Etsha
22 “Analengo ndo waa papa, nyohokame nyote kɛnɛ kakatombe.”+ 2 Lam’akawoke nde awatɛ l’ɔtɛkɛta wa Hɛbɛru, vɔ tshɛ wakaleke mbɔlama yɔɔ ko nde akate ate: 3 “Dimi lekɔ ose Juda+ lakotɔ la Taraso ka la Kilikiya+ ndo laketshama dimɛna l’osomba ɔnɛ l’ekolo wa Ngamaliyɛlɛ,+ laketshama lo ndjela kɛnɛ kalɔmba Ɛlɛmbɛ+ wa watshɛso ndo laki l’ohetoheto le Nzambi oko wenyu la wɔ nyu tshɛ ɛlɔ kɛnɛ.+ 4 Dimi lakahɛnyahɛnyaka Mboka kɛnɛ polo lo nyɔi, lakakelekaka ndo lakadjaka wamato ndo apami lo nkanu,+ 5 oko wakoka ɛlɔmbɛdi a laadiko la olui wa dikumanyi monga ɛmɛnyi lo dikambo diami. Ndo lakakondja mikanda oma le wɔ dia ntshɔ le anangɛso wa la Damasɛkɛ ndo lakatatshɔka lɛkɔ dia towakeleka ko mbaela la Jɛrusalɛma dia ndjowasha dilanya.
6 “Koko lam’akamatatshɔka ndo lam’akimi suke la nkoma la Damasɛkɛ, oya lo midi, mbala kakɔ ɔtɔi osase wa wolo wakahɛtɛ oma l’olongo lo dihole diakimi,+ 7 ko dimi lakakɔ la nkɛtɛ ndo lakoke dui diambutɛ ɔnɛ: ‘Saolo, Saolo, lande na kampɛnyahɛnyayɛ?’ 8 Dimi lakakadimola nte: ‘Nkumadiɔndjɔ, wɛ na?’ Nde akambutɛ ate: ‘Dimi Yeso y’ose Nazarɛtɛ kahɛnyahɛnyayɛ.’ 9 Apami wakatatshɔka kaamɛ la mi wakɛnyi osase, koko vɔ komboka dui dia ɔnɛ lakatɛkɛtaka la mi. 10 Ko dimi lakate nte: ‘Ahombami nsala na, Nkumadiɔndjɔ?’ Nkumadiɔndjɔ akambutɛ ate: ‘Emala, tshɔka la Damasɛkɛ ko wayotokotɛ lɛkɔ akambo tshɛ wahombayɛ nsala.’+ 11 Koko lam’ele dimi kokoka mɛna kaanga ɛngɔ nɛ dia osase waki wolo efula, wanɛ wakatatshɔka la mi mbakakimɛ lo lonya polo la Damasɛkɛ.
12 “Ko Ananiya, pami kakokaka Nzambi wɔma lo ndjela Ɛlɛmbɛ ndo kele ase Juda tshɛ waki lɛkɔ wakatɛkɛtaka dimɛna lo dikambo diande, 13 akaye le mi. Nde akemala suke la mi ndo akambutɛ ate: ‘Saolo ɔnalengo, sɛna!’ Ko wonya akɔ dimi lakende ndo lakawɛnyi.+ 14 Nde akate ate: ‘Nzambi ka watshɛso ambokɔsɔna dia wɛ mbeya lolango lande ndo dia wɛ mɛna ɔnɛ lele la losembwe+ ndo dia wɛ mboka dui di’oma l’onyɔ ande, 15 nɛ dia wɛ pombaka monga ɔmɛnyi lo dikambo diande le anto tshɛ dia mbewoya akambo tshɛ wamboyɛna ndo wamboyoka oma le nde.+ 16 Ko atshimbatshimbayɛ nto? Emala, batizama ndo ɛdiama oma lo pɛkato yayɛ+ lo mbelɛ* lokombo lande.’+
17 “Koko lam’akamakalola la Jɛrusalɛma+ ndo lam’akamalɔmbaka lo tɛmpɛlɔ, dimi lakandama la nende. 18 Lakɛnyi nde ambutɛ ate: ‘Totshimbatshimbake, tomba esadi oma la Jɛrusalɛma, nɛ dia vɔ hawotetawɔ kɛnɛ kasambishayɛ lo dikambo diami.’+ 19 Ko dimi lakate nte: ‘Nkumadiɔndjɔ, vɔamɛ mbeyaka dimɛna dia dimi lakɔtɔka lo shinangɔnga tshɛ, lakadjaka wanɛ waki la mbetawɔ le yɛ+ lo lokanu ndo lakaakɔmɔlaka, 20 ndo lam’akakɛdiama dikila dia Stɛfano k’ɔmɛnyi ayɛ, dimi laki laawɔ, laketawɔ dikambo sɔ ndo lakalamaka ahɔndɔ wa laadiko wa wanɛ wakoodiake.’+ 21 Ko nde akambutɛ ate: ‘Tshɔka, nɛ dia dimi layokotoma etale le ase wedja.’”+
22 Vɔ wakatetemala mbohokamɛ polo lam’akandate dui sɔ. Oma laasɔ, vɔ wakate la dui dia wolo vate: “Nya onto ɔnɛ oma la nkɛtɛ, nɛ dia nde hakoke ntshikala la lɔsɛnɔ!” 23 Lam’ele vɔ wakahangɔhangɔka ndo wakokaka ahɔndɔ awɔ wa laadiko ndo ditshu l’olongo,+ 24 kɔmanda k’asɔlayi akatɛ Pɔɔlɔ dia nde mbɔtɔ lo mpango k’asɔlayi ndo nde akate dia vɔ mbɔkɔmɔla mfimbɔ kele nde ososɔ akambo l’oyango wa nde mbeya mɛtɛ lande na kakahangɔhangɔka anto ngasɔ lo dikambo dia Pɔɔlɔ. 25 Koko lam’akawoolasha dia mbɔkɔmɔla, Pɔɔlɔ akambola owandji w’asɔlayi waki laawɔ ate: “Onde nyekɔ la lotshungɔ la nkɔmɔla ose Rɔmɔ laha la onongo?”*+ 26 Lam’akoke owandji w’asɔlayi dikambo sɔ, nde akatshu le kɔmanda k’asɔlayi ndo akatowotɛ ate: “Alangayɛ nsala? Pami kɛnɛ ekɔ ose Rɔmɔ.” 27 Ko kɔmanda k’asɔlayi akasukana lale Pɔɔlɔ ndo akawombola ate: “Ombutɛ, onde wɛ ekɔ ose Rɔmɔ?” Nde akate ate: “Eelo.” 28 Kɔmanda k’asɔlayi akawotɛ ate: “Dimi lakasombe lotshungɔ la monga ose Rɔmɔ la falanga y’efula.” Pɔɔlɔ akate ate: “Koko dimi lekɔ ose Rɔmɔ la lootɔ.”+
29 Ko mbala kakɔ ɔtɔi, apami waki suke la mbɔkɔmɔla dia nde mbososɔ akambo wakahandjɔ oma lalende, ko kɔmanda k’asɔlayi akoke wɔma lo woho wakandeye dia nde ekɔ ose Rɔmɔ ndo wakandokeleka mɔlɔla.+
30 Ɔnkɔnɛ, la wedi a pindju, lam’ele nde akalangaka mbeya l’eshikikelo tshɛ lande na kakofundaka ase Juda, nde akookelekola ndo akatɛ ewandji w’ɛlɔmbɛdi ndo ase tominadi ta laadiko t’ase Juda tshɛ dia vɔ nsangana. Ko nde akaholoya Pɔɔlɔ ndo akawemɛ l’atei awɔ.+