pami akɔ ele la lɔsɛnɔ ndo wakasambema lo yɛdikɔ yaheyama mbuta.

13 Sho takatshu ntondo kande lɛnɛ aki masuwa ndo takonɛɛ otsha l’Asosɛ lɛnɛ akatahombe takodi Pɔɔlɔ oko wakandate, nɛ dia nde akalange ntshɔ l’ekolo. 14 Ɔnkɔnɛ, lam’akatatohomana la nde l’Asosɛ, takawɛmbɛ lo masuwa ko takatshu otsha la Mitilɛnɛ. 15 Ndo lam’akatonɛ oma laawɔ la wedi a pindju, takakome la Kiyo, koko la wedi a pindju okina, takakome la Samɔsɛ ndo lushi lakayele, takakome la Milɛtɔ. 16 Nɛ dia Pɔɔlɔ akɔshi yɛdikɔ ya ndekana Ɛfɛsɔ+ diaha nde mbetsha wenya efula lo prɔvɛnsɛ ka Aziya dikambo nde akatasamanyaka dia tokoma la Jɛrusalɛma+ lushi la Fɛtɛ ka Pɛntɛkɔsta, naka kokaka.

17 Koko lam’akinde la Milɛtɔ, nde akatome dui l’Ɛfɛsɔ dia vɔ telɛ dikumanyi dia l’etshumanelo. 18 Lam’akawaye le nde, nde akawatɛ ate: “Nyu mbeyaka dimɛna woho wakamasɛnɛ la nyu ntatɛ lushi la ntondo lakamakome lo prɔvɛnsɛ ka Aziya,+ 19 lakambɛ Nkumadiɔndjɔ olimu l’okitshakitsha*+ woleki tshɛ, la asɔyi lo washo kaamɛ la ehemba wakahomanaka la mi lo woho wakambɔtwɛ ase Juda sheke, 20 koko dimi kotshika dia nyewoya akambo tshɛ waki ohomba* ndo dia nyetsha lo sɛkɛ+ ndo lo luudu la luudu.+ 21 Dimi lakasambisha dimɛna dimɛna oyadi ase Juda kana ase Ngirika dia vɔ ndjatshumoya+ lo nkadimɔ otsha le Nzambi ndo monga la mbetawɔ le Nkumadiɔndjɔ Yeso.+ 22 Kakianɛ nyolonge, dimi lambokelekama lo* nyuma ndo lotatshu otsha la Jɛrusalɛma kaanga mbahameye kɛnɛ kayotokomɛ lɛkɔ, 23 onyake kɛnɛ katetemala nyuma k’ekila mbutɛmi dia lo osomba l’osomba lokanu la asui wekɔ lo kongɛmi.+ 24 Koko dimi halɔshi lɔsɛnɔ* lami hita la nɛmɔ le mi* wate kana oko lekɔ ohomba efula, dia dimi nshidiya ndawɔ lowango lami+ ndo olimu wakamalongola oma le Nkumadiɔndjɔ Yeso wa nsambisha dimɛna dimɛna lokumu l’ɔlɔlɔ lendana la ɔlɔlɔ waheyama mbɛdika waki Nzambi.

25 “Ndo nyolonge, dimi mbeyaka dia ndooko onto l’atei anyu, nyu wanɛ wakamasambisha Diolelo, layɛna elungi kami nto. 26 Diakɔ diamomonyɔsa oko ɛmɛnyi ɛlɔ dikambo dimi keema la onongo wa dikila di’onto kaanga ɔtɔi,+ 27 nɛ dia dimi kotshika nyotɛ alako tshɛ* wa Nzambi.+ 28 Nyoyalame+ ndo nyolamake leemba tshɛ l’ɛkɔkɔ lele nyuma k’ekila kakanyɔsɔnɛ emendji+ dia namaka etshumanelo ka Nzambi+ kakandasombe la dikila dia Ɔnande.+ 29 Dimi mbeyaka dia l’ɔkɔngɔ ami, ndjaondo ya ngala yayɔtɔ l’atei anyu+ ndo yɔ hayotosalɛ ɛkɔkɔ akambo la ngandji, 30 ndo anto wayotomba oma l’atei anyu nyuamɛ ndo wayota akambo wele bu mɛtɛ dia nkonya ambeki dia vɔ mbayela.+

31 “Ɔnkɔnɛ, nyɔsɛnake ndo nyohɔke dia l’edja k’ɛnɔnyi 3,+ l’otsho ndo la yanyi dimi kotshika dia ndaka ɔmɔmɔ la l’atei anyu la asɔyi lo washo. 32 Ndo kakianɛ dimi lambonyokitsha l’anya wa Nzambi ndo l’ɔtɛkɛta wendana l’ɔlɔlɔ ande waheyama mbɛdika, ɔtɛkɛta wakoka nyokeketsha ndo nyosha diaaso dia nyu nongola kɛnɛ kasha Nzambi wanɛ wasɔnama dia monga ekilami.+ 33 Dimi kɔkɔmiya falanga, paonyi kana ahɔndɔ w’onto.+ 34 Nyuamɛ mbeyaka dia anya anɛ vɔamɛ wakakotsha ehomba ami+ ndo ehomba wa wanɛ waki kaamɛ la mi. 35 Dimi lakanyɛnya lo akambo tshɛ dia paka lo nkamba wolo ngasɔ+ mbahombanyu nkimanyiya wanɛ wele wɔdu ndo nyu pombaka mbohɔ ɛtɛkɛta wa Nkumadiɔndjɔ Yeso lam’akandate ate: ‘Ɔngɛnɔngɛnɔ waya lo mbisha+ ndeka wa nongola.’”

36 Lam’akandate akambo asɔ, nde akake adwe kaamɛ la wɔ ndo akalɔmbɛ. 37 Lo mɛtɛ, vɔ tshɛ wakalele efula, wakakumbatɛ Pɔɔlɔ* ndo wakashana la nde bizɛ la ngandji tshɛ, 38 nɛ dia vɔ wakaleke ntshutshumala l’ɔtɛ wakandawatɛ dia vɔ hawoyɛna elungi kande nto.+ Ko vɔ wakootshindɛ otsha lo masuwa.