Jɛrɛmiya
20 L’etena kɛsɔ Pashura ɔna Imɛrɛ, ɔlɔmbɛdi waki ndo owandji lo luudu la Jehowa akahokamɛka etena kakataka Jɛrɛmiya awui asɔ. 2 Ko Pashura akakɔmɔla omvutshi Jɛrɛmiya ndo akawodje lo lowete+ laki lo Soko dia la diko dia Bɛnjamina diaki lo luudu la Jehowa. 3 Koko la wedi a pindju, etena kakatondja Pashura Jɛrɛmiya oma lo lowete, Jɛrɛmiya akawotɛ ate:
“Jehowa ambokɔlɛ, aha Pashura koko Wɔma lo Ahole Tshɛ.+ 4 Nɛ dia Jehowa kata ate: ‘Dimi layoketɛ ɛngɔ ka wɔma le yɛ wɛmɛ ndo le angɛnyi ayɛ tshɛ, ko vɔ wayɔkɔ la lokuwa la ta laki atunyi awɔ etena kayendaka washo ayɛ;+ ndo dimi layokimɔ Juda y’otondo lo anya wa nkumekanga ka Babilɔna ndo nde ayowatɔla lo lɔhɔmbɔ la Babilɔna ko ayotowadiaka la lokuwa la ta.+ 5 Ndo dimi layokimɔ ɔngɔnyi tshɛ w’osomba ɔnɛ, ekundji awɔ tshɛ, diangɔ diawɔ tshɛ di’oshinga wolo ndo diangɔ dia nɛmɔ tshɛ dia nkumi ya dikanga ya Juda lo anya w’atunyi awɔ.+ Ko vɔ wayomba diangɔ diakɔ, wayodiɔsa ndo wayoditɔla la Babilɔna.+ 6 Koko Pashura, wɛ la anto tshɛ wadjasɛ lo luudu layɛ, nyayotshɔ lo lɔhɔmbɔ. Wɛ ayotshɔ la Babilɔna ko wɛ ayotovɔ lɛkɔ ndo wɛ ayokundɛma lɛkɔ wɛ l’angɛnyi ayɛ tshɛ, nɛ dia wɛ akawatɛ prɔfɛsiya ya kashi.’”+
7 Jehowa le, wɛ akankese, ko dimi lakakesama.
Wɛ akakambe la wolo ayɛ le mi, ko wɛ akaleke wolo.+
Dimi lamboyala ɛngɔ ka tɔɔla lushi l’otondo;
Anto tshɛ wekɔ lo mɔnyɔlami.+
8 Nɛ dia mbala tshɛ katɛkɛtami, dimi pombaka mpangɔhangɔ ndo mbewoya ɔnɛ:
“Awui wa ngala ndo elanyelo!”
Le mi, ɔtɛkɛta wa Jehowa wamboyala kiɔkɔ ya lɔtɛngɔ ndo ya lɔsɔkɔ lushi l’otondo.+
9 Ko dimi lakate nte: “Handjowodimola nto,
Ndo handjɔtɛkɛta nto lo lokombo lande.”+
Koko vɔ wakayala lo otema ami oko dja yalombalomba yakudungana lo weka ami,
Ndo dimi lakalɛmbɛ dia mbolama l’etei;
Dimi kokoka mbikikɛ nto.+
10 Nɛ dia dimi lakoke engunungunu efula wa kɔlɔ;
Wɔma wakanyinge.+
“Nyoofunde; nyɛsɔ toofunde!”
Onto tshɛ lankombolɛ wɔladi akendɛka ɔkwɛlɔ ami ɔnɛ:+
“Ondo nde ayosala dindja di’enginya,
Ko sho tayokoka mbɔlɛndja ndo mbɔsɔmbɔya.”
11 Koko Jehowa aki kaamɛ la mi oko ɔndɔshi wa ta wokawɔ wɔma.+
Diakɔ diele wanɛ wampɛnyahɛnya wayotakana ndo hawotɔlɛndja.+
Vɔ wayoshama nsɔnyi k’efula, nɛ dia vɔ hawootondoya.
Nsɔnyi kawɔ ka pondjo pondjo hatohamɛ.+
12 Koko Jehowa kanga lolembelembe le, wɛ sɛdingolaka onto ɔlɔlɔ;
13 Nyembee Jehowa! Nyotombole Jehowa!
Nɛ dia nde akahandja ose wola* oma lo anya w’atshi wa kɔlɔ.
14 Lushi lakamotɔ ladjame mananu!
Lushi lakambote mama latɔtshɔkwamake!+
15 Mananu le onto lakela papa losango l’ɔlɔlɔ ɔnɛ:
“Wambokootɛ ɔna, ɔna pami!”
Lakawɔngɛnyangɛnya efula.
16 Onto ɔsɔ ayale oko esomba wele Jehowa akaalanya aha la lonyangu.
Nde ooke okoko wa delo la pindju ndo wondjo wa ombeka la midi.
17 Lande na kakinde kondjakami lo otema,
Tshike mama kami otonga diombo diami
Ndo otema ande wotongaka la diemi nshi tshɛ?+
18 Lande na kakamatombe oma lo otema
Dia ndjɛna ofukutanu ndo lɔkɔnyɔ,
Dia ndjokomiya nshi yami lo nsɔnyi?+