1 Nkumi ya dikanga

18 L’ɔkɔngɔ w’etena kɛmɔtshi, lo ɔnɔnyi wa 3,+ ɔtɛkɛta wa Jehowa wakaye le Elidja ɔnɛ: “Tshɔka tɛnane la Ahaba ko dimi layɔlɔsha mvula laadiko dia nkɛtɛ.”+ 2 Ko Elidja akatshu tɛnana la Ahaba etena kaki ndjala wolo efula+ la Samariya.

3 L’etena kɛsɔ, Ahaba akelɛ Obadiya laki olami w’ase luudu lande. (Obadiya akokaka Jehowa wɔma w’efula, 4 ndo etena kakashilaka* Jezabɛlɛ+ amvutshi wa Jehowa oshiki, Obadiya akɔshi amvutshi 100, ko akawashɛ 50 lo wooko la wooko ndo nde akawashaka mbo ya ndɛ ndo ashi.) 5 Ko Ahaba akatɛ Obadiya ate: “Eteta lo wodja lo tɛkɔ di’ashi tshɛ ndo lo ekidi tshɛ. Ondo sho koka ntana adiyo kambe dia mfalasa la mfalo yaso ntshikala la lɔsɛnɔ, ndo diaha nyama yaso tshɛ mvɔ.” 6 Ɔnkɔnɛ vɔ wakakahana wodja lam’asawɔ lo ahole wakawahombe mbeteta. Ahaba akatshu ndamɛ lo wedi ɔmɔtshi ndo Obadiya akatshu ndamɛ lo wedi okina.

7 Lam’akatatshɔka Obadiya, Elidja akahomana la nde. Mbala kakɔ ɔtɔi nde akaweye ndo akayakɔsha ekukumadi, ko akate ate: “Nkumɛmi Elidja+ le, ɔnɛ wɛ?” 8 Nde akookadimola ate: “Eelo dimi. Tshɔka tote nkumɛyɛ wate: ‘Elidja ekɔ lanɛ.’” 9 Koko nde akate ate: “Pɛkato kakɔna kamomosala katoyokimɔ okambi ayɛ le Ahaba dia nde ndjakami? 10 Lo mɛtɛ oko wele Jehowa Nzambi kayɛ la lɔsɛnɔ, ndooko wodja kana diolelo diele nkumɛmi atatome anto dia tokoyanga. L’ɔkɔngɔ wa vɔ mbuta vate: ‘Nde bu lanɛ,’ nde akatshibia diolelo ndo wodja dia vɔ hawokoke kɛna.+ 11 Wonya ɔnɛ wɛ ota wate: ‘Tshɔka tote nkumɛyɛ wate: “Elidja ekɔ lanɛ.”’ 12 Lam’ayomomɔ oma laleyɛ, nyuma ka Jehowa kayokɛmba+ otsha lo dihole diahamateya, ndo lam’ayomotɛ Ahaba ko nde hakɛnyi, lo mɛtɛ nde ayondjaka. Koko okambi ayɛ ookokaka Jehowa wɔma oma ko dikɛnda diande. 13 Onde nkumɛmi ateye kɛnɛ kakamasale lam’akadiakaka Jezabɛlɛ amvutshi wa Jehowa, woho wakamashɛ amvutshi wa Jehowa 100 lo elui wa 50 lo wooko la wooko, ko mbatɔlɛka mbo ya ndɛ ndo ashi?+ 14 Koko wonya ɔnɛ wɛ ota wate: ‘Tshɔka tote nkumɛyɛ wate: “Elidja ekɔ lanɛ.”’ Lo mɛtɛ nde ayondjaka.” 15 Ko Elidja akate ate: “Lo mɛtɛ oko wele Jehowa kanga lolembelembe lakambɛmi* la lɔsɛnɔ, dimi layɛnana la nde ɛlɔ.”

16 Ɔnkɔnɛ Obadiya akatshu tɛnana la Ahaba ndo akatowotɛ, ko Ahaba akatshu tɛnana la Elidja.

17 Kam’akɛnyi Ahaba Elidja, nde akawotɛ ate: “Shi wɛ kambosoya* Isariyɛlɛ lo yɛdikɔ y’efula?”

18 Ko nde akawotɛ ate: “Dimi hansoyisha Isariyɛlɛ, koko wɛ la luudu la shɔ mbaasoya lo mɔnyɔla ɛlɛmbɛ wa Jehowa ndo lo ndjela waa Baala.+ 19 Kakianɛ, ontshumanye ase Isariyɛlɛ tshɛ lo Dikona dia Karamɛlɛ+ kaamɛ l’amvutshi 450 wa Baala ndo amvutshi 400 wa kimɛta ka l’osongo,*+ wanɛ walɛ lo mɛsa wa Jezabɛlɛ.” 20 Ko Ahaba akatomɛ ase Isariyɛlɛ tshɛ dui ndo akatshumanya amvutshi lo Dikona dia Karamɛlɛ.

21 Oma laasɔ, Elidja akasukana la anto tshɛ ko akate ate: “Polo l’etena kakɔna kayonyotetemala mpakahaka lam’asa tokanyi 2?*+ Naka Jehowa kele Nzambi ka mɛtɛ, nyooyele.+ Ko naka Baala kele Nzambi ka mɛtɛ, nyooyele!” Koko anto kombokadimola ndooko dui. 22 Oma laasɔ, Elidja akatɛ anto ate: “Dimi oto kele omvutshi wa Jehowa wambotshikala,+ koko amvutshi wa Baala wekɔ anto 450. 23 Watosha ɛsɔngɔ 2 wa ngɔmbɛ kele vɔ wasɔnɛ ɔsɔngɔ ɔmɔtshi wa ngɔmbɛ, wɔɔsɛsɛ ndo wookitsha laadiko dia nkunyi, koko hawohombe mbidja dja lɔkɔ. Dimi layɔlɔngɔsɔla ɔsɔngɔ okina wa ngɔmbɛ ndo layowokitsha laadiko dia nkunyi, koko hantodja dja lɔkɔ. 24 Oma laasɔ, kanyeele* lokombo la nzambi kanyu,+ ndo dimi layeelɛ* lokombo la Jehowa. Nzambi kayokadimola lo ntoma dja ayɛnya dia nde kele Nzambi ka mɛtɛ.”+ Ko anto tshɛ wakakadimola vate: “Kɛnɛ katayɛ kekɔ dimɛna.”

25 Ko Elidja akatɛ amvutshi wa Baala ate: “Nyɔsɔnɛ ɔsɔngɔ ɔmɔtshi wa ngɔmbɛ kele nyowɔlɔngɔsɔlɛ ntondo, dikambo nyu mbele anto efula. Oma laasɔ ko nyu mbelɛ* lokombo la nzambi kanyu, koko tanyodjake dja lɔkɔ.” 26 Ɔnkɔnɛ, vɔ wakɔshi ɔsɔngɔ wa ngɔmbɛ wakawawasha, wakɔɔlɔngɔsɔla ndo wakatetemala mbelɛ* lokombo la Baala oma ko pindju polo la midi, wata vate: “Baala le, otokadimole!”+ Koko ndooko dui diakokɛma ndo ndooko okadimwelo. Vɔ wakatshumbɛka l’otshimbedi wa elambwelo kakawasale. 27 Oya lo midi, Elidja akatatɛ mbasɔka ate: “Nyowele la wolo anyu tshɛ! Shi nde ekɔ nzambi?+ Ondo nde ekɔ lo nkana yimba efula kana ambotshɔ lo nkomba.* Ko kana ondo ekɔ lo djɔ ndo ekɔ ohomba onto ɔmɔtshi mbeemula!” 28 Vɔ wakawelɛ la wolo awɔ tshɛ ndo wakayakɔtshakɔtsha tokuwa ndo akɔnga lo ndjela mbekelo kawɔ polo ndo dikila diawɔ diɔkɛlanɛ. 29 Laasɔ ko midi ambeta ndo vɔ wakatetemala ngayɔ* polo wonya watolambɔmaka olambo wa ntɔngɔ wa la dikɔlɔ, koko ndooko dui diakokɛma ndo ndooko okadimwelo. Ndooko onto lakadjaka yimba.+

30 L’edjedja ka wonya, Elidja akatɛ anto tshɛ ate: “Nyosukane lalemi.” Ko anto tshɛ wakasukana lalende. Oma laasɔ, nde akalɔngɔsɔla elambwelo ka Jehowa kakawahandjola.+ 31 Ko Elidja akɔshi ave 12 wɔtɔnɛ la lofulo la waoho w’ana wa Jakɔbɔ, ɔnɛ lele ɔtɛkɛta wa Jehowa wakaye le nde ndjowotɛ ɔnɛ: “Lokombo layɛ laya Isariyɛlɛ.”+ 32 Nde akasale elambwelo+ la ave akɔ lo lokombo la Jehowa. Oma laasɔ, nde akatshime difuku l’otshimbedi w’otondo wa elambwelo, dihole diaki woke wa monɛ tɛdikɔ 2 ta sea* ya ntɔngɔ. 33 L’ɔkɔngɔ wa laasɔ, nde akalɔngɛ nkunyi, akasɛsɛ ɔsɔngɔ wa ngɔmbɛ ndo akookitsha laadiko dia nkunyi.+ Ko nde akate ate: “Nyolodia ashi lo mbaka ya weke kele nyote lo olambo wa lotshumba ndo lo nkunyi.” 34 Oma laasɔ, nde akate ate: “Nyote nto.” Ko vɔ wakatɛ nto. Nde akate mbala kekina nto ate: “Nyonyomotɛ mbala ka 3.” Ko vɔ wakatɛ mbala ka 3. 35 Ashi wakakɛlanɛ l’otshimbedi w’otondo wa elambwelo ndo nde akalodia ashi lo difuku.

36 Oya lo wonya watolambɔmaka olambo wa ntɔngɔ wa la dikɔlɔ,+ omvutshi Elidja akatshu otsha la ntondo ko akate ate: “Jehowa Nzambi k’Abrahama,+ k’Isaka+ ndo k’Isariyɛlɛ le, ɛlɔ, ɛnya dia wɛ kele Nzambi lo Isariyɛlɛ, dia dimi lekɔ okambi ayɛ ndo dia lo ndjela ɔtɛkɛta ayɛ kasalami akambo anɛ tshɛ.+ 37 Jehowa le, onkadimole! Onkadimole dia anto anɛ mbeya dia wɛ Jehowa kele Nzambi ka mɛtɛ ndo dia wɛ ekɔ lo nkadimola etema awɔ oya le yɛ.”+

38 Ko dja ya Jehowa yakaholɔ oma l’olongo ko yakatshumbe olambo wa lotshumba,+ nkunyi, ave ndo ditshu, ndo yakonya ashi waki lo difuku.+ 39 Lam’akɛnyi anto tshɛ dui sɔ, aha la ntshimbatshimba vɔ wakayakɔsha ekukumadi ko wakate vate: “Jehowa kele Nzambi ka mɛtɛ! Jehowa kele Nzambi ka mɛtɛ!” 40 Ko Elidja akawatɛ ate: “Nyonde amvutshi wa Baala! Tanyotshikake kaanga 1 l’atei awɔ dia nde ndawɔ!” Ko vɔ wakawande ndo Elidja akaholɔ la wɔ l’okidi wa Kishɔna+ ko akaadiake lɛkɔ.+

41 Oma laasɔ, Elidja akatɛ Ahaba ate: “Dɛ, tshɔka tole ndo tɔnɔ, nɛ dia akungola wa mvula ngembe+ vɔ asɔ.” 42 Ɔnkɔnɛ Ahaba akadɛ dia tɔlɛ ndo tɔnɔ etena kakadɛ Elidja otsha la shɔdi ya Dikona dia Karamɛlɛ ndo kakandatonyama la nkɛtɛ, odjisha elungi kande lam’asa adwe ande.+ 43 Oma laasɔ, nde akatɛ okambi ande ate: “Lam’alangayɛ, dɛ kele enda otsha lo ndjale.” Ko nde akadɛ, akatenda ko akate ate: “Ndooko ɛngɔ.” Elidja akate mbala 7 ate: “Kalola.” 44 Mbala ka 7, okambi ande akate ate: “Ohenda, lambɛna dinge dia tshitshɛ oko diwambo dia lonya l’onto diayadɛ oma lo ndjale.” Ko nde akawotɛ ate: “Tshɔka tote Ahaba wate: ‘Lɔngɔsɔla pusupusu! Holɔ diaha mvula ndjokoshimba!’” 45 L’etena kɛsɔ, olongo wakahinde la wange, lɔpɛpɛ lakapɛpɛ ndo mvula ngembe kakalɔ.+ Ahaba akatetemala la lɔkɛndɔ lo pusupusu kande otsha la Jezɛrɛlɛ.+ 46 Koko lonya la Jehowa laki kaamɛ la Elidja, ko nde akakeleka dihɔndɔ diande lo* lokende ko akalawɔ la ntondo ka Ahaba lo mboka k’otondo k’otsha la Jezɛrɛlɛ.