1 Nkumi ya dikanga

16 Oma laasɔ, ɔtɛkɛta wa Jehowa wakaye le Jehu+ ɔna Hanani+ lo dikambo dia Baasha ɔnɛ: 2 “Dimi lakaketola oma lo ditshu ndo lakaketɛ ɔnɔmbɔdi wa wodja ami Isariyɛlɛ,+ koko wɛ akatetemala nkɛndakɛnda lo mboka ka Jɛrɔbɔama ndo wɛ akakonya wodja ami Isariyɛlɛ dia nsala pɛkato dia vɔ mbotshami nkɛlɛ l’ɔtɛ wa pɛkato yawɔ.+ 3 Ɔnkɔnɛ, dimi layanga mɔmba Baasha la luudu lande ndo dimi layetɛ luudu lande oko luudu la Jɛrɔbɔama+ ɔna Nebatɛ. 4 Oseka Baasha tshɛ layovɔ l’osomba, mfɔ yayowɔlɛ, ndo onto ande tshɛ layovɔ l’oswe, tofudu ta l’olongo tayowɔlɛ.”

5 Lo kɛnɛ kendana l’etenyi kekina k’ɔkɔndɔ wa Baasha, kɛnɛ kakandasale ndo wolo ande, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 6 Oma laasɔ, Baasha aketama dia momuya kaamɛ la watshɛnde ndo wakookundɛ la Tiriza,+ ko Ela ɔnande akayala nkumekanga lo dihole diande. 7 Ndo nto, lo tshimbo y’omvutshi Jehu ɔna Hanani, ɔtɛkɛta wa Jehowa wakaye lo dikambo dia Baasha ndo luudu lande, vɔ tshɛ l’ɔtɛ wa kɔlɔ tshɛ yakandasale lo washo wa Jehowa lo mbookiya nkɛlɛ la olimu w’anya ande, lo monga oko luudu la Jɛrɔbɔama ndo l’ɔtɛ wakandoodiake.*+

8 L’ɔnɔnyi wa 26 w’ɛlɔmbwɛlɔ ka Asa nkumekanga ka Juda, Ela ɔna Baasha akayala nkumekanga k’Isariyɛlɛ lo Tiriza ndo nde akolɛ l’edja k’ɛnɔnyi 2. 9 Okambi ande Zimiri, owandji wa k’ahende ɔtɔi k’asɔlayi ande wakɛndakɛnda lo pusupusu akawɔtwɛ sheke etena kakinde la Tiriza anɔ wanu ndo adjɔ lo luudu la Arɛza laki owandji w’ase luudu la la Tiriza. 10 Zimiri akɔtɔ, akɔɔkɔmɔla+ ko akoodiake lo ɔnɔnyi wa 27 w’ɛlɔmbwɛlɔ ka Asa nkumekanga ka Juda, ko nde akayala nkumekanga lo dihole diande. 11 Lam’akandonge nkumekanga, kam’akandadjasɛ lo kiti kande ka lowandji, nde akadiake ase luudu la Baasha tshɛ. Nde kontshika kaanga pami* 1 la lɔsɛnɔ, oyadi ewotɔ* ande kana angɛnyi ande. 12 Ɔnkɔnɛ, Zimiri akashile luudu l’otondo la Baasha oshiki lo ndjela ɔtɛkɛta wa Jehowa wakandate lo tshimbo y’omvutshi Jehu lo dikambo dia Baasha.+ 13 Dui sɔ diakasalema l’ɔtɛ wa pɛkato tshɛ yakasale Baasha nde la Ela ɔnande ndo pɛkato yakandakonya Isariyɛlɛ dia nsala lo mbokiya Jehowa Nzambi k’Isariyɛlɛ nkɛlɛ la dikishi diawɔ di’anyanya.+ 14 Lo kɛnɛ kendana l’etenyi kekina k’ɔkɔndɔ wa Ela ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ?

15 L’ɔnɔnyi wa 27 w’ɛlɔmbwɛlɔ ka Asa nkumekanga ka Juda, Zimiri akayala nkumekanga la Tiriza l’edja ka nshi 7 etena kakake asɔlayi mpango kawɔ dia ndɔsha Ngibɛtɔna+ k’ase Filistiya. 16 L’etena kɛsɔ, elui w’asɔlayi wakake mpango kawɔ wakoke wata ɔnɛ: “Zimiri ambodja sheke ndo ambodiaka nkumekanga.” Ko ase Isariyɛlɛ tshɛ waketɛ Omiri+ laki owandji w’asɔlayi nkumekanga k’Isariyɛlɛ lushi lɔsɔ lo mpango. 17 Omiri nde l’ase Isariyɛlɛ tshɛ waki kaamɛ la nde wakadɛ oma la Ngibɛtɔna ko wakatodinga Tiriza. 18 Lam’akɛnyi Zimiri dia osomba wambɔsama, nde akɔtɔ lo tshoto ya lo luudu* la nkumekanga lodingami la mpele ndo akayatshumbe la luudu, ko akavu.+ 19 Dui sɔ diakasalema l’ɔtɛ wa pɛkato yande hita yakandasale lo nsala kɛnɛ kaki kɔlɔ lo washo wa Jehowa lo nkɛndakɛnda lo mboka ka Jɛrɔbɔama, ndo l’ɔtɛ wa pɛkato kakandakonya Isariyɛlɛ dia nsala.+ 20 Lo kɛnɛ kendana l’etenyi kekina k’ɔkɔndɔ wa Zimiri ndo sheke yakandadje, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ?

21 L’etena kɛsɔ mbakakakitɔna ase Isariyɛlɛ lo tenyi 2. Etenyi kɛmɔtshi k’anto wakayele Tibini ɔna Nginata ko wakalange mbeetɛ nkumekanga, ndo etenyi kekina wakayele Omiri. 22 Koko anto wakayele Omiri wakalɛndja anto wakayele Tibini ɔna Nginata. Ko Tibini akavu ndo Omiri akayala nkumekanga.

23 L’ɔnɔnyi wa 31 w’ɛlɔmbwɛlɔ ka Asa nkumekanga ka Juda, Omiri akayala nkumekanga k’Isariyɛlɛ ndo nde akolɛ l’edja k’ɛnɔnyi 12. Nde akolɛ la Tiriza l’edja k’ɛnɔnyi 6. 24 Nde akasombe dikona dia Samariya oma le Shemɛrɛ la talata* 2 ya mfɛsa ko nde akake osomba lo dikona diakɔ. Nde akɔlɛ osomba akɔ wakandake ɔnɛ Samariya,*+ lokombo la Shemɛrɛ laki kanga* dikona diakɔ. 25 Omiri akatetemala nsala kɛnɛ kaki kɔlɔ lo washo wa Jehowa ndo nde aki kɔlɔ efula ndeka wanɛ tshɛ waki la ntondo kande.+ 26 Nde akakɛndakɛnda lo mboka tshɛ yaki Jɛrɔbɔama ɔna Nebatɛ ndo lo pɛkato kakandakonya Isariyɛlɛ dia nsala lo mbokiya Jehowa Nzambi k’Isariyɛlɛ nkɛlɛ la dikishi diawɔ di’anyanya.+ 27 Lo kɛnɛ kendana l’etenyi kekina k’ɔkɔndɔ wa Omiri, kɛnɛ kakandasale ndo akambo wa wolo wakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 28 Oma laasɔ, Omiri aketama dia momuya kaamɛ la watshɛnde ko wakookundɛ la Samariya, ko ɔnande Ahaba+ akayala nkumekanga lo dihole diande.

29 Ahaba ɔna Omiri akayala nkumekanga k’Isariyɛlɛ l’ɔnɔnyi wa 38 w’ɛlɔmbwɛlɔ ka Asa nkumekanga ka Juda ndo Ahaba ɔna Omiri akolɛ Isariyɛlɛ ɛnɔnyi 22 la Samariya.+ 30 Ahaba ɔna Omiri aki kɔlɔ efula lo washo wa Jehowa ndeka wanɛ tshɛ waki la ntondo kande.+ 31 Laadiko dia nkɛndakɛnda lo pɛkato ya Jɛrɔbɔama+ ɔna Nebatɛ, nde akatshuke ndo Jezabɛlɛ+ ɔna Etibala nkumekanga k’ase Sidɔna,+ ko nde akatatɛ kambɛ Baala+ ndo mbokusamɛ. 32 Ndo nto, nde akasale elambwelo dikambo dia Baala+ lo luudu* la Baala lakandake la Samariya. 33 Laadiko dia laasɔ, Ahaba akasale kimɛta ka l’osongo.*+ Ahaba akasale akambo efula dia mbokiya Jehowa Nzambi k’Isariyɛlɛ nkɛlɛ oleki nkumi ya dikanga y’Isariyɛlɛ tshɛ yaki la ntondo kande.

34 Lo nshi yande, Hiyɛlɛ ose Bɛtɛlɛ akanyomoka Jeriko. Abirama ɔnande l’enondo akavu lam’akandasale etshina kayɔ, ndo Sengubɛ ɔnande la kose akavu lam’akandasale nkuke yayɔ, lo ndjela ɔtɛkɛta wakate Jehowa lo tshimbo ya Jashua ɔna Nuna.+