Danyɛlɛ
9 Lo ɔnɔnyi wa ntondo w’ɛlɔmbwɛlɔ ka Dariyo+ ɔna Ahasuɛrɔ, kanula y’ase Mediya ɔnɛ lakawadje nkumekanga lo diolelo di’ase Kaladiya,+ 2 ɛɛ, lo ɔnɔnyi wa ntondo w’ɛlɔmbwɛlɔ kande, dimi Danyɛlɛ lakashihodia oma lo ekimanyielo ka abuku* lofulo la ɛnɔnyi wakafunde omvutshi Jɛrɛmiya lo ɔtɛkɛta wa Jehowa dia nshidiya olanyelo wa Jɛrusalɛma,+ mbuta ate ɛnɔnyi 70.+ 3 Ko dimi lakakadimola elungi kami otsha le Jehowa Nzambi ka mɛtɛ, lo mbɔsɛngasɛnga lo dɔmbɛlɔ kaamɛ la ekilelo ka mbo ya ndɛ,+ la dikoto ndo la otoko. 4 Dimi lakalɔmbɛ Jehowa Nzambi kami, lakashola pɛkato ndo lakate nte:
“Jehowa Nzambi ka mɛtɛ le, Wɛ lele woke ndo lokama wɔma, Ɔnɛ lalama sheke yande ndo lɛnya ngandji kande ka kɔlamelo+ le wanɛ wawoka ngandji ndo wakitanyiya wadjango+ ande, 5 sho takasale pɛkato, takasale kɔlɔ, takasale akambo lo yoho ya kɔlɔ ndo takatɔmbɔkɔ;+ takatakɔ wadjango ayɛ ndo dombwelo diayɛ. 6 Sho kompokamɛ ekambi ayɛ amvutshi+ wanɛ wakatɛkɛta lo lokombo layɛ le nkumi ya dikanga yaso, le ewandji aso, le watshɛso ndo le anto tshɛ wa lo wodja. 7 Jehowa le, wɛ kele la losembwe, koko sho tekɔ la nsɔnyi* oko wediɔ ɛlɔ kɛnɛ le ase Juda, ase Jɛrusalɛma ndo le Isariyɛlɛ w’otondo, wanɛ wele suke ndo wanɛ wele etale lo wedja tshɛ wakayaadianganya l’ɔtɛ wakiwɔ komonga la kɔlamelo le yɛ.+
8 “Jehowa le, sho, nkumi ya dikanga yaso, ewandji aso ndo watshɛso mbele la nsɔnyi,* nɛ dia takakosalɛ pɛkato. 9 Jehowa Nzambi kaso kele la kɛtshi ndo la edimanyielo,+ nɛ dia sho takɔtɔmbɔkwɛ.+ 10 Sho kokitanyiya dui dia Jehowa Nzambi kaso lo nkitanyiya ɛlɛmbɛ ande wakandakitsha la ntondo kaso lo tshimbo ya ekambi ande amvutshi.+ 11 Isariyɛlɛ w’otondo wakahindola Ɛlɛmbɛ ayɛ ndo wakakooke ɔkɔngɔ lo ntona nkitanyiya dui diayɛ, diakɔ diele wɛ akatotshulolɛ mananu ndo akatshibe etshibelo kofundami lo Ɛlɛmbɛ wa Mɔsɛ okambi wa Nzambi+ ka mɛtɛ, nɛ dia sho takakosalɛ pɛkato. 12 Wɛ akakotsha ɛtɛkɛta ayɛ wakayate lo dikambo diaso,+ lo dikambo dia ewandji aso wakatɔlɔmbɔlaka* lo tela mpokoso ka woke, ndooko dui diakasalema l’ɛse olongo w’otondo oko nɛ diakasalema la Jɛrusalɛma.+ 13 Oko wofundamidiɔ lo Ɛlɛmbɛ wa Mɔsɛ, mpokoso kɛsɔ tshɛ kambotokomɛ,+ koko sho tatalɔmbɛ dia wɛ Jehowa Nzambi kaso toka kɛtshi* lo ntshika munga+ kaso ndo lo monga la shɛnɔdi lo mɛtɛ* kayɛ.
14 “Ɔnkɔnɛ, Jehowa akasɛnaka wolo ndo akatela mpokoso, nɛ dia Jehowa Nzambi kaso ekɔ la losembwe lo elimu tshɛ wasalande; koko sho kokitanyiya dui diande.+
15 “Kakianɛ, Jehowa Nzambi kaso le, Wɛ lakatondja anto ayɛ oma lo wodja wa Edjibito la lonya la wolo+ ndo lakayasalɛ lokombo dikambo diayɛ wɛmɛ polo ndo lushi l’ɛlɔ,+ sho takasale pɛkato ndo takasale kɔlɔ. 16 Jehowa le, lam’alangayɛ, lo ndjela etsha ayɛ tshɛ wa losembwe,+ nkɛlɛ ndo odudu ayɛ wamɔ oma lo osomba wa Jɛrusalɛma, dikona diayɛ di’ekila; nɛ dia l’ɔtɛ wa pɛkato yaso ndo munga ya watshɛso, Jɛrusalɛma ndo anto ayɛ waya ɛngɔ ka diɔnyɔ le wanɛ tshɛ wotodingi.+ 17 Ndo kakianɛ, Nzambi kaso le, ohokame dɔmbɛlɔ dia okambi ayɛ ndo ɛsɛngɔsɛngɔ ande ndo sala dia elungi kayɛ mpɛta lo tɛmpɛlɔ k’ekila+ kaya tɔngɔ to,+ l’ɔtɛ wa wahɔ ayɛ wɛ Jehowa. 18 Nzambi le, ohokɛ toyi ndo ohokame! Odihole washo ayɛ kele ɛnyi woho wambototshikala tɔngɔ to ndo osomba wakelamɛka lo lokombo layɛ; nɛ dia aha l’ɔtɛ wa etsha aso w’ɛlɔlɔ mbakɔsɛngasɛngaso koko l’ɔtɛ wa kɛtshi kayɛ k’efula.+ 19 Jehowa le, ohokame. Jehowa le, odimanyiya.+ Jehowa le, odje yimba ndo osale dui dimɔtshi! Nzambi kami le, totshimbatshimbake l’ɔtɛ ayɛ wɛmɛ, nɛ dia lokombo layɛ hita lakelamɛ lo osomba ayɛ ndo le anto ayɛ.”+
20 Etena kakamatɛkɛtaka, kakamalɔmbaka ndo kakamasholaka pɛkato kami la pɛkato ka anto ami w’ase Isariyɛlɛ ndo kakamalɔmbaka dia mbokama kɛtshi la ntondo ka Jehowa Nzambi kami lo kɛnɛ kendana la dikona di’ekila dia Nzambi+ kami, 21 ɛɛ, etena kakamatɛkɛtaka lo dɔmbɛlɔ, Ngabriyɛlɛ,+ pami kakamɛnyi ntondo lo ɛnɛlɔ+ akaye le mi etena kakamalɛmbɛ efula, otsha lo wonya wa olambo wa woshasha wa dikɔlɔ. 22 Ko nde akambisha yimba, ata ate:
“Danyɛlɛ le, wonya ɔnɛ dimi lamboya dia ndjokosha shɛnɔdi ndo yimba. 23 Etena kakayatatɛ nsala dɔmbɛlɔ diayɛ, ɔtɛkɛta wakatombe ndo dimi lakaye dia ndjokotɛwɔ, nɛ dia wɛ ekɔ onto lele la nɛmɔ efula.*+ Ɔnkɔnɛ, dja yimba lo dikambo nɛ kele oshihodia ɛnɛlɔ kakɔ.
24 “Mingu* 70 yakashikikɛma dikambo dia anto ayɛ ndo dia osomba ayɛ w’ekila,+ dia nkomiya kɔlɔ, dia nshidiya pɛkato,+ dia nkomba munga,+ dia mbela losembwe+ la pondjo, dia ndiha ɛnɛlɔ ndo prɔfɛsiya*+ ndo dia nkita Okilami wa Ekilami* esɔ. 25 Wɛ pombaka mbeya ndo nshihodia dia ntatɛ lo otombelo w’ɔtɛkɛta wa nɔngɔsɔla ndo mbika Jɛrusalɛma+ nto polo le Mɛsiya*+ Ɔnɔmbɔdi,+ ayonga mingu 7 ndo nto mingu 62.+ Yɔ yayɔlɔngɔsɔma ndo yayokama nto kaamɛ la sɛkɛ dia woke ndo difuku dia woke, koko lo tena dia paa.
26 “Ndo l’ɔkɔngɔ wa mingu 62, Mɛsiya ayonyɛma*+ aha la ɛngɔ lo dikambo diande.+
“Ndo anto wa owandji ɔmɔtshi wayaye wayolanya osomba ndo dihole di’ekila.+ Ndo vɔ wayokomɛ lo ndanyema la elola. Ndo polo lo ekomelo ayongaka ta; kɛnɛ kakashikikɛma ele elanyelo.+
27 “Ndo nde ayolama sheke yahatatɔ dikambo dia anto efula l’edja ka lomingu 1; ndo l’atei wa lomingu, nde ayosala diaha olambo ndo olambo wa woshasha kimɔma nto.+
“Ndo lo dihafu dia diangɔ dia wɔnɔnyi, ayonga ɔnɛ latonga elanyelo;+ ndo polo l’oshilelo w’oshiki, kɛnɛ kakashikikɛma kayohongɔma ndo le ɔnɛ lambolanyema.”