Rɔmɔ
9 Dimi lekɔ lo nyotɛ mɛtɛ lo Kristo, aha kashi mbatami, nɛ dia nkum’otema kami shikikɛka kaamɛ la mi lo nyuma k’ekila, 2 dia lekɔ la lɔkɔnyɔ l’efula ndo kandji kahashile l’otema ami. 3 Nɛ dia dimi lotokombola ndjakakitola la Kristo oko onto lambodjama mananu lo wahɔ w’analengo, ewotɔ ami wa lo demba, 4 wanɛ wele ase Isariyɛlɛ. Vɔ mbakɔsama oko ana wa yanyi+ ndo mbakalongola lotombo, toseke,+ Ɛlɛmbɛ,+ olimu w’ekila+ ndo alaka.+ 5 Vɔ mbele akanga+ wa watshɛso ndo wanɛ wele Kristo akotɔ lo demba+ oma l’ɔlɔndji awɔ. Nzambi lele laadiko dia tshɛ atombɔme pondjo pondjo! Aamɛɛ.
6 Koko aha oko ɔnɛ ɔtɛkɛta wa Nzambi wakakite tatala. Nɛ dia aha anto tshɛ wakotɔ oma le Isariyɛlɛ mbele mɛtɛ ase “Isariyɛlɛ.”+ 7 Ndo aha l’ɔtɛ wewɔ kanula*+ y’Abrahama mbewɔ vɔ tshɛ ana, koko: “Ɔnɛ layelamɛ ‘kanula* yayɛ’ ayotomba oma le Isaka.”+ 8 Mbuta ate ana wa lo demba keema mɛtɛ ana wa Nzambi,+ koko ana wa daka+ wekɔ lo mbɔsama oko kanula.* 9 Nɛ dia ɔtɛkɛta wa daka waki ɔnkɔnɛ: “L’etena kɛnɛ dimi layoya ndo Sara ayonga la ɔna pami.”+ 10 Aha l’etena kɛsɔ keto, koko ndo lam’akatshu Rɛbɛka diemi dia waasa oma le onto 1, tshɛso+ Isaka; 11 nɛ dia etena kakiwɔ watotɔ ndo kakiwɔ watasale ndooko dikambo di’ɔlɔlɔ kana dia kɔlɔ, dia sangwelo diaki Nzambi diendana la ɔsɔnwɛlɔ tetemalaka nemanɛ, aha la etsha koko la Ɔnɛ lasha leeta, 12 akatama lo dikambo diande ɔnɛ: “Enondo ayonga mfumbe ka kose.”+ 13 Oko wakadiafundama ɔnɛ: “Dimi lakalange Jakɔbɔ koko lakahetsha+ Esao.”
14 Ko ayotota? Onde Nzambi ekɔ la shɔnɔdi? Ndooko!+ 15 Nɛ dia nde akatɛ Mɔsɛ ate: “Onto tshɛ lalangami mboka kɛtshi, dimi layowoka kɛtshi ndo onto tshɛ lalangami mboka kandji, dimi layowoka kandji.”+ 16 Ɔnkɔnɛ, dikambo sɔ hadiolemanɛ la nsaki k’onto kana la welo wadjande,* koko nemanɛka la Nzambi lele la kɛtshi.+ 17 Nɛ dia afundelo mbutɛka Farawɔ ɔnɛ: “L’ɔtɛ wa dikambo nɛ mbakamakotshike: Dia mɛnya wolo ami lo dikambo diayɛ ndo dia lokombo lami mbewoyama lo nkɛtɛ+ k’otondo.” 18 Ɔnkɔnɛ, nde mbokaka ɔnɛ tshɛ lalangande kɛtshi, koko ɔnɛ lalangande ate akeketsha otema, nde mbotshikaka dia nde nkeketsha otema.+
19 Ɔnkɔnɛ, wɛ ayombutɛ wate: “Lande na kahangwɛnde anto? Onto akɔna akoka ndɔshana la lolango lande?” 20 Ko wɛ onto, eeyɛ katoyokadimɔna la Nzambi?+ Onde ɛngɔ kakasalema kayotɛ ɔnɛ lakakisale ɔnɛ: “Lande na kakayansale nganɛ?”+ 21 Onde okengi wa mpoke keema la lowandji le diwomba,+ dia nsala la diwomba diakɔ diamɛ ɛngɔ kɛmɔtshi dikambo dia okambelo wa nɛmɔ efula kana ɛngɔ kekina k’anyanya? 22 Ko ayotota naka Nzambi nangaka mɛnya nkɛlɛ kande ndo mbeyanya wolo ande, ko nde akakikɛ la solo dia lotutsha di’efula diangɔ dia diwomba dia nkɛlɛ diasungana ndanyema? 23 Ndo naka dui sɔ diakasalema dia mbeyanya ɛngɔnyi wa lotombo lande le diangɔ dia diwomba dia kɛtshi+ diakandalɔngɔsɔla la ntondo dikambo dia lotombo, 24 mbuta ate sho wanɛ wakandelɛ, aha oma l’atei w’ase Juda ato, koko ndo oma l’atei w’ase wedja,+ ayotota lo dikambo sɔ? 25 Ekɔ oko wakandate nto lo Hɔsɛya ate: “Wanɛ waki komonga anto ami,+ dimi layowaelɛ nte: ‘Anto ami,’ ndo ɔnɛ laki kombokama ngandji, dimi layowelɛ nte: ‘Onangemi’+ 26 ndo lo dihole diakawawatɛka ɔnɛ: ‘Nyu keema anto ami,’ vɔ wayelamɛ lɛkɔ ɔnɛ: ‘Ana wa Nzambi+ kasɛna.’”
27 Ndo nto, Isaya akate la dui dia wolo lo dikambo dia Isariyɛlɛ ate: “Kaanga mbele lofulo l’ana w’Isariyɛlɛ koka monga oko lɔkɔngɔ la lo ndjale, paka atshikadi ato mbayoshimbamɛ.+ 28 Nɛ dia Jehowa* ayokoya l’anto wa la nkɛtɛ, ayoshidiya dikambo diakɔ ndo ayodisala lo tshena pe.”*+ 29 Oko wakate Isaya la ntondo ate: “Otondonga Jehowa* kanga lolembelembe hatotshike kanula,* tshike taya paka oko Sɔdɔma ndo tshike tambɔfɔna la Ngɔmɔra.”+
30 Ko ayotota nto? Ɔnɛ ase wedja kaanga mbahawayele losembwe, wakakome lo losembwe,+ losembwe laya oma lo mbetawɔ,+ 31 koko ase Isariyɛlɛ kaanga mbakawayelaka ɛlɛmbɛ wa losembwe, vɔ kokotsha oyango wa ɛlɛmbɛ akɔ. 32 L’ɔtɛ wa na? Nɛ dia vɔ kondjela ɛlɛmbɛ oma lo mbetawɔ, koko aki oko oma lo etsha. Vɔ wakatakana lo “dive diatakanya,”+ 33 oko wakadiafundama ɔnɛ: “Eenda, dimi lambokitsha dive diatakanya ndo dive+ dia woke diakɔshana la Siɔna, koko ɔnɛ longa la mbetawɔ le diɔ hatɛmba ɛkɔndjɔ.”+