1 Samuɛlɛ

17 Ase Filistiya+ wakatshumanya asɔlayi* awɔ dia ndɔ ta. Vɔ wakatshumana l’osomba wa Sɔko+ wa la Juda ndo wakake mpango kawɔ lam’asa Sɔko la Azeka+ lo Efɛsɛ-Damima.+ 2 Saolo nde l’apami w’ase Isariyɛlɛ wakatshumana ndo wakake mpango kawɔ lo Okidi wa Ela+ ndo wakalɔngama dia ndɔ l’ase Filistiya. 3 Ase Filistiya waki lo dikona dia lo wedi ɔmɔtshi ndo ase Isariyɛlɛ waki lo dikona dia lo wedi okina ko okidi waki lam’asawɔ.

4 Ko ɔndɔshi wa ta wa wolo ɔmɔtshi, lokombo lande Ngɔliyatɛ,+ akatombe oma lo mpango k’ase Filistiya, oma la Ngata+ ndo nde aki otale wa kubita 6 la nana dia lonya.* 5 Nde aki la lofulɛ la nkonga l’ɔtɛ ande ndo nde akalɔtɛ dikɔti dia mbolo diaki la mposo mposo. Nkonga yaki lo dikɔti+ diakɔ yaki la wotsho wa tɔshɛkɛlɛ nunu tanu (5000).* 6 Nde aki la ekombɔ wa nkonga lo ekolo ande ndo dikɔnga+ dia nkonga lo ahɛka ande. 7 Wenyi wa dikɔnga diande waki oko osembe w’osadi w’adiba+ ndo ɛsɛlɛngɛ ka dikɔnga diande kaki la wotsho wa tɔshɛkɛlɛ 600.* Ɔmɛmbi ande w’engawo akayayaka la ntondo kande. 8 Oma laasɔ, nde akemala ko akawelɛ andɔshi wa ta w’ase Isariyɛlɛ+ ate: “Lande na kambonyoya ndjɔlɔngama dia ndɔ ta? Shi dimi lekɔ ose Filistiya ndo nyu nyekɔ ekambi waki Saolo? Nyɔsɔnɛ pami kɛmɔtshi kele aye toyɔlɔ. 9 Naka nde ekɔ l’akoka wa ndɔ la mi ko nde nɛndjami, kete sho tayonga ekambi anyu. Ko naka dimi lambooleka wolo ndo lambɔɔlɛndja, kete nyu nyayonga ekambi aso ndo nyayotokambɛka.” 10 Ko ose Filistiya akɔ akate ate: “Dimi lambodja andɔshi wa ta w’ase Isariyɛlɛ+ tɔfwɛfwɛ* ɛlɔ nte: Nyombisha pami kɛmɔtshi kele tɔlɔ!”

11 Lam’akoke Saolo nde l’ase Isariyɛlɛ tshɛ ɛtɛkɛta waki ose Filistiya ɔsɔ, vɔ wakaatɛ asolo ndo wakoke wɔma wa mamba.

12 Davidɛ aki ɔna Jɛse, ose Efarata+ ɔmɔtshi l’oma la Bɛtɛlɛhɛma+ ka la Juda. Jɛse+ aki l’ana w’apami+ 8 ndo nde aki osombe lo nshi ya Saolo. 13 Ana w’apami asato wa nondo waki Jɛse wakayele Saolo lo ta.+ Nkombo y’ana w’apami akɔ 3 wakatshu lo ta yɔ nyɛ: Eliyabɛ+ laki enondo, Abinadaba+ ɔna la 2 ndo Shama+ ɔna la 3. 14 Davidɛ aki ɔna la kose+ ndo ana 3 wa nondo wakayele Saolo.

15 Davidɛ akatshɔka ndo akakalolaka oma le Saolo dia tolama ɛkɔkɔ+ wa she la Bɛtɛlɛhɛma. 16 L’etena kɛsɔ, ose Filistiya akɔ akatombaka la ntondo ko akemalaka pindju tshɛ ndo dikɔlɔ tshɛ l’edja ka nshi 40.

17 Ko Jɛse akatɛ ɔnande Davidɛ ate: “Lam’alangayɛ, ɔsa efa* wa ntɔngɔ ya lofumba nyɛ la mapa ɛnɛ 10, kele tɔlɛ ananyɔ yema esadi lo mpango. 18 Ɔsa ndo bɛtshi nɛ 10 dia abɛlɛ w’ekama kele tɔlɛ owandji w’anto kinunu (1000). Ndo nto, kombole dia mbeya kana ananyɔ wekɔ ki ndo kombela djembetelo mɔtshi oma le wɔ.” 19 Vɔ waki kaamɛ la Saolo nde l’apami akina tshɛ w’ase Isariyɛlɛ lo Okidi* wa Ela,+ walɔ l’ase Filistiya.+

20 Davidɛ aketɔ la pindju ka pɛɛ ko akatshike onto ɔmɔtshi dia mbolamɛka ɛkɔkɔ. Nde akɛmbɛ otshumu, ko akatshu, oko wakawodjangɛ Jɛse. Lam’akandakome lo mpango, asɔlayi wakatatshɔka otsha lo dihole diakalɔmaka ta, watade kioko ya ta. 21 Ase Isariyɛlɛ ndo ase Filistiya wakalɔngama wɛlane dia ndɔ ta. 22 Mbala kakɔ ɔtɔi, Davidɛ akatshike otshumu le ɔnɛ lakalamaka etshumu, ko akalawɔ otsha lo dihole diakalɔmaka ta. Lam’akandakome, nde akatatɛ mimbola kana anango+ wekɔ ki.

23 Lam’akandatɛkɛtaka la wɔ, ɔndɔshi ɔmɔtshi wa ta wa wolo, ose Filistiya l’oma la Ngata akatombe. Lokombo lande Ngɔliyatɛ.+ Nde akatombe oma l’atei w’andɔshi wa ta w’ase Filistiya ndo nde akataka ɛtɛkɛta akɔ waamɛ wakandate ntondo,+ ko Davidɛ akoke. 24 Lam’akɛnyi apami tshɛ w’ase Isariyɛlɛ pami kakɔ, vɔ wakoolawɔ, wele la wɔma.+ 25 Apami w’ase Isariyɛlɛ wakataka vate: “Onde nyambɛna pami kambotomba kengo? Nde amboya ndjodja Isariyɛlɛ+ tɔfwɛfwɛ.* Onto layowodiaka, nkumekanga ayowosha ɔngɔnyi w’efula ndo ayowosha ɔnande la womoto,+ ko nde ayosha luudu la she lotshungɔ lo Isariyɛlɛ.”

26 Davidɛ akatatɛ mbutɛ apami wakemala suke la nde ate: “Ayowosalɛ onto layɔlɛndja ose Filistiya ongo ndo layonya Isariyɛlɛ oma lo nsɔnyi? Nɛ dia, ose Filistiya laki kominya mpota ongo eende katondodja andɔshi wa ta wa Nzambi+ kasɛna tɔfwɛfwɛ?”* 27 Ko anto wakawotɛ awui akɔ waamɛ wakawawotɛ ntondo vate: “Kɛsɔ mbayowosalɛ pami kayowodiaka.” 28 Lam’akoke enondo ande Eliyabɛ+ nde atɛkɛta l’anto akɔ, nde akomalɛ Davidɛ ndo akate ate: “Lande na kamboyoholɔ lendo? Amboyotatshike ɛkɔkɔ engana engo wambotshikala l’oswe?+ Dimi mbeyaka dimɛna otako ayɛ ndo tokanyi ta kɔlɔ ta l’otema ayɛ. Wɛ akaholwe lanɛ paka dia ndjenda ta.” 29 Ko Davidɛ akate ate: “Amomosala? Mimbola tsho kombodimi!” 30 Ko nde akatshimbe dia mimɔ lalende, akatshu le onto okina dia tombola dui diakɔ diamɛ diakandambola ntondo,+ ko wakookadimola woho akɔ waamɛ oko wakawookadimola ntondo.+

31 Ɛtɛkɛta wakate Davidɛ wakekɔnɛ ndo wakatokoma le Saolo. Ko nde akatome dui dia vɔ toweta. 32 Davidɛ akatɛ Saolo ate: “Ndooko onto lahomba nshisha dihonga* l’ɔtɛ ande. Okambi ayɛ ayotshɔ ndo ayotɔlɔ la ose Filistiya+ ongo.” 33 Koko Saolo akatɛ Davidɛ ate: “Wɛ bu l’akoka wa ndɔ l’ose Filistiya ongo, nɛ dia wɛ eke dikɛnda+ ndo nde ambongaka ɔsɔlayi* oma ko dikɛnda diande.” 34 Ko Davidɛ akatɛ Saolo ate: “Okambi ayɛ akayala olami w’ɛkɔkɔ wa she, ko lushi lɔmɔtshi, ntambwɛ+ kakande ɔkɔkɔ ndo laondo lakande ɔkɔkɔ. 35 Dimi lakayelana la yɔ, lakayikɔmɔla ndo lakatshungola ɛkɔkɔ akɔ oma l’enyɔ ayɔ. Kam’akayakungusɔ oya le mi, dimi lakayikimɛ lo alɛfulɛfu* ayɔ, lakayikɔmɔla, ko lakayidiake. 36 Okambi ayɛ akadiake ndo ntambwɛ ndo laondo. Ɔnkɔnɛ, ose Filistiya laki kominya mpota ongo ayonga oko nyama kɛmɔtshi l’atei ayɔ, nɛ dia nde ambodja andɔshi wa ta wa Nzambi+ kasɛna tɔfwɛfwɛ.”* 37 Oma laasɔ, Davidɛ akakotsha ate: “Jehowa lakambitsha oma lo nkala ya ntambwɛ ndo ya laondo ayombitsha oma lo anya w’ose Filistiya+ ongo.” Ko Saolo akatɛ Davidɛ ate: “Tshɔka, Jehowa onge kaamɛ la yɛ.”

38 Saolo akalɔtsha Davidɛ ahɔndɔ ande. Nde akɔɔlɔtsha lofulɛ la nkonga l’ɔtɛ, ndo oma laasɔ nde akɔɔlɔtsha dikɔti dia mbolo. 39 Oma laasɔ, Davidɛ akasɔmɛ lokuwa lande la ta laadiko di’ahɔndɔ ande, ko akahembe nkɛndakɛnda, koko nde kokoka, nɛ dia nde kombekesanɛ la wɔ. Davidɛ akatɛ Saolo ate: “Dimi halakoke nkɛndakɛnda la diangɔ sɔ, nɛ dia dimi halekesanɛ la diɔ.” Ko Davidɛ akadikolola. 40 L’ɔkɔngɔ wa laasɔ, nde akakimɛ ɔkɔmba ande lo lonya ndo akasɔnɛ mbɔkɔ 5 y’ɔsɛlɔ oma l’okidi w’ashi, ko akayidje lo dibenga dia mpata kande k’olami w’ɛkɔkɔ ndo nde akakimɛ yooka ave+ yande lo lonya, ko nde akatshu otsha le ose Filistiya akɔ.

41 Ose Filistiya akɔ akasukana oya le Davidɛ ndo ɔmɛmbi ande w’engawo aki la ntondo kande. 42 Lam’akende ose Filistiya akɔ ndo lam’akandɛnyi Davidɛ, nde akawɔnyɔla dikambo lokoho lande la demba laki beela ndo nde aki ɔna pami l’olangala.+ 43 Ko ose Filistiya akɔ akatɛ Davidɛ ate: “Onde dimi mfɔ+ kemi katoyoya le mi la ɛkɔmba?” Ko ose Filistiya akɔ akadje Davidɛ mananu lo lokombo la tozambizambi tande. 44 Ose Filistiya akɔ akatɛ Davidɛ ate: “Sukana tsho le mi, ko dimi layosha tofudu ta l’olongo ndo nyama ya l’okonda emunyi ayɛ.”

45 Davidɛ akakadimola ose Filistiya akɔ ate: “Wɛ amboya ndjɔlɔ la mi la lokuwa la ta, la dikɔnga ndo la ɔsɔngɔ,+ koko dimi lamboya ndjɔlɔ la yɛ la lokombo la Jehowa kanga lolembelembe,+ Nzambi k’andɔshi wa ta wa l’Isariyɛlɛ kamboyodja tɔfwɛfwɛ.*+ 46 Ɛlɔ Jehowa ayokokimɔ lo anya ami,+ ko dimi layokodiaka ndo layohembola ɔtɛ ayɛ. Ndo ɛlɔ dimi layosha tofudu ta l’olongo ndo nyama ya l’okonda yele la nkɛtɛ edo w’anto wa lo mpango k’ase Filistiya. Ko anto wa lo nkɛtɛ k’otondo wayeya dia Nzambi kɛmɔtshi ekɔ lo Isariyɛlɛ.+ 47 Ndo wanɛ tshɛ wotshumanyi lanɛ* wayeya dia aha la lokuwa la ta kana la dikɔnga mbashimbɛ+ Jehowa, nɛ dia ta diekɔ dia Jehowa+ ndo nde ayonyokimɔ nyu tshɛ lo anya aso.”+

48 Oma laasɔ, ose Filistiya akɔ akemala ndo akayasembɔka tɔɔ dia ndjohomana la Davidɛ, ko Davidɛ akalawɔ esadi otsha lo dihole dia ta dia tohomana l’ose Filistiya akɔ. 49 Davidɛ akadje lonya lo mpata kande, ko akɔshi lɔwɔkɔ 1 oma lɔkɔ ndo akalioke. Nde akatɛtɛ ose Filistiya akɔ l’okoko ndo lɔwɔkɔ lakɔ lakanyɔngɔmɛ l’okoko, ko nde akakɔ ekukumadi la nkɛtɛ.+ 50 Ɔnkɔnɛ, Davidɛ akalɛndja ose Filistiya akɔ la yooka ave ndo la lɔwɔkɔ 1. Nde akakɔmɔla ose Filistiya akɔ ndo akoodiake kaanga mbele Davidɛ komonga la lokuwa la ta lo lonya+ lande. 51 Davidɛ akatetemala ndawɔ, ko akatemala laadiko diande. Oma laasɔ, nde akɔshi lokuwa la ta+ l’ose Filistiya akɔ, akalisɔmɔla oma lo dihoso dialɔ ndo akoohembola ɔtɛ la lɔ dia ndjashikikɛ dia nde ambovɔ. Lam’akɛnyi ase Filistiya dia ɔndɔshi awɔ wa ta wa wolo ambovɔ, vɔ wakalawɔ.+

52 Ko apami w’ase Isariyɛlɛ ndo w’ase Juda wakemala, wakade kioko ndo wakatshanya ase Filistiya lo mboka k’otondo oma l’okidi+ polo lo asoko wa Ɛkɛrɔna,+ ndo edo w’ase Filistiya waki kalakala lo otadimbo w’oma la Sharayima+ polo la Ngata ndo la Ɛkɛrɔna. 53 L’ɔkɔngɔ w’ase Isariyɛlɛ nkalola oma la totshanya ase Filistiya la wolo tshɛ, vɔ wakambe diangɔ diaki lo mpango yawɔ.

54 Oma laasɔ, Davidɛ akɔshi ɔtɛ w’ose Filistiya akɔ, ko akatɔlɛ otsha la Jɛrusalɛma, koko nde akadje dihomɔ dia ta di’ose Filistiya akɔ lo luudu lande la dipɛma.+

55 Wonya wakɛnyi Saolo Davidɛ atatombe dia tohomana l’ose Filistiya akɔ, nde akambola Abinɛrɛ,+ owandji w’asɔlayi ande ate: “Akanga ɔna+ ongo na, Abinɛrɛ?” Abinɛrɛ akakadimola ate: “Nkumekanga le, lo mɛtɛ oko weyɛ la lɔsɛnɔ,* dimi haleye!” 56 Nkumekanga akate ate: “Yanga dia mbeya ɔlɔngɔ a pami akɔ ekɔ ɔna aki na.” 57 Ɔnkɔnɛ, kam’akakalola Davidɛ oma la todiaka ose Filistiya akɔ, Abinɛrɛ akawɔshi ko akɔɔtɔlɛ la ntondo ka Saolo okime ɔtɛ w’ose Filistiya+ akɔ lo anya ande. 58 Ko Saolo akawombola ate: “Wɛ ɔna aki na?” Ko Davidɛ akate ate: “Ɔna okambi ayɛ Jɛse+ ose Bɛtɛlɛhɛma.”+