Jɛrɛmiya
18 Ɔtɛkɛta wa Jehowa wakaye le Jɛrɛmiya ɔnɛ: 2 “Emala kele holɔ otsha lo luudu laki okengi wa mpoke,+ ko dimi layosala dia wɛ mboka ɛtɛkɛta ami lɛkɔ.”
3 Ko dimi lakaholɔ otsha lo luudu laki okengi wa mpoke, ndo nde akalɔngɔsɔlaka diwomba. 4 Koko mpoke kakakengaka okengi wa mpoke la diwomba kakalana lo anya ande. Ɔnkɔnɛ, okengi wa mpoke akanyomokamba la diɔ dia nkenga ɛngɔ kekina, oko wakandɛnyi ɔlɔlɔ.*
5 Ko ɔtɛkɛta wa Jehowa wakaye le mi ɔnɛ: 6 “‘Luudu l’Isariyɛlɛ le, onde dimi haakoke nsala la nyu oko wakasale okengi wa mpoke ɔsɔ?’ mbata Jehowa. ‘Luudu l’Isariyɛlɛ le,+ eenda! Oko wele diwomba lo anya w’okengi wa mpoke mbenyu lo anya ami. 7 Etena tshɛ kayomota dia nkundola, nkɔsha ndo nanya wodja kana diolelo dimɔtshi,+ 8 ko wodja akɔ ntshika kɔlɔ yawɔ yakamate lo dikambo diawɔ, dimi lawɔ layotshikitanya kanyi yami yendana* la mpokoso kakamasangoya dia mbela lɔkɔ.+ 9 Koko etena tshɛ kayomota dia mbika ndo monɛ wodja kana diolelo dimɔtshi, 10 ko vɔ nsala kɛnɛ kele kɔlɔ lo washo ami ndo hawokitanyiyisha dui diami, dimi layotshikitanya kanyi yami yendana* la ɔlɔlɔ wakamakongɛ dia mbosalɛ.’
11 “Lam’alangayɛ, kakianɛ tɛ ase Juda ndo anto wadjasɛ la Jɛrusalɛma wate: ‘Jehowa kata ate: “Dimi lekɔ lo nyɔlɔngɔsɔlɛ* mpokoso ndo lekɔ lo nkongɛ dui dimɔtshi dikambo dianyu. Lam’alanganyu, nyokalole oma lo mboka yanyu ya kɔlɔ ndo nyɔlɔngɔsɔlɛ mboka yanyu la etsha anyu.”’”+
12 Koko vɔ mbutaka ɔnɛ: “Ndooko elongamelo!+ Nɛ dia sho tayɔkɛndakɛnda lo ndjela tokanyi taso ndo onto l’onto la l’atei aso ayɔkɛndakɛnda lo ndjela otema ande wa kɔlɔ.”+
13 Ɔnkɔnɛ, Jehowa kata ate:
“Lam’alanganyu, nyombole l’atei wa wedja.
Akɔna akoke dikambo diele oko nɛ?
Osekaseka wa emuma w’Isariyɛlɛ akasale dui dioleki tshɛ wɔnɔnyi.+
14 Onde loonge l’ekama la la Lɛbanɔna shishɔka oma lo ave wa lo ekidi alɔ?
Kana ashi wa tshitshi wakɛla oma l’etale wayoma?
15 Koko anto ami wakambohɛ.+
Nɛ dia vɔ wakalambola elambo* le ɛngɔ k’anyanya,+
Ndo vɔ takanyaka anto lo mboka yawɔ, mboka y’edjedja,+
Dia nkɛndakɛnda lo abala wele bu amɛna ndo ebamubamu,*
16 Dia mbetɛ wodja awɔ ɛngɔ ka wɔma+
Ndo ɛngɔ ka mbidɛka ekoko lo pondjo.+
Onto tshɛ layeta suke la wɔ ayondama la wɔma ndo ayonyinginya ɔtɛ.+
17 Oko lɔpɛpɛ l’oma lo ɛstɛ, dimi layowahandjola la ntondo ka otunyi.
Lushi la mpokoso kawɔ,+ dimi layowaɛdiya ɔkɔngɔ, koko aha elungi kami.”
18 Ndo vɔ wakate ɔnɛ: “Nyɛsɔ tɔtwɛ Jɛrɛmiya+ sheke, nɛ dia ɛlɛmbɛ* hawotoshishɔ oma le ɛlɔmbɛdi aso kana dako oma le akanga wa tomba kana ɔtɛkɛta oma le amvutshi. Nyɛsɔ tosawole lo dikambo diande* ndo tatodjake yimba lo kɛnɛ katande.”
19 Jehowa le, ombidje yimba,
Ndo hokamɛ kɛnɛ kata andɔshi ami.
20 Onde pombaka nkaloya kɔlɔ lo ɔlɔlɔ?
Nɛ dia vɔ wakatshimɛ lɔsɛnɔ lami* difuku.+
Ohɔ woho wakamemala la ntondo kayɛ dia ntɛkɛta awui w’amɛna wendana la wɔ,
Dia minya odudu ayɛ oma le wɔ.
21 Ɔnkɔnɛ, kimɔ anawɔ lo ndjala ka kasha,
Ndo kimɔwɔ lo wolo wa lokuwa la ta.+
Wadiɛwɔ wonge aha la ana ndo wadi waki edo.+
Apami awɔ wadiakeme la hemɔ ka nyɔi,
Ɛlɔngɔ awɔ w’apami wadiakeme lo ta la lokuwa la ta.+
22 Ekoko wokɛme oma lo mvudu yawɔ
Etena kelayɛ dengalenga le wɔ la shashimoya.
Nɛ dia vɔ wakatshime difuku dia mindami
Ndo wakaambe ekolo ami tolonga.+
23 Koko Jehowa le, wɛ
Mbeyaka dimɛna dikongelo diakongɛwɔ dia ndjakami.+
Tokombake munga kawɔ,
Ndo tonyake pɛkato kawɔ oma la ntondo kayɛ.