1 Kɔrɛtɔ
6 Naka onto ɔmɔtshi l’atei anyu ekɔ la okakatanu nde la onto okina,+ onde nde ayosombɔ mbofunda le anto wa kɔlɔ, koko aha le ekilami? 2 Kana onde nyu hanyeye dia ekilami wayolombosha andja?+ Ko naka nyu nyolombosha andja, onde laasɔ nyu bu la akoka wa nkandola akambo wa totshitshɛ? 3 Onde nyu hanyeye dia sho tayolombosha andjelo?+ Ko laasɔ, lande na kele aha akambo wa lo lɔsɛnɔ lɔnɛ? 4 Ko naka nyu nyokandola+ akambo wa lo lɔsɛnɔ lɔnɛ, lande na kasɔnanyu anto wɔnyɔma lo etshumanelo dia vɔ monga toshushi? 5 Dimi lambota dui sɔ dia nyosha nsɔnyi. Onde ndooko onto lele la lomba l’atei anyu lele la akoka wa nomboshaka anango? 6 Koko lo dihole dia nsala ngasɔ, ɔnangɛso ofunda ɔnangɛso okina le anto wele bu ambetawudi!
7 Lo mɛtɛ, ekɔ dui dia nsɔnyi efula lo woho wonyofundana lam’asanyu. Lo dihole dia nsala ngasɔ, lande na kahanyetawɔ vɔ nyosalɛ kɔlɔ?+ Lande na kahanyetawɔ kesama? 8 Koko, nyu mbosalɛ anangɛnyu kɔlɔ ndo nyu mbowakesa!
9 Kana onde nyu hanyeye nyate anto wa kɔlɔ hawotokita Diolelo dia Nzambi?+ Tanyokesamake.* Oyadi wanɛ wasala awui wa mindo wa dieyanelo,*+ atɛmɔdi wa dikishi,+ akanga wa loseka,+ apami wayakimɔ lo totshelo ta dieyanelo la apami,+ apami wasala dieyanelo la asekawɔ apami,*+ 10 wevi, akanga wa lokaki,+ ambidjɔki wa wanu,+ atɛnganyi* ndo apɔtwanyi, vɔ tshɛ hawotokita Diolelo dia Nzambi.+ 11 Ngasɔ mbaki amɔtshi wa l’atei anyu. Koko nyu nyakɛdiama,+ nyakakidiama+ ndo nyakɔsama oko anto w’ɛlɔlɔ+ lo lokombo la Nkumadiɔndjɔ Yeso Kristo kaamɛ la nyuma ka Nzambi kaso.
12 Akambo tshɛ mbetawɔmaka le mi, koko aha akambo tshɛ mbele la wahɔ.+ Akambo tshɛ mbetawɔmaka le mi, koko dimi hatetawɔ monga mfumbe* ka dikambo tshɛ. 13 Mbo ya ndɛ yekɔ dikambo dia dikundju ndo dikundju diekɔ dikambo dia mbo ya ndɛ, koko Nzambi ayolanya diangɔ diakɔ 2.+ Demba keema dikambo dia awui wa mindo wa dieyanelo,* koko dikambo dia Nkumadiɔndjɔ, ndo Nkumadiɔndjɔ+ ekɔ dikambo dia demba. 14 Koko Nzambi akolola Nkumadiɔndjɔ+ ndo nde ayotolola oma lo nyɔi+ l’ekimanyielo ka wolo ande.+
15 Onde nyu hanyeye dia alemba anyu wekɔ tenyi dia demba dia Kristo?+ Onde laasɔ dimi layonya tenyi dia demba dia Kristo ko dikakatanya la numba? Ndooko kaanga yema tshitshɛ! 16 Onde nyu hanyeye dia ɔnɛ lele kaamɛ la numba ekɔ demba 1 kaamɛ la nde? Nɛ dia nde mbutaka ate: “Vɔ 2 wayoyala demba 1.”+ 17 Koko onto lokakatanyi la Nkumadiɔndjɔ ekɔ ɔtɔi kaamɛ la nde lo yimba.+ 18 Nyolawɔ awui wa mindo wa dieyanelo!*+ Pɛkato kekina tshɛ kakoka onto nsala kekɔ l’andja wa demba diande, koko onto tshɛ lasala awui wa mindo wa dieyanelo ekɔ lo salɛ demba diande hita kɔlɔ.+ 19 Onde nyu hanyeye dia demba dianyu diekɔ tɛmpɛlɔ+ ka nyuma k’ekila kele le nyu kakanyalongola oma le Nzambi?+ Ndo nto, aha nyuamɛ mbayakanga,+ 20 nɛ dia nyu nyakasombama l’oshinga ɔmɔtshi.+ Ɔnkɔnɛ, nyotombole Nzambi+ lo demba dianyu.+