Ondaki
9 Ko dimi lakalame akambo asɔ tshɛ lo otema ndo lakayota dia anto w’ɛlɔlɔ la akanga wa lomba, mbidja ndo elimu awɔ wekɔ lo anya wa Nzambi ka mɛtɛ.+ Anto haweye ngandji ndo lohetsho lakonge la ntondo kawɔ. 2 Vɔ tshɛ wekɔ la ekomelo* kaamɛ,+ kanga losembwe la kanga kɔlɔ,+ onto ɔlɔlɔ ndo la pudipudi la onto la mindo, wanɛ walambola la wanɛ wahalambola elambo. Onto ɔlɔlɔ ekɔ woho ɔtɔi la otshi wa pɛkato; onto latshiba ekɔ woho ɔtɔi la ɔnɛ lele la yewo dia ntshiba. 3 Dui dimɔtshi diasha paa diasalema l’ɛse olongo diɔ nɛ: Lam’ele vɔ tshɛ wekɔ la etombelo* waamɛ,+ etema w’anto wambolola la kɔlɔ; ndo awui wele oko wa kanga dadi wekɔ lo etema awɔ lo nshi ya lɔsɛnɔ lawɔ, oma laasɔ vɔ mvɔka!*
4 Elongamelo kekɔ le onto tshɛ lasɛna, nɛ dia mfɔ kasɛna ndeka ntambwɛ kambovɔ.+ 5 Wanɛ wasɛna mbeyaka dia vɔ wayovɔ,+ koko wanɛ wambovɔ haweye ndooko dikambo,+ ndo vɔ ndooko la difuto, nɛ dia eohwelo kawɔ tshɛ kambohamɛ.+ 6 Ndo nto, ngandji kawɔ, lohetsho lawɔ ndo kandjema kawɔ kamboshila ndanyema, ndo ndooko kakokawɔ nsala nto lo kɛnɛ kasalema l’ɛse olongo.+
7 Tshɔka tole diangɔ diayɛ l’ɔngɛnɔngɛnɔ ndo tɔnɔ wanu ayɛ la otema+ w’ɔngɛnɔngɛnɔ, nɛ dia Nzambi ka mɛtɛ amboshila ngɛnangɛna elimu+ ayɛ. 8 Ahɔndɔ ayɛ wongake tena tshɛ wɛma,* ndo tohɛke mbitɛ esɔ lo ɔtɛ+ ayɛ. 9 Ngɛnangɛna lɔsɛnɔ kaamɛ la wadɛyɛ+ la ngandji lo nshi tshɛ ya lɔsɛnɔ layɛ l’anyanya lakandakosha l’ɛse olongo, lo nshi yayɛ tshɛ y’anyanya, nɛ dia ɔsɔ kele yema yayɛ lo lɔsɛnɔ ndo lo olimu ayɛ wa wolo wɛnayɛ paa l’ɛse olongo.+ 10 Kɛnɛ tshɛ kɛna lonya layɛ dia nsala, salatɔ la wolo ayɛ tshɛ, nɛ dia ndooko olimu kana kanyi kana ewo kana lomba lele lo Diombo*+ lɛnɛ atayatshu.
11 Dimi lakɛnyi dui dikina l’ɛse olongo, dia aha wanɛ wadja lowango mbatodjaka nshi tshɛ otshumba, aha akanga wa wolo mbalɛndja ta,+ aha akanga wa lomba mbonga nshi tshɛ la mbo ya ndɛ, aha akanga wa yimba mbonga nshi tshɛ ɛngɔnyi,+ ndo aha wanɛ wele la ewo mbatondoya+ nshi tshɛ, nɛ dia tena ndo awui wa shashimoya* mbakomɛka vɔ tshɛ. 12 Nɛ dia onto heye etena+ kande. Oko watondamaka lose lo ɔtɛyi wadiaka ndo oko watondamaka tofudu lo djonga, ngasɔ mbatondamaka ana w’anto etena ka mpokoso lam’awakomɛtɔ la shashimoya.
13 Dimi lakɛnyi nto dui nɛ lo dikambo dia lomba l’ɛse olongo, ndo diɔ diakamambiya: 14 Osomba ɔmɔtshi wa tshitshɛ waki la apami yema tshitshɛ lɔkɔ; ko nkumekanga ka wolo akaye ndjɔɔlɔsha, ko akawodinge ndo akake longele la woke dia dinga osomba akɔ. 15 Pami kɛmɔtshi kaki wola koko aki la lomba aki lɔkɔ ndo nde akashimbɛ osomba akɔ oma lo lomba lande. Koko ndooko onto lakohɔ ose wola+ ɔsɔ. 16 Ko dimi lakayatɛ dimɛ nte: ‘Lomba ndeka wolo+ dimɛna; koko lomba l’ose wola mɔnywamaka, ndo anto hawohokamɛ ɛtɛkɛta ande.’+
17 Ndeka dimɛna mpokamɛ ɛtɛkɛta wa lotutsha w’akanga wa lomba lo dihole dia ekoko w’onto lolɛ l’atei w’akanga wa dinginya.
18 Lomba ndeka dihomɔ dia ta dimɛna, koko otshi wa pɛkato ɔtɔi koka ndanya ɔlɔlɔ w’efula.+