Esambo

Wa Davidɛ. Ngɛngu.

101 Dimi layembaka dikambo dia ngandji ka kɔlamelo ndo losembwe.

Jehowa le, dimi layokembɛka esambo wa lotombo.*

2 Dimi layosalaka akambo la shɛnɔdi ndo aha la onongo.*

Etena kakɔna kayoyoya le mi?

Dimi layɔkɛndakɛndaka la otema+ w’olowanyi l’etei ka luudu lami.

3 Dimi hantokitsha ndooko ɛngɔ k’anyanya la ntondo ka washo ami.

Dimi petshaka etsha wa wanɛ watona kɛnɛ kosembwe;+

Dimi hantonga la losambi la wɔ.*

4 Otema wɛngami mangana etale la mi;

Dimi hantetawɔ* kɛnɛ kele kɔlɔ.

5 Onto tshɛ lamamatanyiyɛ osekande lo woshɛshɛ,+

Dimi layowodiha onyɔ.*

Onto tshɛ lele la washo wa lotamanya ndo la otema w’otako,

Dimi hantowetawɔ.

6 Dimi layodjaka akanga wa kɔlamelo wa la nkɛtɛ yimba,

Dia vɔ mbidjasɛ kaamɛ la mi.

Ɔnɛ lakɛndakɛnda aha la onongo* kayonkambɛ.

7 Ndooko kanga okadi layodjasɛ lo luudu lami,

Ndo ndooko kanga kashi layemala lalemi.*

8 La pindju tshɛ, dimi layodihaka enyɔ* w’akanga wa kɔlɔ tshɛ wa la nkɛtɛ,

Dia ndjaka atshi wa kɔlɔ tshɛ oma l’osomba wa Jehowa.+