1 Samuɛlɛ
19 L’ɔkɔngɔ diko, Saolo akatɛ ɔnande Jɔnatana la ekambi ande tshɛ dia ndjaka+ Davidɛ. 2 Lam’ele Jɔnatana ɔna Saolo akalangaka Davidɛ+ efula, Jɔnatana akatɛ Davidɛ ate: “Saolo ka papa ekɔ lo nanga kodiaka. Lam’alangayɛ, koyalame la pindju ndo tshɔka lo dihole dia woshamu kele toyashɛ lɛkɔ. 3 Dimi layotomba ndo layemala suke la papa l’oswe lɛnɛ ayoyonga. Dimi layosawola la papa, ndo naka lambeya dui dimɔtshi, kete layosala tshɛ dia kotɛ.”+
4 Ko Jɔnatana akatɛkɛta dimɛna lo dikambo dia Davidɛ+ le Saolo ka she. Nde akawotɛ ate: “Nkumekanga hahombe salɛ Davidɛ di’okambi ande kɔlɔ, nɛ dia nde hakosale kɔlɔ, ndo kɛnɛ kamondokosalɛ kekɔ la wahɔ le yɛ. 5 Nde akadje lɔsɛnɔ lande lo waale* dia ndjaka ose Filistiya,+ ko Jehowa akasha Isariyɛlɛ w’otondo otshumba* wa woke. Wɛ akɛnyi dikambo sɔ ndo wɛ akangɛnangɛna efula. Ko lande na koyolanga salɛ dikila di’onto laha la onongo kɔlɔ lo nyanga dia ndjaka Davidɛ odiakadiaka?”+ 6 Saolo akokɛ Jɔnatana ndo Saolo akatshibe ate: “Lo mɛtɛ oko wele Jehowa la lɔsɛnɔ, nde hatodiakema.” 7 L’ɔkɔngɔ wa laasɔ, Jɔnatana akelɛ Davidɛ ko akawotɛ awui asɔ tshɛ. Ɔnkɔnɛ, Jɔnatana akela Davidɛ le Saolo, ko nde akayotetemala mbokambɛ woho wakandookambɛka ntondo.+
8 Oma laasɔ, ta diakatombe nto ko Davidɛ akatshu, akatɔlɔsha ase Filistiya ndo akaadiake efula ka mamba, ko vɔ wakalawɔ oma la ntondo kande.
9 Nyuma ka kɔlɔ k’oma le Jehowa kakaye le Saolo+ etena kakandadjasɛ lo luudu lande okime dikɔnga lo lonya lande ndo etena kakoohomɛka Davidɛ mishiki la lɔsɛsɛ.+ 10 Saolo akalange mamatanya Davidɛ la ehele la dikɔnga, koko nde akasandjɔ oma lale Saolo, ko dikɔnga diakatokama lo ehele. Davidɛ akalawɔ ndo akahande l’otsho ɔsɔ. 11 L’ɔkɔngɔ diko, Saolo akatome akɛndji otsha lo luudu la Davidɛ dia tolilama ndo dia vɔ mbodiaka la pindju,+ koko Mikalɛ ka wadi aki Davidɛ akawotɛ ate: “Naka wɛ halawe* l’otsho ɔnɛ, la pindju wɛ ayonga odo.” 12 Mbala kakɔ ɔtɔi, Mikalɛ akaholoya Davidɛ oma lo didishi, ko nde akalawɔ ndo akahande. 13 Mikalɛ akɔshi lohingu la terafimɛ* ko akalilasha lo mbeto ndo nde akakitsha lofulɛ la wɛɔsa wa mbudi lo dihole di’ɔtɛ ande, ko nde mbifɛ dihɔndɔ.
14 Saolo akatome akɛndji otsha le Davidɛ, koko Mikalɛ akate ate: “Nde ekɔ la hemɔ.” 15 Ɔnkɔnɛ, Saolo akatome akɛndji dia tenda Davidɛ ndo akawatɛ ate: “Nyombelande kaanga lo mbeto koladinde kele ndjoodiake.”+ 16 Lam’akɔtɔ akɛndji akɔ, vɔ wakatane lohingu la terafimɛ* lo mbeto ndo lofulɛ la wɛɔsa wa mbudi lo dihole di’ɔtɛ. 17 Ko Saolo akambola Mikalɛ ate: “Lande na kamboyonkesa nganɛ ndo kamboyolawoya otunyi+ ami ko nde ambohanda?” Mikalɛ akakadimola Saolo ate: “Nde akambute ate: ‘Ondawoya. Naka bu, kete layokodiaka!’”
18 Davidɛ akalawɔ ko akahande ndo nde akatokoma le Samuɛlɛ la Rama.+ Nde akawotɛ akambo tshɛ wakoosalɛ Saolo. Ko nde la Samuɛlɛ wakatshu ndo wakatotshikala la Nayɔta.+ 19 Oma laasɔ, wakatotɛ Saolo vate: “Eenda Davidɛ ekɔ la Nayɔta ka la Rama.” 20 Mbala kakɔ ɔtɔi, Saolo akatome akɛndji dia vɔ tonda Davidɛ. Lam’akawɛnyi amvutshi w’esombe wata prɔfɛsiya ndo Samuɛlɛ emadi ndo awalɔmbɔla, nyuma ka Nzambi kakaye le akɛndji wa Saolo, ko vɔ wakatatɛ nsala akambo ndo vɔ lawɔ oko amvutshi.
21 Lam’akawatotɛka Saolo dikambo sɔ, mbala kakɔ ɔtɔi nde akatome akɛndji akina, ko vɔ lawɔ wakatatɛ nsala akambo oko amvutshi. Ɔnkɔnɛ, Saolo akatome akɛndji akina nto, olui wa 3, ko vɔ lawɔ wakatatɛ nsala akambo oko amvutshi. 22 L’ekomelo, nde lawɔ akatshu otsha la Rama. Lam’akandakome lam’ele ɛtɛkɔ ka woke kele la Seku, nde akambola ate: “Lende ele Samuɛlɛ nde la Davidɛ?” Wakakadimola vate: “Vɔ wekɔ la Nayɔta+ ka la Rama.” 23 Lam’akatatshɔka Saolo oma laawɔ otsha la Nayɔta ka la Rama, nyuma ka Nzambi kakawahema ndo nde lawɔ, ko nde akatakɛndakɛndaka atasale akambo oko omvutshi polo lam’akandakome la Nayɔta ka la Rama. 24 Ndo nto, nde akakolola ahɔndɔ ande, ko nde lawɔ akasale akambo oko omvutshi la ntondo ka Samuɛlɛ ndo nde aketama otakataka* laawɔ yanyi y’otondo ndo otsho w’otondo. Diakɔ diatowotaka ɔnɛ: “Onde ndo Saolo kaya l’atei w’amvutshi?”+