Ɛzɛkiyɛlɛ
27 Ɔtɛkɛta wa Jehowa wakaye le mi nto ɔnɛ: 2 “Wɛ ɔna onto, emba lembo l’otanda* lo dikambo dia Tura,+ 3 ndo tɛ Tura wate:
‘Wɛ ladjasɛ lo asoko wa ndjale,
Omundji w’okanda dikambo dia anto wa lo asɛnga efula,
Nkum’Olongo Nkumadiɔndjɔ Jehowa kata ate:
“Wɛ Tura, wɛmɛ kakate wate: ‘Dimi lekɔ kokele lo olangala.’+
4 Bɛtshi diayɛ dia nkɛtɛ diekɔ l’atei wa ndjale,
Ndo ambiki ayɛ waketɛ olangala ayɛ kokele.
5 Vɔ wakasale abaya ayɛ tshɛ la esongo wa dihake w’oma la Senirɛ,+
Ndo vɔ wakɔshi olondo w’oma la Lɛbanɔna dia nsala ekundji kasukɛ dipɛma diayɛ.
6 Vɔ wakasale nkahi yayɛ la osongo wa ɔakɛ w’oma la Bashana,
Ndo ɔtɛ ayɛ wa masuwa waki wa abaya w’esenge wakawadje owanga w’oma lo asɛnga wa Kitimɛ.+
7 Ahɔndɔ wa alangi alangi wa linɛnɛ w’oma lo Edjibito mbaki oko dipɛma diayɛ dia masuwa,
Ndo okombɔ ayɛ wakasalema la eshinga wa bule ndo la dihɔndɔ di’ebelabela di’oma lo asɛnga wa Elisha.+
8 Ase Sidɔna ndo ase Aravada+ mbaki aduki ayɛ.
Tura le, apami ayɛ wele la diewo mbaki ase olimu ayɛ wa lo masuwa.+
9 Apami wele la diewo ndo wambohokɔ akambo* wa la Ngɛbala,+ mbakadihe wesho ayɛ.+
Masuwa tshɛ wa lo ndjale ndo ase masuwa awɔ wakayaka le yɛ dia ndjosondja diangɔ.
10 Ase Pɛrɛsiya, Luda ndo Puta+ waki l’atei wa asɔlayi ayɛ, andɔshi ayɛ wa ta.
Vɔ wakahanɛka dingawo diawɔ ndo mfulɛ yawɔ le yɛ ndo vɔ wakakoshaka kɛnɛmɔ.
11 Ase Aravada waki l’atei wa asɔlayi ayɛ wakemalaka lo mpele diayɛ l’otshimbedi w’otondo,
Apami wahoke wɔma waki lo totshoto tayɛ.
Vɔ wakahanɛka dingawo di’ebolonga l’otshimbedi w’otondo wa mpele diayɛ
Ndo waketɛ olangala ayɛ kokele.
12 “‘“Tarashishi+ akasale okanda kaamɛ la yɛ l’ɔtɛ wa efula k’ɔngɔnyi+ ayɛ. Vɔ wakengola mfɛsa, mbolo, etinɛ ndo ave la diangɔ diayɛ.+ 13 Javana, Tubala+ ndo Meshɛkɛ+ wakasale okanda kaamɛ la yɛ, lo mengola mfumbe+ ndo diangɔ dia nkonga la diangɔ diayɛ dia nsondja. 14 Luudu la Tongarama+ lakengola mfalasa, mfalasa ya ta ndo mfalo la diangɔ diayɛ. 15 Ase Dedana+ wakasale okanda kaamɛ la yɛ; wɛ akadje amundji w’okanda lo olimu lo asɛnga efula; vɔ wakakimɔka ewanga+ ndo esongo w’opindji oko elambo le yɛ. 16 Ɛdɔmɛ akasale okanda kaamɛ la yɛ l’ɔtɛ wa efula ka diangɔ diayɛ. Vɔ wakakimɔka tirikwazɛ, ahɔndɔ w’ebelabela, wa asango asango wele la alangi efula, ahɔndɔ w’amɛna, kɔrai ndo rubi dia mengola la diangɔ diayɛ.
17 “‘“Juda la wodja wa Isariyɛlɛ wakasale okanda kaamɛ la yɛ, lo nkimɔ eponga wa Minita,+ mbo ya ndɛ y’amɛna, osanga,+ esɔ ndo balasama+ dia mengola la diangɔ diayɛ.+
18 “‘“Damasɛkɛ+ akasale okanda kaamɛ la yɛ l’ɔtɛ wa efula ka diangɔ diayɛ ndo ɔngɔnyi ayɛ tshɛ, lo nsondja wanu wa Hɛlɛbɔna ndo wɛɔsa wa nyama wa Zahara.* 19 Vɛdana la Javana y’oma la Uzala wakakimɔ mbolo ya lotshula, kasia* ndo kanɛ* dia mengola la diangɔ diayɛ. 20 Dedana+ akasale okanda kaamɛ la yɛ lo ahɔndɔ wakitshawɔ laadiko dia mponda* dia mbahema. 21 Wɛ akadjaka ase Arabiya ndo ewandji tshɛ wa Kɛdara+ lo olimu, wanɛ waki amundji w’okanda wa ɛsɔngɔ w’ɛkɔkɔ ndo ɛkɔkɔ wa waomi ndo mbudi.+ 22 Amundji w’okanda wa Shɛba ndo Raama+ wakasale okanda kaamɛ la yɛ; vɔ wakakimɔ weho tshɛ wa malashi woleki amɛna, mbɔkɔ y’akɛsɔ ndo paonyi dia mengola la diangɔ diayɛ.+ 23 Harana,+ Kanɛ, Ɛdɛna,+ amundji w’okanda wa la Shɛba,+ ase Asishura+ ndo Kilimadɛ wakasale okanda kaamɛ la yɛ. 24 Lo lobingu layɛ vɔ wakasondjaka dɛngalɛnga di’amɛna, ahɔndɔ wakasalema la diangɔ dia bule ndo ahɔndɔ wa asango asango wele la alangi efula ndo tapi ya alangi alangi, vɔ tshɛ mbotamɛ ndo kelekama la ɛkɔdi.
25 Masuwa wa Tarashishi+ wakɛmbɛmbaka diangɔ diayɛ dia nsondja,
Ko wɛ akalole tɔɔ ndo akayala la wotsho* efula l’atei wa ndjale ka hwe.
26 Aduki ayɛ wakakɔtɔlɛ lo ndjale ya weke;
Lɔpɛpɛ l’oma lo ɛstɛ lakakohandjola l’atei wa ndjale ka hwe.
27 Ɔngɔnyi ayɛ, diangɔ diayɛ, diangɔ diayɛ dia nsondja, ase masuwa ayɛ ndo ase olimu ayɛ wa lo masuwa,
Wanɛ wadiha wesho ayɛ, wanɛ wasondja diangɔ diayɛ+ ndo andɔshi wa ta+ tshɛ,
Leemba* l’otondo lele l’etei kayɛ,
Vɔ tshɛ wayodinda l’atei wa ndjale ka hwe lushi la ɔkwɛlɔ ayɛ.+
28 Lam’ayolela ase olimu ayɛ wa lo masuwa, nkɛtɛ ya l’omamu wa ashi yayodidima.
29 Aduki tshɛ, ase masuwa ndo ase olimu wa lo masuwa
Wayoholɔ oma lo masuwa awɔ ndo wayemala l’okongo.
30 Vɔ wayodiya awui awɔ ndo wayokolela efula+
Watɛ ditshu lo ɛtɛ awɔ ndo wangitɔ lo otoko.
31 Vɔ wayoyanya hiɔlɔ ndo wayɔlɔta akoto;
Vɔ wayokolela efula* la ekoko wa wolo.
32 Lo delo diawɔ, vɔ wayemba lembo l’otanda ndo wayokembɛ ɔnɛ:
‘Akɔna ele oko Tura, lambotshikala ki l’atei wa ndjale?+
33 Lam’akɔtɔka diangɔ diayɛ oma lo ndjale ka hwe, wɛ akangɛnyangɛnyaka anto efula.+
Ɔngɔnyi ayɛ w’efula ndo diangɔ diayɛ dia nsondja diakangɔnya nkumi ya dikanga ya la nkɛtɛ.+
34 Wonya ɔnɛ wamboyohandjɔ lo ndjale ka hwe, lo ashi wa dingunda,+
Ndo diangɔ diayɛ dia nsondja tshɛ ndo anto ayɛ wambodinda kaamɛ la yɛ.+
35 Anto tshɛ wodjashi lo asɛnga wayokenda la diambo,+
Ndo nkumi ya dikanga yawɔ wayosaka lokomba la wɔma,+ dungi diawɔ diayonga la olengolengo.
36 Amundji w’okanda wa lo wedja wayoda hionge lo kɛnɛ kambokokomɛ.
Ekomelo kayɛ kayonga la shashimoya ndo kɔlɔ efula,
Ko wɛ hongaki nto pondjo pondjo.’”’”+