1 Samuɛlɛ
11 Oma laasɔ, Nahashi ose Amɔna+ akaye ko akayoka mpango kande dia ndɔsha ase Jabɛshɛ+ wa la Ngiliyadɛ. Ase Jabɛshɛ tshɛ wakatɛ Nahashi vate: “Yaka todje sheke,* ko sho tayokokambɛka.” 2 Nahashi ose Amɔna akawatɛ ate: “Dimi layodja sheke kaamɛ la nyu naka nyu nsala dikambo nɛ: Washo anyu wa lonya l’omi tshɛ pombaka kundɔma. Dimi layosala dui sɔ dia mbisha Isariyɛlɛ w’otondo nsɔnyi.” 3 Dikumanyi dia la Jabɛshɛ wakookadimola vate: “Otosha nshi 7 kele totome akɛndji l’ɛtshi ka nkɛtɛ k’otondo k’Isariyɛlɛ. Oma laasɔ, naka ndooko onto latotsha, kete tayoyakimɔ le yɛ.” 4 Ko akɛndji wakakome la Ngibɛa+ ka Saolo ndo wakate awui asɔ la ntondo k’anto, ko anto tshɛ wakalele la wolo awɔ tshɛ.
5 Koko Saolo akayayaka oma l’oswe l’ɔkɔngɔ wa ngɔmbɛ, ko Saolo akambola ate: “Kakɔna kambotomba le anto asɔ? Lande na kalelawɔ?” Ko wakawotɛ awui w’oma le ase Jabɛshɛ. 6 Nyuma ka Nzambi kakasha Saolo+ wolo lam’akandoke awui asɔ, ko nde akadunganɛ la nkɛlɛ. 7 Ɔnkɔnɛ, nde akɔshi ngɔmbɛ 2, akayisɛsɛ ndo akayitome l’ɛtshi ka nkɛtɛ k’otondo k’Isariyɛlɛ lo anya w’akɛndji wakataka vate: “Onto tshɛ lahatoyela Saolo nde la Samuɛlɛ alongamɛke dia nganɛ mbayowosalɛ ngɔmbɛ yande.” Anto wakandama la wɔma wa Jehowa, ko vɔ tshɛ kaamɛ* wakatombe. 8 Ko nde akadia anto akɔ la Bezɛkɛ ndo waki ase Isariyɛlɛ nunu nkama shato (300000) ndo apami w’oma la Juda nunu akumi asato (30000). 9 Ko vɔ wakatɛ akɛndji wakaye vate: “Nyotote ase Jabɛshɛ wa la Ngiliyadɛ nyate: ‘Nyayoshimbamɛ loyi la yanyi ya tɛɛ.’” Ko akɛndji akɔ wakakalola ndo wakatotɛ ase Jabɛshɛ, ko vɔ wakangɛnangɛna efula. 10 Ko ase Jabɛshɛ wakate vate: “Sho tayoyakimɔ le nyu loyi, kele kanyotosale kɛnɛ tshɛ kalanganyu.”+
11 La wedi a pindju, Saolo akakahanya anto lo elui 3, ko vɔ wakatshu otsha l’atei wa mpango wonya aya suke la mpotɔ,* ko wakadiake ase Amɔna+ polo la yanyi ya tɛɛ. Wanɛ wakahande wakahandjɔ vwa woho wele kaanga anto 2 l’atei awɔ komonga kaamɛ nto. 12 Ko anto wakatɛ Samuɛlɛ vate: “Waa na wakataka vate: ‘Onde Saolo kahomba monga nkumekanga kaso?’+ Nyotondja anto akɔ lanɛ kele towadiake.” 13 Koko Saolo akawatɛ ate: “Ndooko onto lahomba ndjakema ɛlɔ,+ nɛ dia Jehowa ambotshungola Isariyɛlɛ ɛlɔ.”
14 L’ɔkɔngɔ diko, Samuɛlɛ akayotɛ anto ate: “Nyoyete totshu la Ngilingalɛ+ dia nyomotoshikikɛ lowandji.”+ 15 Ko anto tshɛ wakatshu otsha la Ngilingalɛ ndo lam’akawakome la Ngilingalɛ, vɔ wakadje Saolo nkumekanga la ntondo ka Jehowa. Oma laasɔ, vɔ wakalambola elambo w’osanga laawɔ la ntondo ka Jehowa,+ ko Saolo nde l’ase Isariyɛlɛ tshɛ wakasale fɛtɛ l’ɔngɛnɔngɛnɔ+ w’efula.