2 Nkumi ya dikanga

3 Jɛhɔrama+ ɔna Ahaba akayala nkumekanga k’Isariyɛlɛ la Samariya lo ɔnɔnyi wa 18 w’ɛlɔmbwɛlɔ ka Jɛhɔshafata nkumekanga ka Juda, ndo nde akolɛ l’edja k’ɛnɔnyi 12. 2 Nde akatetemala nsala kɛnɛ kaki kɔlɔ lo washo wa Jehowa, koko aha polo lo yɛdikɔ yakasale she kana nyango, nɛ dia nde akanya kimɛta ka l’ave ka Baala kakatasadi she.+ 3 Koko nde akamamema pɛkato yakakonya Jɛrɔbɔama ɔna Nebatɛ Isariyɛlɛ dia nsala.+ Nde kondjitshika.

4 Mesha nkumekanga ka Mɔaba akalongaka ɛkɔkɔ ndo nde akafutaka nkumekanga k’Isariyɛlɛ ana w’ɛkɔkɔ nunu lokama (100 000) ndo ɛkɔkɔ wa waomi wewɔ watahembola wɛɔsa nunu lokama (100 000) oko olambo. 5 Kam’akavu Ahaba,+ nkumekanga ka Mɔaba akatɔmbɔkwɛ nkumekanga k’Isariyɛlɛ.+ 6 Ko lushi lɔsɔ, nkumekanga Jɛhɔrama akonɛɛ oma la Samariya ndo akatshumanya ase Isariyɛlɛ tshɛ. 7 Nde akatome ndo dikɛndji le Jɛhɔshafata nkumekanga ka Juda dia towotɛ ɔnɛ: “Nkumekanga ka Mɔaba ambɔntɔmbɔkwɛ. Onde wɛ ayotshɔ kaamɛ la mi dia tɔlɔsha Mɔaba?” Ko nde akate ate: “Layotshɔ.+ Dimi lekɔ oko wɛ. Anto ami wekɔ oko anto ayɛ. Mfalasa yami yekɔ oko mfalasa yayɛ.”+ 8 Ko nde akambola ate: “Lo mboka kakɔna kayototshɔ?” Nde akakadimola ate: “Lo mboka ka l’oswe wa Ɛdɔmɛ.”

9 Oma laasɔ, nkumekanga k’Isariyɛlɛ akatshu nde la nkumekanga ka Juda ndo nkumekanga k’Ɛdɔmɛ.+ L’ɔkɔngɔ wa vɔ minda lɔkɛndɔ la lotshimbo l’edja ka nshi 7, ashi komonga dikambo di’asɔlayi ndo dikambo dia dongalonga diakayayaka l’ɔkɔngɔ awɔ. 10 Nkumekanga k’Isariyɛlɛ akate ate: “Ande paa lɛ! Jehowa ambelɛ nkumi ya dikanga nyɛ 3 paka dia ndjaakimɔ lo anya w’ase Mɔaba!” 11 Ko Jɛhɔshafata akate ate: “Onde ndooko omvutshi wa Jehowa lanɛ wakokaso mimbola Jehowa kanyi+ lo tshimbo yande?” Ko okambi ɔmɔtshi wa nkumekanga k’Isariyɛlɛ akakadimola ate: “Elisha+ ɔna Shafata ekɔ. Nde kakatɛka Elidja ashi lo anya.”*+ 12 Oma laasɔ, Jɛhɔshafata akate ate: “Ɔtɛkɛta wa Jehowa wekɔ le nde.” Ɔnkɔnɛ, nkumekanga k’Isariyɛlɛ nde la Jɛhɔshafata ndo nkumekanga k’Ɛdɔmɛ wakaholɔ otsha le nde.

13 Elisha akatɛ nkumekanga k’Isariyɛlɛ ate: “Kakɔna kasami la yɛ?*+ Tshɔka le amvutshi wa shɔ ndo le amvutshi wa nyɔ.”+ Koko nkumekanga k’Isariyɛlɛ akawotɛ ate: “Keema, nɛ dia Jehowa kakele nkumi ya dikanga nyɛ 3 dia ndjaakimɔ lo anya w’ase Mɔaba.” 14 Ko Elisha akate ate: “Lo mɛtɛ oko wele Jehowa kanga lolembelembe lakambɛmi* la lɔsɛnɔ, otondongaka aha nɛmɔ diashami Jɛhɔshafata+ nkumekanga ka Juda, tshike totomokenda kaanga yema kana kodja yimba.+ 15 Nyombela opomi ɔmɔtshi wa lɔsɛsɛ.”*+ Kam’akatatɛ opomi wa lɔsɛsɛ mpoma, lonya la Jehowa lakaye le nde.+ 16 Nde akate ate: “Jehowa kata ate: ‘Nyotshime afuku afuku lo okidi ɔnɛ, 17 nɛ dia Jehowa kata ate: “Hanyotɛna lɔpɛpɛ ndo hanyotɛna mvula, koko okidi ɔnɛ wayolola la ashi+ ndo nyayɔnɔka ashi w’oma lɔkɔ nyu la dongalonga dianyu ndo nyama yanyu nkina.”’ 18 Koko ɔsɔ bu dikambo dia wolo lo washo wa Jehowa,+ nɛ dia nde ayokimɔ ndo ase Mɔaba lo anya anyu.+ 19 Nyu pombaka ndanya osomba tshɛ wele la mpele+ ndo osomba tshɛ woleki dimɛna. Kanyonyukole osongo tshɛ wa dimɛna, kanyotedia afuku tshɛ w’ashi ndo kanyolanya ɛtshi ka nkɛtɛ tshɛ ka dimɛna la ave.”+

20 La pindju, etena katolambɔmaka olambo wa ntɔngɔ+ wa la pindju, ashi wakaye la shashimoya oma lo wekeke wa Ɛdɔmɛ, ko ɛtshi ka nkɛtɛ kakɔ kakalole la ashi.

21 Ase Mɔaba tshɛ wakoke dia nkumi ya dikanga wamboya ndjaalɔsha, ko vɔ wakatshumanya apami tshɛ wakakokaka mɛmba dihomɔ dia ta,* ko wakemala lo olelo. 22 Lam’akawetɔ la pindju ka pɛɛ, esase wa yanyi wakahɛtaka lo ashi ndo le ase Mɔaba waki lo wedi okina, ashi akɔ wakɛnamaka beela oko dikila. 23 Vɔ wakate vate: “Ɔnɛ dikila! Ndooko onyake nkumi ya dikanga wambodiakana lam’asawɔ la lokuwa la ta. Ɔnkɔnɛ ase Mɔaba le, totshu dia tɔsa diangɔ dia dimbo!”+ 24 Lam’akawɔtɔ lo mpango k’ase Isariyɛlɛ, ase Isariyɛlɛ wakemala, ko wakatatɛ ndjaka ase Mɔaba wakatalawɔka.+ Vɔ wakasukana otsha la Mɔaba watadiake ase Mɔaba lam’akawatatshɔka. 25 Vɔ wakanyukola esomba ndo onto l’onto akoke dive lo ɛtshi ka nkɛtɛ tshɛ ka dimɛna polo vɔ kilodia la ave. Vɔ wakatedia difuku tshɛ di’ashi+ ndo vɔ wakakɔtɛ osongo tshɛ wa dimɛna.+ L’ekomelo, paka mpele dia ave dia Kirɛ-Harɛsɛta+ mbakatshikala, ko amboki w’ave wakakidinge ndo wakakilanya.

26 Lam’akɛnyi nkumekanga ka Mɔaba dia nde ambɔlɛndjama lo ta, nde akɔshi apami 700 waki la tokuwa ta ta dia vɔ nyanga mboka k’otsha le nkumekanga k’Ɛdɔmɛ,+ koko vɔ komonga la akoka wa nsala dui sɔ. 27 Ko nde akɔshi ɔnande l’enondo lakahombe mbɔhɛna, ko akoolambola oko olambo wa lotshumba+ lo ehele. Ase Isariyɛlɛ wakokama nkɛlɛ lo yɛdikɔ y’efula, ko vɔ wakakakitɔna la nde ndo wakakalola lo wodja awɔ.