1 Nkumi ya dikanga

15 L’ɔnɔnyi wa 18 w’ɛlɔmbwɛlɔ ka nkumekanga Jɛrɔbɔama+ ɔna Nebatɛ, Abidjamɛ akayala nkumekanga ka Juda.+ 2 Nde akolɛ l’edja k’ɛnɔnyi 3 la Jɛrusalɛma. Nyango lokombo lande Maaka,+ okana wa Abishalɔma.* 3 Nde akayele pɛkato tshɛ yakasale she laki la ntondo kande ndo otema ande komonga tshɛ lo tshɛ le* Jehowa Nzambi kande, oko waki otema wa Davidɛ dia tshɛnde. 4 Koko l’ɔtɛ wa Davidɛ,+ Jehowa Nzambi kande akawosha tala la Jɛrusalɛma+ lo ntondja ɔnande l’ɔkɔngɔ ande ndo lo mbetawɔ dia Jɛrusalɛma ntetemala monga. 5 Nɛ dia Davidɛ akasalaka kɛnɛ kaki ɔlɔlɔ lo washo wa Jehowa ndo nde kotshika ndjela kɛnɛ tshɛ kakandawodjangɛka lo nshi tshɛ ya lɔsɛnɔ lande, onyake lo dikambo diendana la Uriya ose Hiti.+ 6 Ta diaki lam’asa Rɛhɔbɔama nde la Jɛrɔbɔama nshi tshɛ ya lɔsɛnɔ lande.+

7 Lo kɛnɛ kendana l’etenyi kekina k’ɔkɔndɔ wa Abidjamɛ ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?+ Ndo nto, ta diaki lam’asa Abidjamɛ nde la Jɛrɔbɔama.+ 8 Oma laasɔ, Abidjamɛ aketama dia momuya kaamɛ la watshɛnde, ko wakookundɛ l’Osomba wa Davidɛ, ko Asa+ ɔnande akayala nkumekanga lo dihole diande.+

9 L’ɔnɔnyi wa 20 w’ɛlɔmbwɛlɔ ka Jɛrɔbɔama nkumekanga k’Isariyɛlɛ, Asa akatatɛ mbolɛ Juda. 10 Nde akolɛ l’edja k’ɛnɔnyi 41 la Jɛrusalɛma. Tshɛnde ka womoto lokombo lande Maaka,+ okana wa Abishalɔma. 11 Asa akasalaka kɛnɛ kaki ɔlɔlɔ lo washo wa Jehowa+ oko Davidɛ dia tshɛnde. 12 Nde akatshanya numba y’apami ya lo tɛmpɛlɔ oma lo wodja+ ndo akanya dikishi dia nyɛtɛɛtɛ* tshɛ diakasale watshɛnde.+ 13 Nde akanya ndo Maaka,+ tshɛnde ka womoto oma lo dihole diande dia nyango nkumekanga, nɛ dia nde akasale ekishi ka nsɔnyi dikambo di’ɔtɛmwɛlɔ wa kimɛta+ ka l’osongo.* Asa akahembola ekishi kande ka nsɔnyi ndo akakitshumbe lo Okidi wa Kidirɔna.+ 14 Koko ahole wa la diko kominyɛma.+ Kaanga mbakidiɔ ngasɔ, otema waki Asa waki tshɛ lo tshɛ le* Jehowa lɔsɛnɔ lande l’otondo. 15 Ndo nde akela diangɔ diakandakidia nde la she lo luudu la Jehowa, mbuta ate mfɛsa, paonyi ndo diangɔ diotshikitanyi.+

16 Ta diakongaka tena tshɛ lam’asa Asa nde la Baasha+ nkumekanga k’Isariyɛlɛ. 17 Ko Baasha nkumekanga k’Isariyɛlɛ akaye dia ndjɔlɔsha Juda ndo nde akatatɛ mbika* Rama+ dia nshimba onto tshɛ dia ntomba kana mbɔtɔ le* Asa nkumekanga ka Juda.+ 18 Ko Asa akɔshi mfɛsa ndo paonyi tshɛ yakatshikala lo waombelo wa lo luudu la Jehowa ndo waombelo wa lo luudu* la nkumekanga, ko nde akasha ekambi ande. Oma laasɔ, nkumekanga Asa akatomɛ Bɛnɛ-Hadada ɔna Tabirimɔna ɔna Heziyɔna, nkumekanga ka Suriya,+ lakadjasɛka la Damasɛkɛ, ata ate: 19 “Diokanelo* diekɔ lam’asami la yɛ ndo lam’asa papa la shɔ. Dimi lambokotomɛ woshasha wa mfɛsa la paonyi. Tshɔka, tolanya diokanelo* diele lam’asayɛ la Baasha nkumekanga k’Isariyɛlɛ, kele nde amimwe.” 20 Bɛnɛ-Hadada akahokamɛ kɛnɛ kakate nkumekanga Asa ndo nde akatome ewandji w’asɔlayi ande dia tɔlɔsha esomba wa lo Isariyɛlɛ, ko vɔ wakalanya Idjɔna,+ Danɛ,+ Abɛlɛ-Bɛtɛ-Maaka, Kinɛrɛtɛ k’otondo ndo ɛtshi ka nkɛtɛ k’otondo ka Nafɛtali. 21 Kam’akoke Baasha dui sɔ, mbala kakɔ ɔtɔi nde akatshike mbika* Rama, ko akatetemala mbidjasɛ la Tiriza.+ 22 Oma laasɔ, nkumekanga Asa akatshumanya Juda y’otondo; ndooko onto lakatshikala, ko vɔ wakɛmbɛ ave la esembe wa la Rama wakakaka Baasha la wɔ, ko nkumekanga Asa akayokamba la wɔ dia mbika* Ngɛba+ ka la Bɛnjamina ndo Mizipa.+

23 Lo kɛnɛ kendana l’etenyi kekina tshɛ k’ɔkɔndɔ wa Asa, wolo ande tshɛ, kɛnɛ tshɛ kakandasale ndo esomba wakandake,* shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? Koko lam’akandayala osombe, nde akandama la hemɔ lo ekolo.+ 24 Oma laasɔ, Asa aketama dia momuya kaamɛ la watshɛnde ndo wakookundɛ lalewɔ l’Osomba wa Davidɛ dia tshɛnde, ko ɔnande Jɛhɔshafata+ akayala nkumekanga lo dihole diande.

25 Nadaba+ ɔna Jɛrɔbɔama akayala nkumekanga k’Isariyɛlɛ l’ɔnɔnyi wa 2 w’ɛlɔmbwɛlɔ ka Asa nkumekanga ka Juda ndo nde akolɛ Isariyɛlɛ l’edja k’ɛnɔnyi 2. 26 Nde akatetemala nsala kɛnɛ kaki kɔlɔ lo washo wa Jehowa ndo akakɛndakɛndaka lo mboka ka she+ ndo lo pɛkato kande kakandakonya Isariyɛlɛ dia nsala.+ 27 Baasha ɔna Ahidja la lo luudu la Isakara akawɔtwɛ sheke ko Baasha akɔɔkɔmɔla la Ngibɛtɔna+ k’ase Filistiya etena kakadinge Nadaba nde l’ase Isariyɛlɛ tshɛ Ngibɛtɔna. 28 Ko Baasha akoodiake l’ɔnɔnyi wa 3 w’ɛlɔmbwɛlɔ ka Asa nkumekanga ka Juda ko nde akayala nkumekanga lo dihole diande. 29 Kam’akandayala nkumekanga, nde akadiake ase luudu la Jɛrɔbɔama tshɛ. Nde kotshika kaanga oseka Jɛrɔbɔama 1 la lɔsɛnɔ. Nde akaashile oshiki lo ndjela ɔtɛkɛta wa Jehowa wakandate lo tshimbo y’okambi ande Ahidja ose Shilo.+ 30 Dui sɔ diakasalema l’ɔtɛ wa pɛkato yakasale Jɛrɔbɔama ndo yakandakonya Isariyɛlɛ dia nsala, ndo nɛ dia nde akokiya Jehowa Nzambi k’Isariyɛlɛ nkɛlɛ k’efula. 31 Lo kɛnɛ kendana l’etenyi kekina k’ɔkɔndɔ wa Nadaba ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 32 Ta diakongaka tena tshɛ lam’asa Asa nde la Baasha nkumekanga k’Isariyɛlɛ.+

33 L’ɔnɔnyi wa 3 w’ɛlɔmbwɛlɔ ka Asa nkumekanga ka Juda, Baasha ɔna Ahidja akayala nkumekanga k’Isariyɛlɛ w’otondo lo Tiriza ndo nde akolɛ l’edja k’ɛnɔnyi 24.+ 34 Koko nde akatetemala nsala kɛnɛ kaki kɔlɔ lo washo wa Jehowa+ ndo nde akakɛndakɛndaka lo mboka ka Jɛrɔbɔama ndo lo pɛkato kande kakandakonya Isariyɛlɛ dia nsala.+