1 Joani
1 Lo kɛnɛ kendana la ɔtɛkɛta wa lɔsɛnɔ,+ waki oma k’etatelo, wele takawoke, wele takawɛnyi la washo aso, wele takawende tɛɛ ndo takawonanda l’anya aso, 2 (eelo, lɔsɛnɔ lakɛnama le so ndo sho takaliɛnyi ndo tekɔ lo lisambisha+ ndo tekɔ lo nyewoya lɔsɛnɔ la pondjo+ lɔsɔ laki kaamɛ la Shɛso ndo lakɛnama le so), 3 lakatɛnyi ndo lakatoke mbanyewoyaso+ dia nyu lawɔ monga la diɔtɔnganelo la so. Ndo tekɔ la diɔtɔnganelo sɔ sho la Shɛso ndo sho la Ɔnande Yeso Kristo.+ 4 Ndo tambonyofundɛ akambo anɛ dia ɔngɛnɔngɛnɔ aso monga tshɛ lo tshɛ.
5 Losango lakatoke oma le nde ndo lanyewoyaso lɔ lɔnɛ: Nzambi ekɔ osase+ ndo ndooko wodjima wele le nde.* 6 Naka sho mbuta shate: “Tekɔ la diɔtɔnganelo la nde,” ko sho tetemalaka nkɛndakɛnda lo wodjima, kete tekɔ lo mbuta kashi ndo hatote mɛtɛ.+ 7 Koko naka tekɔ lo nkɛndakɛnda l’osase oko wende ndamɛ osase, kete tekɔ la diɔtɔnganelo la nde ndo dikila dia Yeso y’Ɔnande diekɔ lo tɛdia oma lo pɛkato tshɛ.+
8 Naka sho mbuta shate: “Sho keema la pɛkato,” kete tekɔ lo ndjakesa+ ndo mɛtɛ keema l’etema aso. 9 Nzambi ekɔ la kɔlamelo ndo nde ekɔ ɔlɔlɔ. Ɔnkɔnɛ, naka sho mbishola pɛkato yaso, kete nde ayotodimanyiya ndo ayotɛdia oma l’akambo wa kɔlɔ+ tshɛ. 10 Naka sho mbuta shate: “Tatasalaka pɛkato,” kete tekɔ lo mbeetɛ kanga kashi ndo ɔtɛkɛta ande bu le so.