1 Nkumi ya dikanga
17 Elidja*+ ose Tishibɛ lakadjasɛka la Ngiliyadɛ+ akatɛ Ahaba ate: “Lo mɛtɛ oko wele Jehowa Nzambi k’Isariyɛlɛ lakambɛmi* la lɔsɛnɔ, lo ɛnɔnyi ɛnɛ, loonge kana mvula hatɔlɔ naka dimi latate dui!”+
2 Ɔtɛkɛta wa Jehowa wakaye le nde ndjowotɛ ɔnɛ: 3 “Onɛɛ oma lanɛ, tshɔka lo ɛstɛ kele toyashɛ lo Okidi wa Keritɛ,* lo ɛstɛ ka Jɔrdana. 4 Kotɔnɔke ashi w’oma lo kiɔkɔ y’ashi ndo dimi layodjangɛ angwangwa dia vɔ kelaka mbo ya ndɛ lɛkɔ.”+ 5 Nde akatshu aha la ntshimbatshimba ko akasale akambo lo ndjela ɔtɛkɛta wa Jehowa. Nde akatshu, ko akatotshikala suke la Okidi wa Keritɛ* lo ɛstɛ ka Jɔrdana. 6 Ko angwangwa wakawelaka mapa la onatshi la pindju ndo mapa la onatshi la dikɔlɔ ndo nde akanɔka ashi w’oma lo kiɔkɔ.+ 7 Koko l’ɔkɔngɔ wa nshi mɔtshi, kiɔkɔ yakɔ y’ashi yakome,+ nɛ dia mvula kɔndɔka lo wodja.
8 Ko ɔtɛkɛta wa Jehowa wakaye le nde ndjowotɛ ɔnɛ: 9 “Onɛɛ, tshɔka otsha la Zarɛfatɛ k’ase Sidɔna kele todjasɛ lɛkɔ. Dimi layodjangɛ wadi aki odo ɔmɔtshi lɛkɔ dia nde koshaka mbo ya ndɛ.”+ 10 Ko nde akonɛɛ, akatshu otsha la Zarɛfatɛ. Lam’akandakome la soko di’osomba, wadi aki odo ɔmɔtshi akanaka nkunyi. Ko nde akawete ndo akate ate: “Lam’alangayɛ, ombela yema y’ashi lo dikɔhɔ kele nnɔ.”+ 11 Lam’akandatatshɔka dia towɔsɛ, Elidja akoowelɛ ate: “Lam’alangayɛ, ombela ndo yema ya mapa lo lonya layɛ.” 12 Ko nde akate ate: “Lo mɛtɛ oko wele Jehowa Nzambi kayɛ la lɔsɛnɔ, dimi bu la mapa, paka diwambo 1 di’ofushi to kambotshikala la mi lo mbaka ka woke la yema y’esɔ tshitshɛ yele lo mpamba ka tshitshɛ.+ Lekɔ lo mina yema ya nkunyi kele ntshu ntokatɛ yangɔ dikambo diami dimi la ɔnami. L’ɔkɔngɔ wa sho ndɛ, sho tayovɔ.”
13 Ko Elidja akawotɛ ate: “Tokake wɔma. Tshɔka tosale oko watayɛ. Koko tokotankate ntondo mapa 1 wa tshitshɛ w’obolonga la kɛnɛ kele la yɛ kɛsɔ kele ombela. Oma laasɔ, wɛ mbeyaka ndjokatɛ dikambo diayɛ wɛ la ɔnayɛ. 14 Nɛ dia Jehowa Nzambi k’Isariyɛlɛ kata ate: ‘Ofushi wele lo mbaka ka woke hawotoshila ndo esɔ kele lo mpamba ka tshitshɛ hatoshila polo lushi layɔlɔsha Jehowa mvula laadiko dia nkɛtɛ.’”+ 15 Ko nde akatshu, akasale oko wakate Elidja, ndo nde l’ase luudu lande kaamɛ la Elidja wakale l’edja ka nshi efula.+ 16 Ofushi waki lo mbaka ka woke koshila ndo esɔ kaki lo mpamba ka tshitshɛ koshila, lo ndjela ɔtɛkɛta wa Jehowa wakandate lo tshimbo ya Elidja.
17 L’ɔkɔngɔ w’akambo asɔ, ɔna aki womoto lakanga luudu akandama la hemɔ ndo hemɔ kakɔ kakooheke wolo polo ndo nde nshisha lomu.+ 18 Ko womoto akɔ akatɛ Elidja ate: “Okambi wa Nzambi ka mɛtɛ le, kakɔna kasayɛ la mi* na? Onde wɛ amboya lanɛ dia ndjombohola onongo ami ndo dia ndjodiaka ɔnami?”+ 19 Koko nde akawotɛ ate: “Ombisha ɔnayɛ.” Ko nde akawɔshi oma lo dihɛlɔ diande, akadɛ la nde lo luudu la ndala la la diko lɛnɛ akandalalaka, ko nde akawoshanya lo mbeto kande.+ 20 Nde akalɔmbɛ Jehowa ate: “Jehowa Nzambi kami le,+ onde wɛ ambela mpokoso ndo le wadi aki odo lodjashi kaamɛ la mi lo ndjaka ɔnande?” 21 Oma laasɔ, nde akasembemala mbala 3 laadiko di’ɔnakɔ ndo akalɔmbɛ Jehowa ate: “Jehowa Nzambi kami le, lam’alangayɛ, etawɔ dia lɔsɛnɔ* l’ɔna ɔnɛ nkalola le nde.” 22 Jehowa akoke ɔsɛngɔsɛngɔ wa Elidja,+ ko lɔsɛnɔ* l’ɔnakɔ lakakalola le nde, ndo nde akayala la lɔsɛnɔ nto.*+ 23 Elidja akɔshi ɔnakɔ, akaholɔ la nde oma lo luudu la ndala la la diko, ko akayowosha nyango. Elidja akate ate: “Eenda, ɔnayɛ aya la lɔsɛnɔ.”+ 24 Ko womoto akɔ akatɛ Elidja ate: “Kakianɛ dimi lambeya dia wɛ mɛtɛ ekɔ okambi wa Nzambi+ ndo ɔtɛkɛta wa Jehowa wele l’onyɔ ayɛ wekɔ mɛtɛ.”