Luka

6 Lushi la sabato lɔmɔtshi, Yeso akatetaka lo dikambɔ di’asami ndo ambeki ande wakatanaka nanula,+ wakatayishishaka l’anya,+ wakatayilɛka. 2 Ko Afarisɛ amɔtshi wakate vate: “Lande na kasalanyu dikambo diahakoke salema lushi la Sabato?”+ 3 Yeso akaakadimola ate: “Onde nyu nyatadiaka kɛnɛ kakasale Davidɛ etena kakandoke ndjala+ nde l’anto waki la nde? 4 Woho wakandɔtɔ lo luudu la Nzambi ndo wakawawosha mapa wa wɛnyanyu* ko nde ndɛ ndo mbisha anto waki la nde mapa ɛmɔtshi wele ndooko onto okina laki la lotshungɔ la ndɛ onyake ɛlɔmbɛdi?”+ 5 Ko nde akawatɛ ate: “Ɔna onto mbele Owandji wa Sabato.”+

6 Lushi la sabato+ lokina, nde akɔtɔ lo shinangɔnga ndo akatatɛ mbetsha. Pami kɛmɔtshi kaki la lonya l’omi lamboma*+ aki laawɔ. 7 Afundji la Afarisɛ wakendaka Yeso la yambalo tshɛ dia menda kana nde ayowɔkɔnɔla lushi la Sabato dia vɔ nkondja ɔkɔkɔ wa mbofunda. 8 Koko lam’ele nde akeye tokanyi+ tawɔ, nde akatɛ pami kaki la lonya lamboma* ate: “Emala, yaka lanɛ.” Ko nde akonɛɛ ndo akemala. 9 Oma laasɔ, Yeso akawatɛ ate: “Nyombutɛ, onde ekɔ kɔlɔ nsala dikambo di’ɔlɔlɔ kana dia kɔlɔ lushi la Sabato, mbuta ate mbitsha lɔsɛnɔ* kana lidiaka?”+ 10 L’ɔkɔngɔ wa nde menda anto tshɛ, nde akatɛ pami kɛsɔ ate: “Sembola lonya layɛ.” Nde akalisembola, ko lonya lande lakakɔnɔ. 11 Koko vɔ wakadunganɛ la nkɛlɛ ndo wakatatɛ nkɛtshanya lam’asawɔ kɛnɛ kakokawɔ salɛ Yeso.

12 Lushi lɔmɔtshi, nde akatshu lo dikona dia tɔlɔmba,+ ko akalɔmbɛ Nzambi+ otsho w’otondo. 13 Koko la wedi a pindju, nde akelɛ ambeki ande ndo akasɔnɛ 12 l’atei awɔ, ko akawaɔlɛ apɔstɔlɔ.+ 14 Nkombo yawɔ yɔ nyɛ: Simɔna lakandɔlɛ nto ɔnɛ Petero, Andɛlɛ ɔnango, Jakɔba, Joani, Filipɛ,+ Bartɛlɛmi, 15 Mateo, Tɔma,+ Jakɔba ɔna Alafayo, Simɔna lakawelɛka ɔnɛ “kanga ohetoheto,” 16 Judasɛ ɔna Jakɔba ndo Judasɛ Iskariyɔtɛ lakayongaka ofungi.

17 Ko nde akaholɔ la wɔ ndo wakatemala lo dihole di’ebamubamu lam’aki olui a woke w’ambeki ande la leemba la woke l’anto w’oma la Judeya y’otondo, w’oma la Jɛrusalɛma ndo w’oma l’ɛtshi ka nkɛtɛ ka Tura la Sidɔna kele l’omamu w’ashi. Anto asɔ wakaye dia ndjoohokamɛ ndo dia ndjɔkɔnɔ oma lo hemɔ yawɔ. 18 Kaanga wanɛ wakahɛnyahɛnyamaka la ɛdiɛngɛ wakakɔnɔ. 19 Ndo olui w’anto tshɛ wakayangaka dia mbonanda, nɛ dia wolo wakatombaka oma le nde+ ndo wakakɔnɔlaka anto akɔ tshɛ.

20 Nde akende ambeki ande ndo akatatɛ mbuta ate:

“Ɔngɛnɔngɛnɔ le nyu ase wola, nɛ dia Diolelo dia Nzambi+ diekɔ dianyu.

21 “Ɔngɛnɔngɛnɔ le nyu wanɛ wele la ndjala kakianɛ, nɛ dia nyayolotshama.+

“Ɔngɛnɔngɛnɔ le nyu wanɛ walela kakianɛ, nɛ dia nyayɔla.+

22 “Ɔngɛnɔngɛnɔ le nyu etena tshɛ kanyohetsha+ anto, etena tshɛ kanyotshanyawɔ+ oma l’atei awɔ, kanyɔtɛngawɔ ndo kɔnyɔlawɔ* lokombo lanyu oko anto wa kɔlɔ l’ɔtɛ wa Ɔna onto. 23 Nyɔngɛnɛngɛnɛ lo lushi lakɔ ndo nyonge l’ɔlɔ w’efula, nɛ dia difuto dianyu diekɔ woke l’olongo, dikambo ngasɔ mbakasalɛ watshɛwɔ amvutshi.+

24 “Koko mananu le nyu akanga w’ɛngɔnyi,+ nɛ dia nyu nyekɔ lo nongola esambelo kanyu.+

25 “Mananu le nyu wanɛ wambolota l’etena kɛnɛ, nɛ dia nyu nyayoka ndjala.

“Mananu le nyu wanɛ wɔla l’etena kɛnɛ, nɛ dia nyayonga la otanda ndo nyayolela.+

26 “Mananu kayale etena tshɛ kayɔtɛkɛta anto tshɛ dimɛna lo dikambo dianyu,+ nɛ dia ngasɔ mbakasalɛ watshɛwɔ amvutshi wa kashi.

27 “Koko lambonyotɛ nyu wanɛ wapokamɛ nte: Nyotetemale nanga atunyi anyu, nyotetemale salɛ wanɛ wanyohetsha ɔlɔlɔ,+ 28 nyotetemale ntshɔkɔla wanɛ wanyodja mananu ndo nyotetemale nɔmba dikambo dia wanɛ wanyɔtɛnga.+ 29 Naka onto ambokɔkɔmɔla lo tama dimɔtshi, ko wɛ mbosha ndo tama dikina, ndo naka onto ambokɔhɔtɔla dihɔndɔ diayɛ dia laadiko, totonake mbosha ndo dikina dia l’ɛse.+ 30 Osha ɔnɛ lakɔlɔmba+ ndo onto tshɛ lakɔhɔtɔla diangɔ diayɛ, tɔɔlɔmbake dia nde kokaloyadiɔ.

31 “Ndo nto, nyosale anto+ kɛnɛ kalanganyu vɔ nyosalɛ.

32 “Naka nyu nangaka paka anto wanyolanga, wahɔ akɔna wayonyokondja? Nɛ dia kaanga atshi wa pɛkato nangaka wanɛ waalanga.+ 33 Naka anto wanyosalɛ ɔlɔlɔ ato mbasalɛnyu ɔlɔlɔ, difuto diakɔna diayonyokondja? Nɛ dia kaanga atshi wa pɛkato salaka ngasɔ. 34 Ndo nto, naka nyu sɔndjaka* paka wanɛ walongamɛnyu dia wayonyokaloya, difuto diakɔna diayonyokondja?+ Nɛ dia kaanga atshi wa pɛkato tɔsɔndjanyaka l’elongamelo ka vɔ nongola efula. 35 Koko, nyotetemale nanga atunyi anyu ndo nyotetemale nsala ɔlɔlɔ ndo nyotetemale sɔndjana aha la nongamɛ dia onto nyokaloya,+ ko difuto dianyu diayoyala woke ndo nyayonga ana wa Ɔnɛ-Laheme-Tshɛ, nɛ dia nde ekɔ ɔlɔlɔ le akanga wa lɔhɛndɛ ndo le anto wa kɔlɔ.+ 36 Nyotetemale mbokana kɛtshi oko wokana Shɛnyu kɛtshi.+

37 “Ndo nto, nyotshike nombosha diaha nyu nomboshama.+ Nyotshike manya anto diaha nyu manyema. Nyotetemale dimanyiyana,* ko nyayodimanyiyama.*+ 38 Nyonge la mbekelo ka nkaha, ko wayonyokahɛ.+ Wayonyodjɛ lo afunda anyu yɛdikɔ y’ɔlɔlɔ yoludi, ya lɔkɔkɔmɛ ndo yatshulɔtshulɔ. Nɛ dia la yɛdikɔ yɛdikɛnyu anto akina mbayowonyɛdikɛ ndo nyu.”

39 Oma laasɔ, nde akawaoke wɛɛla, ate: “Kanga tshungu hakoke nɔmbɔla kanga tshungu, shi mɛtɛ? Nɛ dia vɔ akɔ 2 wayɔkɔ lo difuku, shi mɛtɛ?+ 40 Ombeki haleki ombetsha ande, koko onto tshɛ letshama dimɛna ayonga oko ombetsha ande. 41 Lande na kɛnayɛ fumbufumbu yele lo sso di’ɔnanyɔ, ko wɛ hɛnyi etenyi k’osongo kele lo sso+ diayɛ? 42 Ngande wakokayɛ mbutɛ ɔnanyɔ wate: ‘Ɔnalengo, yaka konya fumbufumbu yele lo sso diayɛ,’ ko wɛ hɛnyi etenyi k’osongo kele lo sso diayɛ? Wɛ kanga dungi pende le, tokotanyisha etenyi k’osongo kele lo sso diayɛ ko wɛ ayɛna dimɛna woho wa minya fumbufumbu yele lo sso di’ɔnanyɔ.

43 “Nɛ dia ndooko osongo w’ɔlɔlɔ watɔtɔka elowa wa kɔlɔ, ndo ndooko osongo wa kɔlɔ watɔtɔka elowa+ w’ɛlɔlɔ. 44 Nɛ dia osongo tshɛ mbeyamaka oma lo elowa+ awɔ. Ɛnyɛlɔ, hawotombaka elowa wa fingo oma l’ɛkɔdi w’atɛndɛ kana mimba elowa wa vinyɔ oma l’ɛkɔdi w’atɛndɛ. 45 Onto ɔlɔlɔ totondjaka diangɔ di’ɛlɔlɔ oma lo eombelo k’ɔlɔlɔ kele l’otema ande, koko onto a kɔlɔ totondjaka diangɔ dia kɔlɔ oma lo eombelo ka kɔlɔ kele l’otema ande, nɛ dia oma l’efula k’akambo wele l’otema mbatɔtɛkɛtaka onyɔ.+

46 “Lande na katonyombetaka nyate: ‘Nkumadiɔndjɔ, Nkumadiɔndjɔ,’ ko hanyosale kɛnɛ katami?+ 47 Onto tshɛ laya le mi, loka ɛtɛkɛta ami ndo lawakitanyiya, dimi layanga nyɛnya woho w’onto wende:+ 48 Nde ekɔ oko onto lele lam’akandake luudu, nde akatshime etale ko nde lika laadiko dia dive. Ko lam’akaye elola, ashi wakakɔmama lo luudu lakɔ, koko lam’ele lɔ lakakama dimɛna,+ lɔ konyukɔ. 49 Lo wedi okina, onto tshɛ loka ko hakitanyiya,+ ekɔ oko onto lakake luudu lo lɔsɛnga aha la etshina. Ashi wakakɔmama lɔkɔ, ko lɔ lakanyukɔ mbala kakɔ ɔtɔi ndo lakahandjɔ vwa.”